ខេត្តកំពង់ធំ៖ បន្ទាប់ពីសមត្ថកិច្ច ប៉ូលិសសេដ្ឋកិច្ចខេត្តជាប់ត្រគៀគស្តូកមកយូរអង្វែង ទើបតែពេលនេះបាន ស្ទុះឡើងជាថ្មី ដើម្បីកំដៅសាច់ដុំបង្ហាញស្នាដៃ បង្ក្រាបបទល្មើសឈើប្រណិត ដឹកតាមរថយន្តសាំយ៉ុងមួយ គ្រឿងដែលបានដឹកឆ្លងកាត់ ប៉ុស្តិ៍យាមដ៏សំខាន់ របស់ផ្នែករដ្ឋបាលព្រៃឈើស្ទោង ដោយសុវត្តិភាព តែចៃដន្យ មកជាប់អន្ទាក់របស់ប៉ូលិសសេដ្ឋកិច្ចនៃស្នងការនគរបាលខេត្តកំពង់ធំ ។ 
នៅរសៀលម៉ោង៣.៣០នាទី ថ្ងៃទី ១៩ ខែសីហា ឆ្នាំ ២០១៤ លោក វរៈសេនីយ៍ត្រី វ៉ា ចាន់កុសល នាយរងការិយាល័យ នគរបាលប្រឆាំងបទល្មើសសេដ្ឋកិច្ចខេត្ត និងលោកវរៈសេនីយ៍ទោ ហៀង ហ៊ល បានឃាត់ប្រភេទសាំយ៉ុងមួយគ្រឿង ពណ៌ ស អត់ស្លាកលេខ បានដឹកឈើធ្នង់ ៤៤ដុំ ចេញពីស្រុកជាយសែន ខេត្តព្រះវិហារ ឆ្លងកាត់ខេត្តកំពង់ធំ ឆ្ពោះទៅខេត្តកំពង់ចាម ក្រោមការបញ្ជារផ្ទាល់ពីលោក ឧត្តមសេនីយ៍ត្រី ជូ សំអាន ស្នងការនគរបាលខេត្តកំពង់ធំ ។
លោក វរៈសេនីយ៍ត្រី វ៉ា ចាន់កុសល បានឲ្យដឹងថា ការបង្ក្រាបបទល្មើសដែលបានដឹកជញ្ជូនដោយខុសច្បាប់នេះ ក្រោយពីទទួលពត៌មានថា មានរថយន្តភិនភាគខាងលើ បានធ្វើសកម្មភាពដឹកឈើឆ្លងកាត់ខេត្តកំពង់ធំ ទើបបានសុំយោបល់លោក ស្នងការដើម្បីសុំគោលការឃាត់រថយន្ត ដែលមានចំនួនឈើធ្នងជាច្រើន ដុំបានផ្ទុកនៅលើរថយន្ត ព្រមទាំងមនុស្សចំនួន៤នាក់ មកកាន់ស្នងការនគរបាល ដើម្បីធ្វើកំណត់ហេតុ ចំណែកឈើនិងរថយន្ត ត្រូវបានប្រគល់ជូនសង្កាត់រដ្ឋបាលព្រៃឈើ កំពង់ស្វាយ ។ ជនសង្ស័យទី១ ឈ្មោះ ប៊ុន ណារដ្ឋា អាយុ ២១ឆ្នាំ ទី ២ ទាប បូណា អាយុ ២៤ឆ្នាំ ទី ៣ ឈ្មោះ យៀប សុភី អាយុ ១៧ឆ្នាំ ទី៤ លាង ហេន អាយុ ២៧ ឆ្នាំ ជាថៅកែធំ អ្នកទាំង៤ រស់នៅភូមិ ស្រឡៅ ឃុំ ពពិល ស្រុក កំពង់សៀម ខេត្តកំពង់ចាម ។
សូមបញ្ជាក់ផងដែរ បច្ចុប្បន្នគេសង្កេតឃើញ មានការបង្ក្រាបតិចតួចណាស់ ចំនែករថយន្តដែលចាប់បាន កន្លងមកភាគច្រើនមានតែ រថយន្តបែកកង់ និងរថយន្តក្រឡាប់ និងរថយន្តខូច ចំណែករថយន្តសេរីទំនើប ហាក់បីដូចជារាសីអត់ដល់ ឬក៏ចាញច្រាប បង្ក្រាបមិនបានម្តងណាឡើយ តែពេលនេះ ប៉ូលិសនៃស្នងការ នគរបាល បានបង្ហាញសាច់ដុំចាប់បានរថយន្តមួយគ្រឿង ទុកជាចំណងដៃឆ្នាំ ២០១៤។ 
