កំពង់ចាម៖ ក្រៅពីដំណាំ ដំឡូងម៉ី នៅមានដំណាំពោតក្រហមដែលប្រជាកសិករក្នុងស្រុកចំការលើតែងនិយមនាំគ្នាដាំជារៀងរាល់ឆ្នាំ ។ ហើយឆ្នាំនេះប្រជាកសិកររបស់យើងប្រមូលផលបានល្អជាងឆ្នាំទៅមិញ ធ្វើឲ្យជីវភាពរបស់បងប្អូនធូរធាប្រសើរឡើង ។
បងប្អូនប្រជាកសិករបានបញ្ជាក់ឲ្យដឹងថា ប្រជាកសិករក្នុងឃុំតាអុង ស្រុកចំការលើ ចំនួន៣០ភាគរយនិយមដាំពោតក្រហម ដំណាំពោតក្រហម គេអាចដាំក្នុង១ឆ្នាំបាន២ដង គេដាំដើមឆ្នាំ គឺខែ៤ ប្រមូលផលក្នុងខែ៨ លើកទី២ដាំក្នុងដើមខែ៩ ប្រមូលផលខែ១២ចុងឆ្នាំ។ ការដាំនៅពេលដាក់គ្រាប់ពូជដល់ដី កសិករត្រូវប្រជីទ្រាប់បាត ប្រភេទជី (ក្បាលក្របី) ពេលវាលូតលាស់ឡើង ត្រូវប្រើជីបំប៉នដើមផ្លែ ប្រើជីអ៊ីរ៉េ បូកផ្សំនិងបច្ចេកទេសជម្រាស់យកជើង ស្មៅចេញ មានថ្នាំការពារដង្កូវស៊ីស្លឹក ដើមផងដែរ ។ 
ហើយឆ្នាំនេះមានអំណោយផលល្អ ពីធម្មជាតិមានភ្លៀងធ្លាក់ជាញឹកញាប់ ជាងឆ្នាំទៅមិញទៀតផងនោះ កសិករយើងទទួលផល ក្នុង១ហិចតា មិនក្រោម១០តោននោះទេ ហើយហាងឆេងទីផ្សារវិញក៏បានតម្លៃខ្ពស់ជាងឆ្នាំទៅដែរ ឆ្នាំទៅដើមឆ្នាំតម្លៃជាង៣០០រៀល ឆ្នាំនេះតម្លៃជាង៥០០រៀល ជាហេតុធ្វើឲ្យកសិករយើងមានជីវភាពប្រសើរឡើង ៕
