កោះកុង ៖ ប្រជាពលរដ្ឋរស់នៅក្នុងខេត្តកោះកុងបានរិះគន់ថា ខឿនការពារទឹករលកសមុទ្រមួយកន្លែង ស្ថិតនៅតាមតំបន់ឆ្នេរក្នុងឃុំប៉ាក់ខ្លង ស្រុកណ្ឌលសីមា ខេត្តកោះកុង ដែលត្រូវបានសាងសង់ដោយមនី្ទរសាធារណៈការខេត្តនោះ ពុំមានគុណភាពឡើយ គឺកំពុងតែរងការខូចខាតស្ទើរតែទាំងស្រុងទៅហើយ។ 
ខឿនការពាររលកទឹកសមុទ្រនេះទើបតែសាងសង់រួចរាល់កាលពីរដូវប្រាំងឆ្នាំ២០១៤កន្លងទៅនេះប៉ុណ្ណោះ ដោយចំណាយថវិការដ្ឋអស់រាប់រយលានរៀល ហើយមិនទាន់បានប៉ុន្មានខែផងក៏ត្រូវរលកទឹកសមុទ្របោកបក់បណ្តាលឲ្យរងនូវការខូចខាតស្ទើរតែទាំងស្រុង។ សំណង់នេះ ត្រូវប្រជាពលរដ្ឋនិយាយថា ស្ថាបនាឡើងមិនបានគោរពទៅតាមស្តង់ដាបច្ចេកទេសនោះទេ ព្រោះមនី្ទរសាធារណៈការខេត្តពុំបានធើ្វការសិក្សាពីកម្រិតទឹករលក ហើយសំណង់ពុំបានចាក់គ្រិះឲ្យបានរឹងមាំនិងយកថ្មភ្នំដែលមានគុណភាពអន់មកពុះរៀបប្រៀប ដូចគេរៀបធើ្វរបងផ្ទះធម្មតា។ ពាក់ព័ន្ធនិងបញ្ហានេះ លោក លី សារេត ប្រធានមនី្ទរសាធារណការខេត្តកោះកុងមិនអាចសុំការបំភ្លឺបានទេ នៅថ្ងៃនេះ៕
