កំពង់ចាម៖ ផ្ទះមួយខ្នងទំហំ ៨ ម៉ែត្រគុណ ១២ម៉ែត្រ ជញ្ជាំងបេតុង ប្រក់ក្បឿង ត្រូវភ្លើងឆេះរាបដល់ដី បំផ្លាញទ្រព្យសម្បត្តិទាំងស្រុង នៅព្រឹកថ្ងៃទី២០ ខែសីហា ឆ្នាំ២០១៤ ចំណុចភូមិបាធាយ ឃុំបាធាយ ស្រុកបាធាយ ខេត្តកំពង់ចាម ។ លោក វរៈសេនីយ៍ត្រី សំ ណាល់ អធិការដ្ឋាននគរបាលស្រុកបាធាយបានឲ្យដឹងថាម្ចាស់ផ្ទះរងគ្រោះឈ្មោះ យិន សារ៉ាត រស់នៅភូមិកើតហេតុខាងលើ គឺបណ្តាលមកពីទុស្សេ
ចរន្តអគ្គិសនី ជាហេតុធ្វើឲ្យអណ្តាតភ្លើងឆាបឆេះបំផ្លាញទ្រព្យសម្បត្តិទាំងស្រុង ខណៈពេលកំពុងឆេះ មានសមត្ថកិច្ចអធិការដ្ឋាននគរបាលស្រុកបាធាយ កម្លាំងអគ្គីភ័យរបស់ស្នងការខេត្ត និងកម្លាំងប្រជាពលរដ្ឋ បានជួយអន្តរាគមន៍ ពន្លត់ទប់ស្កាត់អណ្តាតភ្លើង មិនឲ្យឆេះរាលដាលបន្តដល់ផ្ទះអ្នកជិតខាងផងដែរ ។
លោកអធិការបានបន្តទៀតថា ដើម្បីទប់ស្កាត់អណ្តាតភ្លើងមិនឲ្យឆេះរាលដាលបន្តទៅផ្ទះអ្នកជិតខាងនោះ ក្រុមពន្លត់អគ្គីភ័យរបស់ស្នងការខេត្ត បានបញ្ជូនរថយន្តចំនួន២គ្រឿងបាញ់ពន្លត់ទាន់ពេលវេលា ដោយប្រើទឹកបាញ់អស់ចំនួន៥រថយន្ត ទើបគ្រប់គ្រងស្ថានការនេះបាន ។ ហេតុការណ៍នេះមិនបណ្តាលឲ្យប៉ះពាល់ដល់អាយុជីវិតមនុស្សឡើយរីឯទ្រព្យសម្បត្តិម្ចាស់ផ្ទះ ត្រូវខូចខាតអស់ទាំងស្រុង តែមិនទាន់សរុបនៅឡើយទេ ដោយម្ចាស់ផ្ទះ គាត់ភ័យរន្ធត់ពេក មិនអាចធ្វើការបំភ្លឺបានទេ ៕