ខេត្តរតនគិរី ប្រជាពលរដ្ឋ ធ្វើចរាចរណ៏ ដឹកកសិផលឆ្លងកាត់កំណាត់ផ្លូវពីកុងត្រូវត្រួតពិនិត្យ របស់សមត្ថកិច្ចច្រកទ្វាអន្តរជាតិអូរយ៉ាដាវ ខេត្តរតនគិរី រហូតដល់តំរុយបង្គោលឡាក់លេខ៣០ នៅត្រង់ចំណុចសូន្យ គឺតំបន់សរ ព្រំប្រទល់ប្រទេសកម្ពុជា វៀតណាម ។ ដោយមើលឃើញពីការលំបាកនេះ ក្រុមហ៊ុនទ្រី ភាព បានស្នើសុំប្រមុខរាជរដ្ឋាភិបាលកម្ពុជា គឺសម្តេចតេជោសែន ធ្វើការជួសជុលឡើងវិញ តបតាមតំរូវការ និងសំណូមពររបស់ប្រជាពលរដ្ឋ និងអ្នកធ្វើដំណើរទៅមកបានងាយស្រួលនោះ លោកឧកញ្ញ៉ា លាង ច័ន្ទ នាយកក្រុមហ៊ុន ទ្រី ភាព ប្រចាំខេត្តរតនគិរី តំណាងឲ្យក្រុមហ៊ុនទ្រីភាព បាននាំយកគ្រឿងចក្ររបស់ក្រុមហ៊ុន មកជួសជុលកំណាត់ផ្លូវដែលខូចខាតទាំងនេះ ។សកម្មភាពនេះបានធ្វើឡើងនៅរសៀលថ្ងៃទី២៤ ខែសីហា ឆ្នាំ២០១៤ ។
លោកឧកញ្ញ៉ា តំណាងក្រុមហ៊ុនបានមានប្រសាសន៏ថា ដោយមានយល់ព្រមអនុញ្ញាតិ ពីប្រមុខរាជរដ្ឋាភិបាលកម្ពុជា និងឯកភាពភាគីវៀតណាមផងនោះ ក្រុមហ៊ុនបានឲ្យតំណាងរបស់ខ្លួនចុះត្រួតពិនិត្យ នឹងដឹកនាំយកគ្រឿងចក្រមកជួសជុលកំណាត់ផ្លូវនេះ ដើម្បីចូលរួមក្នុងការអភិវឌ្ឍន៏តាមខ្សែបន្ទាត់ព្រំដែនជាមួយរាជរដ្ឋាភិបាលកម្ពុជា ក្នុងការកសាងហេដ្ឋារចនាសម្ព័ន្ធនានា ពិសេសគឺផ្លូវគមនាគមន៏សំរាប់តភ្ជាប់ សំរួលដល់ការទំនាក់ទំនង និងការដឹងជញ្ជូនទំនិញផ្សេងៗ រវាងខេត្តរតនគិរី ប្រទេសកម្ពុជា និងខេត្តយ៉ាឡាយ នៃសាធារណៈរដ្ឋសង្គមនិយមវៀតណាម អោយមានភាពកាន់តែប្រសើរឡើងថែមទៀត ។
លោកឧកញ្ញ៉ា បានមានប្រសាសន៏បន្តថា រាជរដ្ឋាភិបាលបានសម្បទានផ្ទៃដីមួយចំនួនស្ថិតនៅតំបន់ភូមិភាគឦសាន្ត ខេត្តរតនគិរី អោយក្រុមហ៊ុនទ្រីភាព ធ្វើការអភិវឌ្ឍន៏តំបន់នេះ ដែលពីមុនមានសភាពស្ងប់ស្ងាត់ អោយក្លាយជាតំបន់សេដ្ឋកិច្ចពិសេស បំផុសប្រជាពលរដ្ឋឲ្យមករស់នៅតំបន់នេះ ឲ្យកាន់តែច្រើនឡើងថែមទៀត និងបង្កើនការវិនិយោគទុនឲ្យមានសន្ទុះកើនឡើងពីមួយថ្ងៃទៅមួយថ្ងៃ ដើម្បីបង្កើតការងារ និងមុខរបរជូនប្រជាពលរដ្ឋ ឲ្យទទួលបានប្រាក់ចំណុលខ្ពស់ កាត់បន្ថយពលករចំណាកស្រុក ទៅកាន់បរទេស ។
រយៈពេលប៉ុន្មានឆ្នាំចុងក្រោយនេះក្រុមហ៊ុនទ្រីភាពបានធ្វើការអភិវឌ្ឍន៏ នូវសមិទ្ធិផលផ្សេងៗជាច្រើននៅតាមបន្ទាត់ព្រំដែនកម្ពុជា ស្រុកអូរយ៉ាដាវ ជាប់ព្រំប្រទល់វៀតណាម រួមមានកាស៊ីណូ ផែស្ងួត និងផ្សារទំនើប បច្ចុប្បន្នកំពុងកសាងបាន១០០% និងខ្លះបាន៩៥%ហើយ ។ 
