កំពង់ចាម: ឯកឧត្តម អ៊ុន ចាន់ដា អភិបាលខេត្តកំពង់ចាម នាព្រឹកថ្ងៃទី១៧ ខែមិថុនា ឆ្នាំ២០២២នេះ បានជម្រុញដល់ក្រុមការងារបច្ចេកទេសឲ្យពន្លឿនការសាងសង់វិមានឯករាជ្យ ធ្វើយ៉ាងណាឲ្យបានរួចរាល់ មុនថ្ងៃទី៩ វិច្ឆិកា ២០២២ ខណៈដែលការស្ថាបនាសម្រេចបានប្រមាណជាង៥០%ហេីយនោះ ។
ឯកឧត្តម អ៊ុន ចាន់ដា អភិបាលខេត្តកំពង់ចាម បានថ្លែងថា ការរៀបចំសាងសង់វិមានឯករាជ្យ ស្ថិតនៅក្នុង ភូមិទី៦ សង្កាត់វាលវង់ ក្រុងកំពង់ចាម នេះ គឺអាជ្ញាធរខេត្តមានបំណងទុកជាសម្បត្តិវប្បធម៌ទេសចរណ៍ ប្រវត្តិសាស្ត្រ និងលេីកកម្ពស់សោភ័ណ្ឌភាពទីក្រុង សំដៅទៅលើ ខួបកំណើតនៃកងយុទ្ធពលខេមរភូមិន ដែលជាស្នាមព្រហស្ថ របស់ព្រះរមរតនកោដ្ឋ ព្រះបាទ នរោត្ដម សីហនុ ដែលព្រះអង្គបានដណ្ដើមឯករាជ្យ ពីអាណានិគមបារាំង នៅថ្ងៃទី៩ ខែវិច្ឆិកា ឆ្នាំ១៩៥៣ ។
គួររំលឹកថា ទីតាំងដែលឯកឧត្តមអភិបាលខេត្ត សម្រេចសាងសង់វិមានឯករាជ្យនេះ គឺនៅចំណុចផ្លូវកៅស៊ូមាត់ច្រកចូលទៅសាលាគរុកោសល្យខេត្តកំពង់ចាម ដោយចំណុចនេះ ឯកឧត្តមអភិបាលខេត្ត បានណែនាំឲ្យមន្ត្រីជំនាញពាក់ព័ន្ធ សាងសង់ពង្រីកផ្លូវជាតិឲ្យបានធំទូលាយ ចាប់ពីចំណុចនាគព័ន្ធ រហូតមកដល់ចំណុចទន្លេអុំ ដើម្បីបង្កើនសោភ័ណភាព នៃចំណុចវិមានឯករាជ្យ ឲ្យក្លាយទៅជាកន្លែងទេសចរណ៍ សម្រាប់ប្រជាពលរដ្ឋ មកកម្សាន្តផងដែរ ។
គួរបញ្ជាក់ថា បន្ទាប់ពីបានពិនិត្យការសាងសង់វិមានឯករាជ្យខាងលើរួច ឯកឧត្តមអភិបាលខេត្ត ក៏បានដឹកនាំក្រុមការងារ អញ្ជើញចុះពិនិត្យការដ្ឋានសាងសង់អាគារពហុបំណងសហភាពសហព័ន្ធយុវជនកម្ពុជា ខេត្តកំពង់ចាម ដែលមានទីតាំងស្ថិតនៅក្នុង ភូមិតាណេង សង្កាត់សំបូរមាស ក្រុងកំពង់ចាម ដេីម្បីពន្លឿនការសាងសង់ឲ្យបានឆាប់រួចរាល់ផងដែរ ៕