កំពង់ចាម: ឯកឧត្តម អ៊ុន ចាន់ដា អភិបាលនៃគណៈអភិបាលខេត្តកំពង់ចាម និងឯកឧត្តម ខ្លូត ផន ប្រធានក្រុមប្រឹក្សាខេត្ត នាព្រឹកថ្ងៃទី២២ ខែកញ្ញា ឆ្នាំ២០២២នេះ បានអញ្ជើញជួបសំណេះសំណាលជាមួយមន្រ្តីរាជការសាលាខេត្ត និវត្តជន និងអតីតយុទ្ធជនកម្ពុជា នាឱកាសបុណ្យភ្ជុំបិណ្ឌ ប្រមាណជាង៤០០នាក់ នៅសាលាខេត្តកំពង់ចាម។
ថ្លែងក្នុងពិធីនោះ ឯកឧត្តម អ៊ុន ចាន់ដា អភិបាលខេត្តកំពង់ចាម បានកោតសរសើរ និងវាយតម្លៃខ្ពស់រាល់ការខិតខំប្រឹងប្រែងរបស់មន្រី្ដរាជការសាលាខេត្តទាំងអស់ ដែលបានខិតខំបំពេញការងារទទួលបានលទ្ធផលល្អ និងបន្តជំរុញលើកកម្ពស់ប្រសិទ្ធភាពការងារបន្ថែមទៀត ពិសេលការផ្តល់សេវាសារធារណៈ ដែលមានក្នុងកម្មវិធីនយោបាយរបស់រាជរដ្ឋាភិបាលក្នុង នីតិកាលទី៦នេះ ក្រោមការដឹកនាំរបស់សម្តេចអគ្គមហាសេនាបតីតេជោ ហ៊ុន សែន ជានាយករដ្ឋមន្ត្រីកម្ពុជា ។
ឯកឧត្តមអភិបាលខេត្ត បានបន្តថា នេះជាការជួបជុំគ្នាតាមគំរូថ្នាក់ដឹកនាំមុនៗ ជាពិសេសគឺ សម្តេចឧត្តមទេពញាណ ហ៊ុន ណេង អតីតអភិបាលខេត្តកំពង់ចាម តែងតែធ្វើឡើង សម្រាប់ឱកាស បុណ្យភ្ជុំបិណ្ឌ ជាធម្មតាក្នុងឱកាសបុណ្យប្រពៃណីរបស់ជាតិយើង មានបុណ្យធំៗ ដល់ទៅ២ គឺរដូវបុណ្យភ្ជុំបិណ្ឌ និងបុណ្យចូលឆ្នាំថ្មី (លេីកលែងតែពេលមានការផ្ទុះនូវជំងឺកូវីដ១៩កន្លងទៅថ្មីៗនេះ) ដែលជាទំនៀមទម្លាប់ប្រពៃណីជាតិម្តងៗ រដ្ឋបាលសាលាខេត្តយើងតែងតែបានធ្វើពិធីជួបសំណេះសំណាល ជាមួយបងប្អូនជាមន្ត្រីចូលនិវត្តន៍ ដែលជារាមច្បង និងបងប្អូនមន្ត្រីរាជការ កម្មករ រដ្ឋបាលសាលាខេត្តកំពង់ចាមទាំងអស់ ព្រមទាំងឧបត្ថម្ភនូវថវិកាមួយចំនួន ដើម្បីឲ្យបងប្អូនយកទៅប្រើប្រាស់ទៅតាមតម្រូវការ ដោយឡែកឆ្នាំនេះមានទាំងនិវត្តជន និងអតីតយុទ្ធជនកម្ពុជា ប្រមាណជា២០០នាក់ផងដែរ។
ជាមួយគ្នានោះ ឯកឧត្តម អ៊ុន ចាន់ដា អភិបាលខេត្តកំពង់ចាម បានធ្វើការផ្តាំផ្ញេីដល់ថ្នាក់ដឹកនាំប្រធានអង្គភាព មន្ត្រីរាជការ និវត្តជន និងអតីតយុទ្ធជនទាំងអស់ កុំឲ្យមានការពាក់ព័ន្ធជាមួយការលេងល្បែងស៊ីសងខុសច្បាប់ កុំអន្តរាគមន៍ កុំនៅពីក្រោយ និងកុំលាក់បាំង ពោលគឺត្រូវចូលរួមអនុវត្តការបង្ក្រាបល្បែងស៊ីសងខុសច្បាប់គ្រប់ប្រភេទឲ្យមានប្រសិទ្ធភាពខ្ពស់ ដែលជាការជួយសង្គ្រោះ ដល់ប្រជាពលរដ្ឋឲ្យរួចផុតពីភាពក្រីក្រ ក៏ដូចជាការលេីកស្ទួយដល់ជីវភាពគ្រួសារ ព្រមទាំងធ្វើឲ្យភូមិ-ឃុំមានសុវត្ថិភាពផងដែរ ៕