នៅទីបញ្ជាការដ្ឋានតំបន់ប្រតិបត្តិការសឹករងសៀមរាប នាព្រឹកថ្ងៃទី ២៤ ខែ កុម្ភះ ឆ្នាំ២០១៤នេះ មានបើកអង្គ សន្និបាតបូកសរុបលទ្ធផលការងារយោធា ឆ្នាំ២០១៣ និង លើកទិសដៅការងារយោធាឆ្នាំ២០១៤ ក្រោមអធិបតីភាពឯ.ឧ ឃឹម ប៊ុនសុង ប្រធានគណៈបញ្ជាការឯកភាពរដ្ឋបាលខេត្ត និង ជាអភិបាលនៃគណៈអភិបាលខេត្តសៀមរាប ឯកឧត្តមឧត្តមសេនីយ៍ទោ សៅ សុជាតិ មេបញ្ជាការរងយោធភូមិភាគទី៤ ដោយមានការអញ្ជើញចូលរួមពី បណ្តាអស់លោក លោកស្រីជាមេបញ្ជាការរងកងពល កងរាជអាវុធហត្ថខេត្ត ស្នងការរងខេត្ត និង មេបញ្ជាការ បញ្ជាការរង នាយទាហាន នាយទាហានរង កងឯកភាពចំណុះតំបន់ប្រតិបត្តិការសឹករងសៀមរាបផងដែរ ។
បន្ទាប់ពីលោកឧត្តមសេនីយ៍ត្រី គង់ សី មេបញ្ជាការតំបន់ប្រតិបត្តិការសឹករងសៀមរាប ធ្វើកិច្ចស្វាគមន៍និង បើក អង្គសន្និបាតរួចមក លោកវរៈសេនីយ៍ទោ គង់ ឃួន នាយការិយាល័យទី៣ នៃតំបន់ប្រតិបត្តិការសឹករងសៀមរាប បានធ្វើសេចក្តី រាយការណ៍បូកសរុបពីលទ្ធផលការងារយោធា ដែលអង្គភាពតំបន់ប្រតិបត្តិការសឹករងសៀមរាប អនុវត្តបានក្នុងឆ្នាំ ២០១៣កន្លងមក ក្នុងនោះដែរលោកវរៈសេនីយ៍ឯក ស៊ិន ភាត់ មេបញ្ជាការរង ជានាយសេនាធិការតំបន់ប្រតិបត្តិការសឹករងសៀមរាប បានលើកនូវទិសដៅសម្រាប់អនុវត្តបន្តការងារយោធា ឆ្នាំ២០១៤ផងដែរ ។
ក្នុងនោះដែរក៏មានការឡើងធ្វើបទអន្តរាគមន៍របស់លោកមេបញ្ជាការវរៈសេនាតូចការពារព្រំដែនលេខ៤០៨ និង បញ្ជាការផ្នែកសឹករងស្រុកស្វាយលើ ស្តីពីសកម្មភាពគ្រប់គ្រងនៃការហ្វឹកហ្វឺន បណ្តុះបណ្តាល បង្កើនសមត្ថភាព ដល់នាយទាហាន ពលទាហាន និង ការគ្រប់គ្រងកងកម្លាំង អាវុធជាតិផ្ទុះ ការងារសន្តិសុខ ព្រមទាំងការងារបង្ក បង្កើនផល ចិញ្ចឹមសត្វ និង កសាងអង្គភាពផងដែរ ។
ឱកាសនៅដែរលោកឧត្តមសេនីយ៍ត្រី គង់ សី ក៏បានធ្វើការបំពេញបន្ថែមទៅលើទិសដៅមួយចំនួន ព្រមទាំងបានផ្តល់នូវគំនិតយោបល់ល្អៗ ផែនការមួយចំនួន ដើម្បីជាទុនសម្រាប់បណ្តាកងឯកភាពចំណុះតំបន់ប្រតិបត្តិ ការសឹងរងសៀមរាប សម្រាប់យកទៅអនុវត្តនៅតាមអង្គភាពទទួលបានជោគជ័យ ។
