កំពង់ធំៈ យុទ្ធនាចាក់វ៉ាក់សាំងដល់គោ ក្របី ដើម្បីការពារជំម្ងឺសារទឹក ឆ្លងមកតាមទឹកជំន់ បានជម្រុញឲ្យមានការចាក់២ដំណាក់កាល នៅក្នុងក្រុងស្ទឹងសែន ចំនួន២០០០កំរិត ដើម្បីចាក់វ៉ាក់សាំងការពារជម្ងឺសារ នៅក្នុងសង្កាត់ស្រយូវស្ថិតនៅក្នុងភូមិ ពុកយ៉ុក និងភូមិរការ ក្រុងស្ទឹងសែន ខេត្តកំពង់ធំ ចំនួនគោ ក្របី៦០០ក្បាល នៅព្រឹកថ្ងៃទី ២៣ ខែ សីហា ឆ្នាំ ២០១៤ ។
យោងតាមអនុសាសន៍ របស់រដ្ឋមន្ត្រីក្រសួងកសិកម្ម រុក្ខាប្រម៉ាញ់និងនេសាទបានជម្រុញឲ្យគ្រប់ការិយាល័យបសុព្យាបាល ខេត្ត ក្រុង បើកយុទ្ធនាការចាក់វ៉ាក់សាំង ការពារជម្ងឺឆ្លង ដល់សត្វពាហនៈ គោ ក្របី ដែល អាចនិងមកតាមទឹកជំនន់ ទើបផ្នែកផលិកម្មការិយាល័យបសុព្យាបាលពេទ្យសត្វ ក្រុងស្ទឹងសែន ដែលបានដឹកនាំក្រុមការងារពេទ្យសត្វ ដោយ លោក តាន់ ម៉េងឆាង ប្រធានផ្នែកបស្សុព្យាបាលផលិតកម្មក្រុងស្ទឹងសែនចុះអនុវត្តន៍ចាក់វ៉ាក់សាំងការពារជំងឺឆ្លងគោ ក្របី ជូនប្រជាពលរដ្ឋ ។
លោក តាន់ ម៉េងឆាង ប្រធានផ្នែកផលិតកម្មនិង បសុព្យាបាល ក្រុងស្ទឹងសែន បានមានប្រសាសន៍ថា ជំហ៊ាន ដំបូងបានស្នើរសុំថ្នាំពីការិយាល័យ ផលិតកម្មនិងបសុព្យាបាល ដើម្បីចាក់ការពារជំងឺឆ្លង ចំនួន ២០០០កំរិត និងត្រូវបាននាំយកទៅចាក់ គោលដៅដែលប្រឈម គឺសង្កាត់ស្រយូវ នៅថ្ងៃទី២៣នេះ ដែលមានគោ ក្របីចំនួន ៦០០ក្បាល ចំណែកការ ចាក់វ៉ាក់សាំងនេះ ពុំមានការយកលុយ យកកាក់ពីប្រជាពលរដ្ឋនោះទេ ដោយមានការណែនាំរបស់លោក ធីវ វណ្ណធីរ ប្រធានមន្ទីរកសិកម្មខេត្តកំពង់ធំ និងប្រធាននាយកកដ្ឋាន អាជ្ញាធរខេត្ត បានជម្រុញឲ្យចាក់មុនរដូវ ទឹកឡើងជន់ខាងមុខនេះ និងមានផែនការចាក់វ៉ាក់សាំង ក្នុងក្រុងស្ទឹងសែន ជាង៥០០០ក្បាល។ 
លោក តាន់ ម៉េងឆាង បានអំពាវនាវដល់ម្ចាស់គោ ក្របី ទាំងអស់ ឲ្យដេញគោ ក្របីពីក្រោមមកចាក់វ៉ាក់សាំងការពារជំងឺសារទាំងអស់ និងបានបែងចែកថ្នាំឲ្យពេទ្យសត្វភូមិ ទៅព្យាបាលឲ្យគោ ក្របី ដើម្បីការពារជំម្ងឺអ៊ុតក្តាមដល់ប្រជាពលរដ្ឋ មុនពេលផ្ទុះជម្ងឺនៅពេលមានទឹកជំនន់និងបន្តការចាក់វ៉ាក់សាំង រហូតដល់អស់ថ្នាំដែលមានប្រមាណជាង១ម៉ឺនក្បាល។ 
ប្រជាពលរដ្ឋបានសម្តែងនូវ សេចក្តីត្រេតអរជាខ្លាំង ខណៈពេលដែលមានការយកចិត្តទុកដាក់ថ្នាក់ខេត្ត មន្ទីរកសិកម្ម និងផ្នែកបសុព្យាបាលក្រុងស្ទឹងសែន បានចុះវ៉ាក់សាំងការពារជម្ងឺឆ្លងដល់គោ ក្របីរបស់ពួកគាត់ និងជាប្រវត្តិសាសន៍នៃក្រុងស្ទឹងសែន ដែលបាននាំយកថ្នាំសង្កូវ និងវ៉ាក់សាំងគោ ក្របីជូនប្រជាពលរដ្ឋ ដោយសារកន្លងមក មិនដែលមានការអើពើ ពីសំណាក់ពេទ្យសត្វខេត្ត ក្រុងស្ទឹងសែនឡើយ ទើបបណ្តាលឲ្យគោ ក្របី ឆ្លងជម្ងឺ ជាច្រើនប្រភេទ បង្ករភាពព្រួយបារម្មណ៍របស់ប្រជាកសិករ ។ ផន សុជាតិ
