កំពង់ធំៈ ពិធីប្រកាសប្រធានមន្ទីររ៉ែ និងថាមពល ខេត្តកំពង់ធំ ត្រូវបានអញ្ជើញចូលរួម ជាអធិបតីភាព ឯកឧត្តម ឌិត ទីណា រដ្ឋលេខាធិការក្រសួងរ៉ែ និងថាមពល និងឯកឧត្តម គង់ វិមាន អភិបាលរងខេត្តកំពង់ធំ តំណាងដ៏ខ្ពង់ខ្ពស់ឯកឧត្តម អ៊ុត សំអន អភិបាលខេត្តកំពង់ធំ និងប្រធាន អនុប្រធាន កងកម្លាំងប្រដាប់អាវុធចូលរួម កាលពីថ្ងៃទី ១០ ខែ កញ្ញា ឆ្នាំ ២០១៤នៅសាលប្រជុំសាលាខេត្តកំពង់ធំ ។ 
លោក ណឹម ចាន់ថា ត្រូវបានប្រមុខរាជរដ្ឋាភិបាល និងថ្នាក់ដឹកនាំខេត្តមានទំនុក និងមានការជឿជាក់ ពីការខិតខំប្រឹងប្រែង អនុវត្តន៍ការងារកន្លងមក ទើបត្រូវបានតែងតាំងជាប្រធានមន្ទីររ៉ែ និងថាមពលខេត្តកំពង់ធំ ដែលត្រូវបានបំបែកចេញពី មន្ទីរឧស្សាហកម្ម រ៉ែ និងថាមពល។ 
លោក ណឹម ចាន់ថា ប្រធានមន្ទីររ៉ែ និងថាមពលដែលទើបតែបានតែងតាំងថ្មី បានប្តេជ្ញាចិត្ត ចូលរួមអនុវត្តន៍ គោលនយោបាយ យុទ្ធសាស្ត្រ ចតុកោណ ដំណាក់កាលទី៣ និងកំណែទម្រង់ស៊ីជម្រៅលើគ្រប់វិស័យ របស់រាជរដ្ឋាភិបាលកម្ពុជា អណ្ណត្តិទី៥ នៃរដ្ឋសភា ដោយឈរលើស្មារតីទទួលខុសត្រូវខ្ពស់ ក្នុងការបំពេញភារកិច្ច នៅក្នុងវិស័យរ៉ែនិងថាមពល 
ឲ្យទទួលបានលទ្ធផលល្អប្រសើរ អនុវត្តន៍ផែនការយុទ្ធសាស្ត្ររបស់ក្រសួង រ៉ែនិងថាមពល ក្នុងការស្វែងរកអ្នកវិនិយោគធនធានរ៉ែ និងអគ្គីសនីឲ្យអស់ពីលទ្ធភាព អនុវត្តន៍រាល់ការងារ ដែលខេត្តប្រគល់ឲ្យ ព្រមទាំងសហការជាមួយមន្ទីរ និងអង្គភាពជុំវិញខេត្ត ដើម្បីថែរក្សាសាមគ្គីផ្ទៃក្នុង បម្រើសេវាសាធារណៈជូនប្រជាពលរដ្ឋ និងខិតខំកសាងខ្លួន ពង្រឹងអង្គភាពឲ្យមានគុណភាព តម្លាភាព ដើម្បីបម្រើប្រជាពលរដ្ឋ ។
ឯកឧត្តម គង់ វិមាន អភិបាលរងខេត្តកំពង់ធំ បានមានប្រសាសន៍ ស្វាមគមន៍ចំពោះឯកឧត្តរដ្ឋលេខាធិការ ដែលបានអញ្ជើញជាអធិបតីភាព ក្នុងពិធីប្រកាសប្រគល់តួនាទីភារកិច្ច ជូនលោក ណឹម ចាន់ថា ប្រធានមន្ទីរថ្មី ដែលរដ្ឋមន្ត្រីក្រសួងរ៉ែនិងថាមពល បានមានទំនុកចិត្ត ប្រគល់តួនាទីនិងភារៈកិច្ចជូន និងសូមឲ្យមានការខិតខំប្រឹងប្រែងយកចិត្តទុកដាក់ អនុវត្តន៍តួនាទីភារកិច្ចក្នុងវិស័យរ៉ែនិងថាមពលក្នុងខេត្តកំពង់ធំ និងសូមឲ្យ រក្សានូវចំណងសាមគ្គីភាព ផ្ទៃក្នុងបែងចែកតួនាទីភារៈកិច្ចឲ្យមានភាពច្បាស់លាស់ ដើម្បីភាពជោគជ័យក្នុង ការងារ ។ 
ឯកឧត្តម ឌិត ទីណា រដ្ឋលេខាធិការក្រសួងរ៉ែ និងថាមពល បានមានប្រសាសន៍ផ្តាំផ្ញើរ ដល់ប្រធានមន្ទីរថ្មី ឲ្យមានការយកចិត្តទុកដាក់ ខិតខំបំរើអង្គភាពដោយភាពស្មោះត្រង់ ដោយរាជរដ្ឋាភិបាលដែលទើបតែបង្កើតថ្មី ដែលដឹកនាំដោយសម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា បានសម្រេចផ្តល់អដ្ឋិភាពដល់ក្រសួងរ៉ែនិងថាមពល បំបែកជាពីដោយសារតែវិស័យរ៉ែនិងថាមពលមានសក្កា នុពលធំ ការងារក៏ច្រើន ចំណែកអាជ្ញាធរប្រេងកាតត្រូវបានលុបចោល រីឯការងារគឺអនុវត្តន៍ដូចធម្មតា ព្រមទាំងបានកោតសរសើរចំពោះប្រធានមន្ទីរថ្មី ដែលធ្លាប់មានបទពិសោធន៍ ៧ឆ្នាំ ទាំងការងាររ៉ែ និងអគ្គីសនី ។ 