មានប្រសាសន៍ក្នុងអង្គសន្និបាតនោះ ឯ.ឧ ឃឹម ប៊ុនសុង អភិបាលនៃគណៈអភិបាលខេត្ត និង ឯកឧត្តមឧត្តមសេនីយ៍ទោ សៅ សុជាតិ មេបញ្ជាការរងយោធភូមិភាគទី៤ ក៏បានធ្វើការ ឯកភាពទៅលើលទ្ធផលការងារយោធាដែលទទួលបានក្នុងឆ្នាំ២០១៣ និង ទិសដៅអនុវត្តបន្តឆ្នាំ២០១៤ ព្រមទាំងបានផ្តល់នូវបទពិសោធន៍ និង អនុសាសន៍ វិធានការល្អៗមួយចំនួន ក្នុងការដឹកនាំបញ្ជា ដល់កងកម្លាំងឯកភាព ចំណុះតំបន់ប្រតិបត្តិការសឹករងសៀមរាប សំដៅធ្វើឲ្យអង្គភាពទាំងមូល អនុវត្តលើការបំពេញភារកិច្ចស្នូល សម្រេច បានជោគជ័យ ដែលក្រសួងការពារជាតិ និង រាជរដ្ឋាភិបាលប្រគល់ជូន ។
ឯ.ឧ ឃឹម ប៊ុនសុង និង ឯកឧត្តមឧត្តមសេនីយ៍ទោ សៅ សុជាតិ ក៏បានកោតសរសើរផងដែរ ពីកិច្ចសហការចូលរួមរបស់កងកម្លាំងតំបន់ប្រតិបត្តិការសឹករងខេត្ត នាឆ្នាំ២០១៣ កម្ពុជាក្នុងនាមជាម្ចាស់ផ្ទះ នៃកិច្ចប្រជុំកំពូលអាស៊ាន ដោយរៀបចំការងារជាច្រើន ហើយដោយឡែក សម្រាប់ខេត្តសៀមរាប អាជ្ញាធរខេត្ត កងកម្លាំងប្រដាប់អាវុធគ្រប់លំដាប់ថ្ឋាក់ បានរៀបចំទទួលស្វាគមន៍ ចំពោះថ្នាក់ ដឹកនាំកំពូលៗនៃប្រទេសសមាជិកអាស៊ាន និង ប្រទេសមហាអំណាចដទៃទៀត ធ្វើកិច្ចប្រជុំ និង ទស្សនៈកិច្ចនៅក្នុងតំបន់ប្រវត្តិសាស្ត្រនៃខេត្តសៀមរាប ។
ម្យ៉ាងទៀតនេះគឺជាសក្ខីភាពដែលឆ្លុះបញ្ចាំងកាន់តែប្រត្យក្ស នូវដំណើរឆ្ពោះទៅការពង្រឹង នូវស្វាយភាពម្ចាស់ការ លើការកសាងកម្លាំងស្នូល និង ពង្រីកពង្រឹងសមត្ថភាពប្រយុទ្ធ ការបំពាក់បំប៉នអប់រំចិត្តសាស្ត្រ យុទ្ធសាស្ត្រ ក្នុងការឆ្លើយតបប្រកបដោយប្រសិទ្ធិភាពខ្ពស់ រាល់ការប៉ុងប៉ងមហិច្ចតាឈ្លានពាន របស់បច្ចាមិត្តបរទេស ។ ម្យ៉ាងទៀតកម្លាំងយុទ្ធជនជាសសរទ្រូងនៃប្រទេស ក្នុងការការពារកសាង ការអភិវឌ្ឍន៍ប្រទេសជាតិ ដូច្នេះកម្លាំងត្រូវតែជាធនធានមួយ ប្រកបដោយសក្តានុពល កាយ សម្បទាល្អមាំមួន មានក្រមសីលធម៌ សេចក្តីថ្លៃថ្នូរ និង ម៉ឺងម៉ាត់ ។
