កំពង់ឆ្នាំង៖ « កម្មករនិយោជិតជាប្តីប្រពន្ធគ្មានលិខិតអាពាហ៍ពិពាហ៍ស្របច្បាប់គឺគ្មានសិទ្ធិទទួលបានរបបអ្វីទាំងអស់ពីបេឡាជាតិរបបសន្តិសុខសង្គមឡើយ » នេះជាការលើកឡើងរបស់លោក ម៉េង ហ៊ុង នាយករងបេឡារបបសន្តិសុខសង្គម ដែលបានថ្លែងនៅក្នុងកិច្ចប្រជុំផ្សព្វផ្សាយ
ស្តីពីគោលនយោបាយថ្មីៗ និងសេវានៃការផ្តល់តាវកាលិកហានិភ័យការងារជូនកម្មករនិយោជក ជាមួយម្ចាស់និងតំណាងរោងចក្រ សហគ្រាស គ្រឹះស្ថាន ក្រុមហ៊ុន សិប្បកម្ម ចំនួន៥៤នាក់ នៅរសៀលថ្ងៃទី១៨ ខែសីហា ឆ្នាំ២០១៤ របស់បេឡាជាតិរបបសន្តិសុខសង្គម ដែលបានធ្វើឡើងនៅក្នុងសណ្ឋាគាររស្មីសុខានូយ៉ក នៅក្នុងភូមិស្រែព្រីងសង្កាត់ កំពង់ឆ្នាំង ក្រុងកំពង់ឆ្នាំង។
លោក ជាវ ប៊ុនរិទ្ធ ប្រធានការិយាល័យគោលនយោបាយ ប.ស.ស បានរាយការណ៍អោយដឹងថាៈនៅក្នុងឆ្នាំ២០១៤នេះ ប.ស.ស បានចុះធ្វើការផ្សព្វផ្សាយអប់រំ ស្តីពីលក្ខខណ្ឌអនាម័យ សុវត្តិភាពការងារលក្ខខណ្ឌការងារ និងអត្ថប្រយោជន៍របបសន្តិសុខសង្គម បានចំនួន០៦លើកនៅក្នុងរោងចក្រចំនួន១៦ដែលមានកម្មករនិងយោជិកចូលរួមចំនួន១.៨០០នាក់ ហើយនឹងបន្តធ្វើការអប់រំផ្សព្វផ្សាយជាបន្តបន្ទាប់ថែមទៀត។
លទ្ធផលនៃការងារនៅឆ្នាំ២០១៣ ប.ស.ស ទទួលរបាយការណ៍ហានិភ័យការងារនៅទូទាំងប្រទេសបានចំនួន១៤.៨៥៥ករណី មានកម្មករនិយោជិតចំនួន ១៦.៨៤៩នាក់ (ស្រី១២.០៣៤នាក់) តាមរយៈលទ្ធផលនៃការអង្កេតគ្រោះថ្នាក់ការងារមានចំនួន ១៤.៥៦០ករណី មានកម្មកតនិយោជិតចំនួន១៦.៧៧៥នាក់ ត្រូវជា ១,៩%នៃចំនួនសរុបដែលបានបង់វិភាគទាន។ក្នុងនោះគ្រោះថ្នាក់នៅកន្លែងធ្វើការចំនួន ១២.០៦០នាក់ គ្រោះថ្នាក់ពេលធ្វើដំណើរចំនួន ៤.៧០៣នាក់ និងវិជ្ជាជីវៈចំនួន១២នាក់។ចំណែកកំរិតរបួសវិញ គឺរបួសស្រាល១៥.៤៤០នាក់ របួសធ្ងន់ ១.២២៧នាក់ ស្លាប់៩៧នាក់ និងមិនមែនជាគ្រោះថ្នាក់ការងារចំនួន៤៦៨នាក់។
