ខេត្តបន្ទាយមានជ័យ: មន្ត្រីរាជការ១០រូបចាប់ពីនាយករងរដ្ឋបាល ដល់អនុប្រធានការិយាល័យ ក្នុងរដ្ឋបាលខេត្តបន្ទាយមានជ័យ ត្រូវបានប្រកាសតែងតាំង ដំឡើងឋាននត្តរស័ក្ដិនិងប្រគល់ភារកិច្ច កាលពីព្រឹកថ្ងៃទី២២ខែសីហាឆ្នាំ២០១៤ ក្រោមអធិបតីភាពឯកឧត្ដម គោស៊ុំ សារឿត អភិបាលនៃគណះអភិបាលខេត្តបន្ទាយមានជ័យ ឯកឧត្ដមឧកញ៉ា អុឹម ភាន់សុផល អភិបាលរងខេត្តមន្ទីអង្គភាព និងមន្ត្រីសាលាខេត្តជាច្រើនរូបចូលរួម។ 
ក្នុងប្រកាសរបស់ក្រសួងមហាផ្ទៃលេខ២៩២៥ប្រ.កអានដោយលោក ណង វុទ្ធី នាយកទីចាត់ការធនធាន មនុស្សត្រូបានតែងតាំងមន្ត្រី២រូប បំពេញក្នុងរចនាសម្ព័ន្ធសាលាខេត្ត ១លោក ចាន់ សារ៉ា ឋានន្តរសក្តិអនុមន្ត្រី ថ្នាក់លេខ៥ ជានាយករងរដ្ឋបាលសាលាខេត្ត ២លោក ហាក់ កុសល់ ឋាននត្តរសក្តិអនុមន្ត្រី ថ្នាក់លេខ១៣ ជាអនុប្រធានការិយាល័យ កិច្ចការច្បាប់និងសុវត្តិភាពសាធារណ: នៃទីចាត់ការអត្តរវិស័យ។ ដំឡើងឋាននត្តរស័ក្តិ លោកស្រី កែវ ច័ន្ទឆាយា ពីឋាននត្តរស័ក្ដិក្រមការ ថ្នាក់លេខ៦ទៅជា ននត្តរស័ក្ដិក្រមការដើមខ្សែ ថ្នាក់លេខ៧ និងតែតាំងជានាយករងរដ្ឋបាលសាលាខេត្ត។ 
និងត្រូវបានប្រគល់ភារកិច្ចជូនមន្ត្រីចំនួន៧រូប បំពេញក្នុងរចនាសម្ព័ន្ធសាលាខេត្តបន្ទាយមានជ័យ។ លោកចាន់ សារ៉ា នាយករងរដ្ឋបាលសាលាខេត្តដែលទើបតែងតាំងថ្មីប្ដេជ្ញាចិត្ត ខិតខំបំពេញការងារ អោយអស់ពីកម្លាំងកាយចិត្ត ស្មារតីបំរើជាតិមាតុភូមិ បង្កើនកិច្ចសហប្រតិបត្តិការ គោរពច្បាប់បទដ្ឋានគតិយត្តិ លក្ខ័ខណការងារ និងទទួលខុត្រូវខ្ពស់ ពង្រឹងសមគ្គីភាពផ្ទៃក្នុង គោរពគោលការណែនាំរបស់ថ្នាក់លើ ពិសេសត្រូវមានគណនេយ្យភាព។ 
ឯកឧត្ដម គោស៊ុំ សារឿត អភិបាលនៃគណះអភិបាលខេត្តបន្ទាយមានជ័យមានប្រសាសន៍ថា:ប្រកាសតែងតាំងដំឡើងឋាននត្តរស័ក្ដិ និងប្រគល់ភារកិច្ចជូនមន្ត្រីរាជការ១០រូបនាពេលនេះ គឺជាការចាំបាច់ និងតម្រូវការបំពេញក្នុងរចនាសម្ព័ន្ធសាលាខេត្តបន្ទាយមានជ័យ សម្រាប់បំពេញភារកិច្ចតាមតួនាទីដែលនៅខ្វះចន្លោះ។ ឯកឧត្ដម គោស៊ុំ សារឿត ណែនាំដល់មន្ត្រីគ្រប់ថ្នាក់ខិតខំថែមទៀតបំពេញ តាមជំនាញដែលរាជរដ្ឋាភិបាលប្រគល់ជូនបានទទួលជោគជ័យ ខិតខំបំរើសេវាសាធារណ:ជូនប្រជាពលរដ្ឋ។ឯកឧត្ដមបានប្រមានផងដែរ ចំពោះមន្ត្រីណា មានឈ្មោះស្ទួនបំរើក្នុងការងាររដ្ឋ មន្ត្រីមិនមកធ្វើការត្រូវកែតម្រូវឡើងវិញ បើមិនដូច្នេះមន្ត្រីទាំងនោះនិងត្រូវទទួលខុសត្រូវដោយខ្លួនឯងចំពោះមុខច្បាប់៕ដោយ: ឃិន គន្ធា