ឯកឧត្តមទាំងពីរ ក៏បានលើកនូវបទបញ្ជារបស់ប្រមុខរាជរដ្ឋាភិបាល ក្រោមការដឹកនាំ ផ្ទាល់របស់សម្តេចតេជោ ហ៊ុន សែន នាយករដ្ឋមន្ត្រី លើការកំណែទម្រង់ផ្សេងៗ ដើម្បី ជម្រុញនឹងលើកម្ពស់កំណើន សេដ្ឋកិច្ចជាតិ ក្នុងការកាត់បន្ថយភាពក្រីក្រ និង ការកំណែទម្រង់កងយោធពលខេមរភូមិន្ទ៍ គឺធ្វើឲ្យស្ថានភាព គុណភាព និង ត្រៀមលក្ខណៈខ្ពស់ ។ ក្នុងនោះដែរឯ.ឧ ឃឹម ប៊ុនសុង ឯកឧត្តមឧត្តមសេនីយ៍ទោ សៅ សុជាតិ ក៏លើកឡើងផងដែរ អំពីស្ថានភាព សភាពការណ៍សន្តិសុខតាមបន្ទាត់ព្រំដែនកម្ពុជា ថៃ នៃទិសរបស់យោធភូមិភាគទី៤គ្រប់គ្រងផងដែរ ។
ឯកឧត្តមក៏បានធ្វើការផ្តាំផ្ញើដល់មេបញ្ជាការ មេបញ្ជាការរង នៃកងឯកភាពចំណុះតំបន់ប្រតិបត្តិការសឹករងសៀមរាប ត្រូវគោរពឲ្យបានល្អ ពីអង្គការវិន័យកងទ័ព មានការសាមគ្គីផ្ទៃក្នុងល្អ ព្រមទាំងបង្កើនការហ្វឹកហ្វឺន បណ្តុះបណ្តាល បង្កើនសមត្ថភាពយល់ដឹង ពីយុទ្ធវិធី យុទ្ធសាស្ត្ររបស់កងទ័ព ដើម្បីបង្កើនគុណភាព ក្នុងជួរកងទ័ព ជាសម្ខាន់ការ គ្រប់គ្រងកងកម្លាំង គ្រឿងសម្ភារៈបំពាក់ និង បរិក្ខារបស់កងទ័ព និង កសាង
អង្គភាព ការបង្កបង្កើនផល ចិញ្ចឹមសត្វ ក្នុងការដោះស្រាយជីវភាពទ័ព និង គ្រួសារទ័ព ព្រមទាំងចូលរួមសហការជាមួយអាជ្ញាធរមូលដ្ឋាន អនុវត្តនូវគោលនយោបាយភូមិ ឃុំ មានសុវត្ថិភាព ក្នុងការរក្សាសុវត្ថិភាព សន្តិសុខជូនប្រជាជន ក្នុងមូលដ្ឋានអង្គភាពឈរជើង សម្ខាន់ក្នុងពេលបោះឆ្នោតអសកល ក្នុងការជ្រើសរើសក្រុមប្រឹក្សារាជធានី ខេត្ត ក្រុង ស្រុក ខ័ណ្ឌ នៅ ពេលខាងមុខផងដែរ ។
ក្នុងនោះដែរក៏មានធ្វើការប្រគល់ ប័ណ្ណសរសើរ និង លិខិតសរសើរ របស់អគ្គបញ្ជាការដ្ឋានកងទ័ពជើងគោក ដល់ បុគ្គល ៣៥រូប ដែលមានស្នាដៃក្នុងការបំពេញភារកិច្ចស្នូលប្រចាំឆ្នាំ២០១៣ របស់កងឯកភាពចំណុះតំបន់ប្រតិបត្តិការសឹករងសៀមរាប ។
ក្នុងនោះដែរឯ.ឧ ឃឹម ប៊ុនសុង ក៏បាននាំយកនូវថវិកា របស់រដ្ឋបាលសាលាខេត្ត ចំនួន ០៣លានរៀល និង ឯកឧត្តមឧត្តមសេនីយ៍ទោ សៅ សុជាតិ ក៏បាននាំយកថវិកា របស់មេបញ្ជាការយោធភូមិភាគទី៤ចំនួន ១លានរៀល និង កងពលធំអន្តរាគមន៍លេខ២ ចំនួន១០០ដុល្លា ឧបត្ថម្ភដល់អង្គសន្និបាតសម្រាប់យកទៅបម្រើការប្រើប្រាស់ក្នុងពិធីនេះ ព្រមទាំងប្រគល់នូវគ្រាប់ពូជ គោពូជ ធុងបាញ់ថ្នាំកសិកម្ម និង មុងជ្រលុកថ្នាំ ចំនួន ៤១៥មុង ដល់កងឯកភាពចំណុះទីបញ្ជាការតំបន់ប្រតិបត្តិការសឹករង សៀមរាបផងដែរ ៕