ខេត្តបន្ទាមានជ័យ៖ បន្ទាប់ពីពលរដ្ឋទីទាល់ក្រម្នាក់ស្លាប់ដោយជាន់មីនពេលចូលជីកទំពាំងក្នុងព្រៃឬស្សីនៅព្រំដែនហើយបន្សល់ទុកប្រពន្ធពិការនិងកូនៗគ្មានទីពឹងនោះ លោកស្នងការនគរបាលខេត្តបន្ទាយមានជ័យបានអោយមន្ត្រីនាំអំណោយរបស់លោកនិងរបស់លោកអធិការ
ស្រុកថ្មពួកទៅជូនគ្រួសារជនរងគ្រោះកាលពីថ្ងៃទី ២៥ សីហា។
អំណោយទាំងនោះមានប្រាក់ ៤០០.០០០រៀលអង្ករ ១០០ គីឡូក្រាម ទឹកសុទ្ធ២០ យួរ ទឹកត្រី និងទឹកសុីអីុវ ៦ យួរ ។
លោកយិន នី មន្ត្រីនគរបាលជាតំណាងលោកអាត់ ខែម ស្នងការនគរបាលខេត្តបន្ទាយមានជ័យបាននាំអំណោយសម្បុរសទាំងនោះទៅប្រគល់ដល់ដៃភរិយាពិការស្វិតដៃជើងពីកំណើតនិង កូនៗ៥នាក់ក្នុងបន្ទុកព្រមទាំងញាតិនៃសពសម្រាប់ធ្វើបុណ្យសពជនរងគ្រោះឈ្មោះ ឡូយ កើយ អាយុ៦៧ឆ្នាំ នៅភូមិតាឡី ឃុំគោករមៀតស្រុកថ្មពួក ។
គួររំលឹកថាកាលពីរសៀលថ្ងៃទី២៤ ខែសីហា ឆ្នាំ២០១៤ នៅចំណុចអូរព្រំដែន កម្ពុជា-ថៃ ស្ថិតនៅ ភូមិតាឡី ឃុំគោករមៀត ស្រុកថ្មពួក ខេត្តបន្ទាយមានជ័យជនរងគ្រោះនិងកូនស្រីបាលចូលព្រៃឬស្សីរកជីកទំពាំងឬស្សីមកហូបនិងលក់ដើម្បីប្រជែងនឹងភាពអត់ឃ្លាននិងក្រីក្រ។
ប៉ុន្តែអកុសលដល់គ្រោះគ្របសង្កត់កាយ ជនរងគ្រោះត្រូវជាន់មីនប្រភេទ K58 ផលិតនៅអតីតសហភាពសូវៀត កប់បន្សល់ទុកពីសម័យសង្គ្រាម បណ្តាលអោយផ្ទុះដាច់ជើងម្ខាងនិងអំបែងស្រោចពេញខ្លួនរួចស្លាប់ភ្លាមៗ។ ឯ កូនស្រីដើរចំងាយជាង១០ម៉ែត្រពីឪពុកជាទីស្រឡាញ់របស់ខ្លួនពុំរងគ្រោះ ហើយប្រាប់ដំណឹងទៅផ្ទះ ដើម្បីយកសពមកធ្វើបុណ្យ។
សូមបញ្ជាក់ដែរថា កាលពីអាទិត្យមុនមានពលរដ្ឋម្នាក់បានរងរបួសធ្ងន់ធ្ងរបំ់ផុត ដោយសារបើកត្រាក់ទ័រភ្ជួរដីជាន់មីនតោនផ្ទុះនៅភូមិប្រាសាទត្បែង ឃុំបន្ទាយឆ្មា ស្រុកថ្មពួក ហើយបញ្ជូនទៅសង្គ្រោះព្យាបាលនៅពេទ្យស្រុកតាប្រាយ៉ា ខេត្តស្រះកែវ ប្រទេសថៃ។ ជនរងគ្រោះនៅរស់ តែពិបាកជាងស្លាប់ទៅទៀត។
ភូមិសាស្ត្រខេត្តបន្ទាយមានជ័យនៅមានគ្រាប់មីននិងយុទ្ធភ័ណ្ឌមិនទាន់ផ្ទុះច្រើននិងងាយបង្កគ្រោះថ្នាក់ណាស់ដែលចាំបាច់ត្រូវបន្តកឬអប់រំ ផ្សព្វផ្សាយបង្ការការពារ សង្គ្រោះ និងបោសសម្អាតអោយបានបន្ថែមទៀត៕
