បន្ទាយមានជ័យ៖សមត្ថកិច្ចនគរបាលស្រុកម៉ាឡៃសហការណ៍ជាមួយសមត្ថកិច្ចនគរបាលរដ្ឋបាលប៉ុស្តិ៍តាគង់កាលពីវេលាម៉ោង២និង៥៥នាទីរសៀលថ្ងៃទី២៦ខែកុម្ភ:ឆ្នាំ២០១៤បានធ្វើការឃាត់ខ្លួនជនសង្ស័យប្រុសស្រី២នាក់ពីបទចែកចាយនិងសេពថ្នាំញៀន។ជនសង្ស័យទាំង២រួមមាន០១.ឈ្មោះអានសាវីភេទស្រីអាយុ៤៣ឆ្នាំមានទីលំនៅភូមិបល្ល័ង្គឃុំតាគង់ស្រុកម៉ាឡៃ(អ្នកលក់ចែកចាយ)និង០២.ឈ្មោះជាសាម៉ុនភេទប្រុសអាយុ៣៣ឆ្នាំ(អ្នកប្រើប្រាស់ឬសេព)មានទីលំនៅភូមិទំនប់នារីឃុំស្រុកកើតហេតុខាងលើ។
ជាមួយនិងការឃាត់ខ្លួនជនសង្ស័យទាំង២ខាងលើសមត្ថកិច្ចបានរកឃើញថ្នាំញៀនចំនួន១៣០គ្រាប់ជាប្រភេទមេតំហ្វេតាមីនពណ៏ផ្កាឈូកនិងពណ៏បៃតងចំនួន២គ្រាប់រួមទាំងម្សៅពណ៏ស(ម៉ាទឹកកក)ចំនួន០១កូនថង់តូចផងដែរនៅពេលធ្វើការឆែកឆេរលំនៅដ្ឋានរបស់ជនសង្ស័យឈ្មោះអានសាវី។ជនសង្ស័យបានសារភាពថាខ្លួនពិតជាបានប្រើប្រាស់និងសេពថ្នាំញៀនមែនគឺតែងតែទិញបន្តពីជនសង្ស័យខាងលើ។
ចំណែកជនសង្ស័យឈ្មោះអានសាវីប្រាប់ថាខ្លួនរកស៊ីរបរនេះទើបតែបានរយះពេល៣ខែតែប៉ុណ្ណោះគឺទិញចូល០១គ្រាប់១៥០០០រៀលហើយលក់បន្តបាន០១គ្រាប់តម្លៃ២៥០០០រៀល។លោកសៅប៊ុនអធិការនគរបាលស្រុកម៉ាឡៃប្រាប់ថាដោយអនុវត្តតាមបទបញ្ជាដ៍ម៉ឺងម៉ាត់ពីលោកឧត្តមសេនីយ៍ត្រីខេងស៊ុមស្នងការនគរបាលខេត្តក្នុងការបង្ក្រាបនិងទប់ស្កាត់រាល់បទល្មើសតាមគោលនយោបាយភូមិឃុំមានសុវត្ថិភាពខណ:
ជនសង្ស័យទាំង២ជាមុខសញ្ញាតាមដានអស់មួយរយះលុះបណ្ដាញរាយការណ៍ថាជនសង្ស័យមានថ្នាំញៀនទើបសុំគោលការណ៍ទៅលោកព្រះរាជអាជ្ញាអមសាលាដំបូងធ្វើការឆែកឆេរលំនៅដ្ឋានជនសង្ស័យនិងរឹបអូសបានថ្នាំញៀនទាំងអស់ខាងលើតែម្ដង។
លោកអធិការបន្តថាជនសង្ស័យនិងថ្នាំញៀនក្រោយធ្វើកំណត់ហេតុរួចនិងធ្វើការបញ្ជូនទៅស្នងការនគរបាលខេត្តដើម្បីចាត់ការបន្តតាមនិតិវិធីច្បាប់៕ ដោយ ដុំ សំបូរ