រាជធានីភ្នំពេញ ៖ ប្តី-ប្រពន្ធ ជនជាតិចិនមួយគូបានចាក់សោទុកកូនប្រុសអាយុ៩ឆ្នាំម្នាក់ឱ្យនៅក្នុងផ្ទះម្នាក់ឯងពេញមួយថ្ងៃ បង្កការភ្ញាកផ្អើលដល់ប្រជាពលរដ្ឋរស់នៅក្បែរខាង ខណៈក្មេងប្រុសនោះយំឃ្លានអាហារ ហើយប្រជាពលរដ្ឋបានធ្វើសេចក្តីរាយការណ៍ទៅសមត្ថកិច្ចចុះមកពិនិត្យភ្លាមៗ
តែម្តង ។ ហេតុការណ៍នេះបានកើតឡើងកាលពីវេលាម៉ោង ៨យប់ថ្ងៃ ទី ៧ កញ្ញា ២០១៤ នៅក្នុងបុរីញូវ ថោន ស្ថិតក្នុងភូមិក្បាលដំរី សង្កាត់កាកាប ខណ្ឌពោធិ៍សែនជ័យ ។
បើតាមប្រភពព័ត៌មានពីប្រជាពលរដ្ឋដែលរស់នៅក្បែរខាងផ្ទះកើតហេតុបានឱ្យដឹងថា មុននិងមានការភ្ញាក់ផ្អើលគាត់បានឭសម្លេង ក្មេងប្រុសដែលម្តាយឳពុកចាក់សោទុកក្នុងផ្ទះស្រែកយំទំនងជាឃ្លានបាយ ចំនី ពេលនោះក៏បានទៅមើលដល់មុខផ្ទះ ។ ពេលនោះពួកគាត់ក៏បានទាក់ទងទៅកាន់សមត្ថកិច្ចមូលដ្ឋានដើម្បី ជួយអន្តរាគមន៍ ។ ភ្លាមៗនោះសមត្ថកិច្ចមូលដ្ឋានបានចុះមកដល់ក៏ឃើញថាក្មេងប្រុសខាងលើ ត្រូវឪពុក ម្តាយចាក់សោទុកឱ្យនៅក្នុងផ្ទះម្នាក់ឯង មែន ឃើញដូច្នេះក៏ធ្វើការទាក់ទងទៅឪពុកម្តាយ ដើម្បីចាក់សោរយកក្មេងចេញមកវិញ។
ដោយឡែកប្រភពព័ត៌មានពីបុរសជាឪពុកក្មេងប្រុសដែលត្រូវនៅក្នុងផ្ទះម្នាក់ឯងនោះបានរៀបរាប់ថាកូនប្រុសរបស់គាត់ខូចណាស់ ថ្ងៃសៅរ៍ម្សិលមិញដើរបាត់ពីផ្ទះពេញមួយថ្ងៃ ទើបថ្ងៃអាទិត្យនេះរូបគាត់បានចាក់សោគេទុកចោលព្រោះខ្លាចគេដើរទៀត ។ ហើយការធ្វើរបៀបនេះគឺជាទន្លាប់សម្រាប់ក្រុមគ្រួសាគាត់ទៅហើយ ហើយក្នុងនោះគាត់ក៏បានបង្អត់អាហារកូនដែរគឺអាហារមានច្រើននៅក្នុងផ្ទះសម្រាប់ញាំ។
ក្រោយពេលកើតហេតុសមត្ថកិច្ចបានប្រាប់ទៅបុរសជនជាតិចិនជាឪពុកថាកុំទុកកូនក្នុងផ្ទះចាក់សោចោលទៀតព្រោះខុសច្បាប់ និងខ្លាចក្រែងមានបញ្ហាកើតឡើងដូចជាភ្លើងឆេះផ្ទះជាដើម ។បន្ទាប់មកសមត្ថកិច្ចក៏បានត្រឡប់ទៅកន្លែងគោលដៅអស់ទៅ៕