ភ្នំពេញ៖ មានប្រិយមិត្តជាច្រើន បានឆ្ងល់ថា តើ ឈុន សុវណ្ណភក្តី ចាហ្វាងផលិតកម្ម BKS ជានរណា ? មានប្រវត្តិសិក្សាលើបទភ្លេង យ៉ាងម៉េចដែរ ទើបអាចបង្កើតសាច់ភ្លេងជាស្នាដៃកូនខ្មែរ បានយ៉ាងល្អដូចនេះ ? មួយប្រាវរបស់ ផលិតកម្ម BKS ដែលចេញផ្សាយ លើអនឡាញ ជាស្នាដៃនិពន្ធបទភ្លេងកូនខ្មែរ ដោយប្រកាន់គោលជំហរមិនចម្លងពីគេនោះ បានធ្វើឲ្យផលិតម្មមួយនេះ មានមុខគួរសម ក្នុងសង្វាក់ឧស្សាហកម្មសិល្បៈ ។ "
ខាងផលិតកម្ម BKS មិនមែនជាផលិតកម្ម ដែលចម្លងបទពីបរទេសឡើយ ហើយរាល់បទ ចម្រៀងនៅផលិតកម្ម មួយនេះ បើមិនបានធ្វើខ្លួនឯងគឺមិនអស់ចិត្ត ព្រោះថាអ្នកស្តាប់ភាគច្រើនគាត់ដឹងណាស់ ជាពិសេសអ្នកលេងបណ្តាញសង្គមហ្វេសប៊ុក តែម្តង ធ្វើស្រួលមិនស្រួលប្រាកដជាគាត់យកទៅរិះគន់ជាមិនខាន" ។ នេះបើតាមសម្តីរបស់ ឈុន សុវណ្ណភក្តី បានប្រាប់អ្នកយកព័ត៌មានយើង កាលពីព្រឹកមិញនេះ ។
តារាចម្រៀង និង ចាហ្វាងវ័យ ១៨ ឆ្នាំរូបនេះបានបន្តថា "ដើមចម ដែលធ្វើឲ្យខ្ញុំអាចបង្កើតបទភ្លេងថ្មីបាន បើនិយាយទៅមានប្រិយមិត្តជាច្រើនថាខ្ញុំអួត តែវាជារឿងពិត ដោយដើមទី ខ្ញុំបានទៅស្ទីតយ៉ូ មួយកន្លែង ហើយ រើសបានក្រដាស់ ណូតភ្លេង ដែលគេបោះចោលក្នុងធុងសំរាមទៅហើយយកមកទុកមើល ហើយក៏រៀនបទភ្លេងខ្លួនឯង ។ ដោយចំណង់ចំណូលចិត្តចូលចិត្តអ្វីដែលថ្មីៗ ហើយក៏មិនចូលចិត្តរៀនសាច់ភ្លេងពីគេដែលមានស្រាប់ ខ្លួនក៏បានបង្កើតសាច់ភ្លេងថ្មីៗ ដោយព្យាយាមគិតលើណូតភ្លេង និងឈានជើងចូលវិថីសិល្បៈតែម្តង " ។
ក្នុងចំណោមម្ចាស់ផលិតកម្ម ក្នុងស្រុកជាច្រើន ដែលមានអាយុ ខ្លះ ៣០ និង ៤០ ឆ្នាំទៅហើយនោះ មានតែ ឈុន សុវណ្ណភក្តី មួយគត ដែលមានអាយុក្មេងជាងគេ ត្រឹមតែ ១៨ ឆ្នាំ បានបន្តជីវិតដ៏កំសត់របស់ខ្លួនមុនឈានជើងចូលសិល្បៈ ថា "ដោយសារតែចិត្តស្រលាញ់សិល្បៈ ខ្លួនបានលួចរៀនសាច់ភ្លេងដោយខ្លួនឯង ហើយឧបករណ៍ដែលបង្កើតសាច់ភ្លេងទាំងនោះ ត្រូវបាន ឪពុករបស់ខ្លួន យកកម្រេចចោលម្តងហើយម្តងទៀត ដោយហាមមិនឲ្យដើរលើវិថីនេះ ។ ក៏ប៉ុន្តែនៅទីបំផុត ដោយលោក យល់ពីអារម្មណ៍របស់ខ្ញុំ ក៏បានអនុញ្ញាតិឲ្យបន្តលើមាគ៌ានេះតែម្តងទៅ " ។
ក្រៅពីការធ្វើសាច់ភ្លេង និងនិពន្ធទំនុកច្រៀង ឈុន សុវណ្ណភក្តី ក៏មានជំនាញខាងគ្រប់គ្រងលើ ស្ទីតយ៉ូ ក្នុងការថតសំលេង ក៏កាត់តជាដើម។ ជាចុងក្រោយ ភក្តី បានបញ្ជាក់ថា "ជាមួយនឹងរឿងខាងលើដ៏ជូរចត់មុនឈានជើងចូលសិល្បៈនេះ ខ្លួនក៏គ្រោងនឹងចេញបទចម្រៀង ដែលនិយាយអំពីជីវិតពិតរបស់ខ្លួន ក្រោមចំណងជើងថា "ជីវិតដ៏សែនលំបាកលើវិថីសិល្បៈ" ត្រៀមចេញវ៉ុល ១ តែម្តង បើសិនជាធ្វើទាន់ "៕
