ខេត្តព្រះវិហារ៖ ផ្លែមៀនមានទម្ងន់ ១តោន រួមទាំងគ្រឿងឧបភោគ បរិភោគជាច្រើនមុខទៀត ដែលជាអំណោយដ៏ថ្លៃថ្លារបស់ សម្តេចតោជោ ហ៊ុន សែន នាយករដ្ឋមន្ត្រី នៃកម្ពុជា និងសម្តេចកិត្តិព្រឹទ្ធបណ្ឌិត ប៊ុនរ៉ានី ហ៊ុនសែន ត្រូវបានអាជ្ញាធរខេត្តព្រះវិហារ ប្រគល់ជូនមន្ត្រីជួរមុខ មានកងកម្លាំងទាំង៣ មន្ត្រីសុខាភិបាលខេត្ត និងមណ្ឌលកុមារកំព្រា នាម៉ោងជាង ៧យប់ ថ្ងៃទី២១សីហាឆ្នាំ២០២១នេះ។
អភិបាលរងខេត្តព្រះវិហារ លោក យុង គឹមហ៊ាន ដែលជាតំណាង អភិបាលខេត្តពរះវិហារ លោក ប្រាក់ សុវណ្ណ បានថ្លែងឲ្យដឹងថា រដ្ឋបាលខេត្ត បានធ្វើការបែងចែកផ្លែមៀន ផ្លែតាង៉ែន ដែលមានទម្ងន់ ១តោន និងគ្រឿងឧបភោគ បរិភោគជាច្រើនមុខទៀត ដែលជាអំណោយដ៏ថ្លៃថ្លារបស់ សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា និងសម្តេចកិត្តិព្រឹទ្ធបណ្ឌិត ប៊ុនរ៉ានី ហ៊ុនសែន ផ្តល់ជូនរដ្ឋបាលខេត្ត តាមរយៈ នាយឧត្តមសេនីយ៍កិត្តិបណ្ឌិត ហ៊ីង ប៊ុនហៀង ជូនដល់កងកម្លាំងទាំង៣ មន្ទីរសុខាភិបាល និងមណ្ឌលកុមារកំព្រា ក្នុងគ្រាដ៏លំបាក នៃការឆ្លងរាតត្បាតពីជំងឺកូវីដ១៩ ដ៏កាចសាហាវនេះ ។
អភិបាលរងខេត្តព្រះវិហារ លោក យ៉ុង គឹមហ៊ាន បានសម្តែង ការអរគុណជាពន្លឹក ចំពោះសម្តេចតេជោ ហ៊ុន សែន និងសម្តេចកិត្តិបណ្ឌិត ប៊ុន រ៉ានី ហ៊ុន សែន តាមរយៈ នាយឧត្តមសេនីយ៍កិត្តិបណ្ឌិត ហ៊ីង ប៊ុនហៀង ដែលបានផ្តល់ផ្លែមៀន និងផ្លែតាង៉ែន មកដល់រដ្ឋបាលខេត្តព្រះវិហារ ដើម្បីធ្វើការបែងចែកជូន កងកម្លាំងជួរមុខ មានកម្លាំងយោធា កងរាជអាវុធហត្ថ កម្លាំងនគរបាល មន្ទីរសុខាភិបាលខេត្ត ព្រមទាំងការផ្តល់ជូន មណ្ឌលកុមារកំព្រា នៅក្នុងខេត្តព្រះវិហារ ផងដែរ។
លោក យុង គឹមហ៊ាន អភិបាលរងខេត្តព្រះវិហារ បានបញ្ជាក់ថា ចំពោះផ្លែមៀន និងផ្លែតាង៉ែន ដែលត្រូវបែងចែកនៅក្នុងពេលនេះ ក្នុងនោះ ស្នងការនគរបាលខេត្ត ទទួលបាន ១០០គីឡូក្រាម កងរាជអាវុធហត្ថខេត្ត ទទួលបាន ១០០គីឡូក្រាម តំបន់ប្រតិបត្តិការសឹករងព្រះវិហារ ទទួលបាន ១០០គីឡូក្រាម មន្ទីរសុខាភិបាលខេត្ត ទទួលបាន ៦០០គីឡូក្រា ម និងមណ្ឌលកុមារកំព្រា ទទួលបាន១០០ គីឡូក្រាម។លើសពីនេះទៀត រដ្ឋបាលខេត្តព្រះវិហារ ក៏បានឧបត្ថម្ភបន្ថែមនូវទឹកក្រូច ទឹកបរិសុទ្ធ និងម៉ាស់ ជូនដល់មន្ត្រីជួរមុខ និងមណ្ឌលកុមារកំព្រា ទុកដោះស្រាយការប្រើប្រាស់ ទៅតាមតម្រូវការចាំបាច់ នៅក្នុងដំណាក់កាល ការឆ្លងរាលដាល នៃជំងឺកូវីដ-១៩នេះ ៕ ដោយ៖ឡុង សំបូរ