លោក ម៉េង ហុង នាយករងបេឡាជាតិរបបសន្តិសុខសង្គមបានធ្វើបទបង្ហាញស្តីពីការចុះអធិការកិច្ចអោយដឹងថា៖ការរាយការណ៍របស់រោងចក្រ សហគ្រាសកន្លងមក អំពីចំនួនកម្មករនិយោជិតមិនត្រឹមត្រូវតាមភាពជាក់ស្តែង ពេលបង់ភាគទានមក ប.ស.ស ការបញ្ចូលអត្ថប្រយោជន៍ផ្សេងៗ ដូចជា ប្រាក់ថ្លៃបាយ ប្រាក់បន្ថែមម៉ោង ប្រាក់អតីតៈភាព ប្រាក់រង្វាន់ទៀងទាត់និងមិនត្រឹមត្រូវ ការប្រកាសប្រាក់ឈ្នួលមក ប.ស.ស មិនត្រឹមត្រូវ។ ការងារបង់ភាគទានជូន ប.ស.ស នៅយឺតយូរ ដូចជាការផ្លាស់ប្តូរអាស័យដ្ឋាន សហគ្រាស ឬគ្រឹះស្ថាន ការប្តូរឈ្មោះសហគ្រាស គ្រឹះស្ថាន ផ្លាស់ប្តូរម្ចាស់ ឬនាយកគ្រប់គ្រងរដ្ឋបាល ការផ្លាស់ប្តូរឯសារគតិយុត្តិ នៅក្នុងច្បាប់កម្មករម្នាក់ដែលមានប្រាក់ខែ២០ម៉ឺនរៀល ក្រុមហ៊ុនត្រូវបង់ភាគទានចំនួន១៦០០រៀលប៉ុណ្ណោះ ។
ការងារតាវកាលិកទាក់ទងនិងក្រុមហ៊ុន៖ មិនបានជូនដំណឹងមក ប ស ស ពេលមានកម្មករនិយោជិតជួបគ្រោះថ្នាក់ការងារ មិនបានធ្វើលិខិតបញ្ជូនជនរងគ្រោះ ដោយគ្រោះថ្នាក់ការងារទៅមន្ទីរពេទ្យដែលទទួលស្គាល់ដោយ ប ស ស មិនបានបញ្ជូនរបាយការណ៍ហានិភ័យការងារមក ប ស ស មិនបានផ្តល់ឯកសារជនរងគ្រោះដូចជា វិក័យប័ត្រលំអិត វេជ្ជបញ្ជារពេទ្យ លិខិតអនុញ្ញាតិចេញពីមន្ទីរពេទ្យ លិខិតអនុញ្ញាតិច្បាប់របស់ក្រុមហ៊ុន និងសំបុត្រអាពាហ៍ពិពាហ៍ស្របច្បាប់របស់ជនរងគ្រោះ ដើម្បីសុំទារសំណងពីប ស ស វិញ។
លោក ម៉េងហុង នអនុញ្ញាតិអោយអ្នកចូលរួមប្រជុំទាំងអស់សាកសួររាល់ចម្ងល់ទាំងឡាយយ៉ាងផុលផុសផងដែរ ដើម្បី លោកបកស្រាយ និងដោះស្រាយជូន អោយបានយល់ដឹងអំពីគោលនយោបាយ របបសន្តិសុខសង្គមរបស់ជាតិ ដែលទទួលរាប់រងចិញ្ចឹមក្រុមគ្រួសារនៅក្នុងបន្ទុកកម្មករនិងនិយោជិតដែលមានគ្រោះថ្នាក់ការងារដូចជា៖ បើប្រពន្ធស្លាប់ត្រូវចិញ្ចឹមប្តីរហូតមានប្រពន្ធថ្មី និងបើប្តីស្លាប់ត្រូវចិញ្ចឹមប្រពន្ធរហូតមានប្តី និងកូនៗរហូតដល់អាយុ១៨ឆ្នាំ។ប៉ុន្តែបើប្តីប្រពន្ធនោះគ្មានលិខិតអាពាហ៍ពិពាហ៍ស្របច្បាប់ គឺពេលរៀបការរួចមិនទៅធ្វើលិខិតអាពាហ៍ពិពាហ៍ពីមេឃុំនោះទេគឺគ្មានសិទ្ធិទទួលបានរបបអ្វីទាំងអស់ពី ប ស ស ឡើយ៕
