ខេត្តព្រះសីហនុ ជាតំបន់មាត់សមុទ្រទទួលរងសម្ពាធទាប ធ្វើអោយមានភ្លៀងធ្លាក់ជាច្រើនថ្ងៃជាប់ៗ ជាពិសេសកាលពីយប់ថ្ងៃទី០៧ ឈានចូលរថ្ងៃទី០៨ ខែកញ្ញា ឆ្នាំ២០១៤ នេះ បានបណ្តាលអោយផ្លូវមួយចំនួននៅក្នុងខេត្ត មានការលិចលង់ជាច្រើនកន្លែង ក្នុងនោះតិរៈវិថីសម្តេច ហ៊ុន សែន
នៅត្រង់ចំណុចចន្លោះបង្គោលគីឡូម៉ែត្រលេខ ២៧ – ២៨ ស្ថិតនៅក្នុងភូមិ ៤ ឃុំអូរត្រេះ ស្រុកស្ទឹងហាវ ខេត្តព្រះសីហនុ ត្រូវទទួលរងការខូចខាតដោយសារទឹកជំនន់ជនលិចកាត់ផ្តាច់ផ្លូវទាំងស្រុង កាលពីវេលាម៉ោងប្រមាណជា ២ ទៅ ៣ ជិតភ្លឺ យប់ថ្ងៃទីអាទិត្យទី ៧ ឈានចូលទី៨ ខែ កញ្ញា ឆ្នាំ ២០១៤ ។ ភ្លៀងបានបង្អោរធ្លាក់គំហុកយ៉ាងខ្លាំងរហូតមកដល់ថ្ងៃចន្ទទី ៨ ខែ កញ្ញា ឆ្នាំ ២០១៤ វេលាម៉ោង ៩ និង ៥៥នាទី មហាតិរៈវិថីសម្តេចហ៊ុន សែន ត្រង់ចំណុចខាងលើត្រូវបានអាជ្ញាធរ មានសមត្ថកិច្ច មិនអោយធ្វើចរាចរឆ្លងកាត់ទាំងស្រុង ។
អាជ្ញាធរខេត្តព្រះសីហនុ បានដាក់បទបញ្ជាដល់មន្ទីរសាធារណៈការ និង ដឹកជញ្ជូនខេត្ត អោយត្រៀមលក្ខណៈនូវគ្រឿងចក្រ និងមធ្យោបាយផ្សេងៗ ដើម្បីរង់ចាំភ្លៀងរាំង និង ចាប់ផ្តើមធ្វើការជួសជុលផ្លូវខាងលើនេះ អោយបានលឿនបំផុត មិនអោយមានការរាំស្ទះដល់ការធ្វើចរាចរ របស់ប្រជាពលរដ្ឋ នៅក្នុងមូលដ្ឋាន ក៏ដូចជាការដឹកជញ្ជូនទំនិញឆ្លងកាត់ ព្រោះផ្លូវតិរះវិថីសម្តេចហ៊ុន សែន ជាផ្លូវសេដ្ឋកិច្ចមួយយ៉ាងសំខាន់ក្នុងការដឹកជញ្ជូនសម្ភារះទៅកាន់បណ្តាខេត្ត និងរាជធានីភ្នំពេញ ពេសេសអ្នកធ្វើដំណើរឆ្លងកាត់ពីខេត្តព្រះសីហនុ ទៅកាន់ស្រុកស្ទឹងហាវ ។
លោកស្រី ម៉េង យាន អាយុ ៦៥ឆ្នាំ ជាអាជីវកររស់នៅក្នុងឃុំអូរត្រេះស្រុកស្ទឹងហាវ ខេត្តព្រះសីហនុ បានមានចំណាប់អារម្មណ និងសំណូមពរយ៉ាងឲ្យអាជ្ញាធរជួយជួសជុលកំណាត់ផ្លូវមួយខ្សែនេះបានបានឆាប់ ព្រោះផ្លូវនេះជាផ្លូវសេដ្ឋកិច្ចមួយក្នុងការប្រកបអាជីវកម្មផ្សេងៗ ក៌ដូចជាការធ្វើចរាចរណ៌របស់ប្រជាពលរដ្ឋ ក៌ដូចជាភ្ញៀវទេសចរណ៌ជាតិ និងអន្តរជាតិផងដែរ ។
សូមបញ្ជាក់ថា ជំនន់ទឹកភ្លៀងនេះ ពុំមានបណ្តាលរងគ្រោះដល់អាយុជីវិតមនុស្សឡើយ តែបានធ្វើអោយមានការប៉ះពាល់ដល់ហេដ្ឋារចនាសម្ពន្ធ័នានាក្នុងខេត្ត និងការធ្វើអាជីវកម្ម របស់ប្រជាពលរដ្ឋក្នុងខេត្តព្រះសីហនុ ៕