កំពង់ចាម: ឯកឧត្តម អ៊ុន ចាន់ដា អភិបាលខេត្តកំពង់ចាម បានថ្លែងថា ដេីម្បីចូលរួមអបអរពិធីបុណ្យចេញព្រះវស្សា ដែលនឹងប្រព្រឹត្តទៅនៅថ្ងៃទី១០ ខែតុលា ឆ្នាំ២០២២ ខាងមុខនេះ ដោយមានការគាំទ្រពីឯកឧត្ដមឧបនាយករដ្ឋមន្ត្រី យឹម ឆៃលី និងឯកឧត្ដម
ខៀវ កាញារីទ្ធ រដ្ឋមន្ត្រីក្រសួងព័ត៌មាន គណៈកម្មការថ្នាក់ខេត្ត នឹងរៀបចំពិធីប្រណាំងទូក ង ទូកខ្នាតអន្តរជាតិ បណ្តែតប្រទីប តាំងពិពណ៍ និងអុចកាំជ្រួច នៅក្រុងកំពង់ចាម ដូច្នេះសូមឲ្យបងប្អូនប្រជាពលរដ្ឋ អញ្ជើញមកចូលរួមដោយសប្បាយរីករាយក្នុងការទស្សនាកម្សាន្ត ។
ក្នុងកិច្ចប្រជុំបំណែងចែកភារកិច្ចសម្រាប់ពិធីប្រណាំងទូក ង ទូកខ្នាតអន្តរជាតិ បណ្ដែតប្រទីប តាំងពិពណ៌ និងអុចកាំជ្រួច នាព្រឹកថ្ងៃទី៣០ ខែកញ្ញា ឆ្នាំ២២២នេះ ឯកឧត្តម អ៊ុន ចាន់ដា បានស្នើដល់សមត្ថកិច្ចពាក់ព័ន្ធ ធ្វើយ៉ាងណាត្រូវសហការគ្នា ដេីម្បីពង្រឹងកិច្ចការពារសន្តិសុខ សុវត្ថិភាព សណ្ដាប់ធ្នាប់ របៀបរៀបរយសាធារណៈនៅក្នុងក្រុងកំពង់ចាម ឲ្យបានល្អប្រសើរ ពោលគឺត្រូវបង្កលក្ខណៈងាយស្រួល ទាំងមានសុវត្ថិភាពជូនប្រជាពលរដ្ឋ ដោយឡែកក្រុមកីឡាករទាំងអស់ ត្រូវខិតខំគោរពវិន័យ ជាពិសេសត្រូវគោរពតាមលក្ខន្តិកៈ របស់គណៈកម្មការរៀបចំការប្រកួត ឲ្យបានខ្ជាប់ខ្ជួន ហើយត្រូវខិតខំធ្វើការហ្វឹកហាត់ផងដែរ ។
ជាមួយគ្នានោះ រដ្ឋបាលខេត្តកំពង់ចាម សូមអំពាវនាវដល់សម្តេច ឯកឧត្តម លោកជំទាវ អ្នកឧកញ៉ា លោកឧកញ៉ា លោកអភិបាលនៃគណៈអភិបាលក្រុង-ស្រុក លោក-លោកស្រីប្រធានមន្ទីរ អង្គភាពជុំវិញខេត្ត ម្ចាស់ក្រុមហ៊ុន ពាណិជ្ជករ អាជីវករនានា និងលោក-លោកស្រី សូមមេត្តាជួយឧបត្ថម្ភ គ្រាំទ្រជាថវិកា និងសម្ភារៈផ្សេងៗដល់គណៈកម្មការខេត្តរៀបចំពិធីប្រណាំងទូក នៅខេត្តកំពង់ចាម ដើម្បី ផ្តល់លទ្ធភាពដល់គណៈកម្មការខេត្ត ក្នុងការទ្រទ្រង់ដល់ក្រុមកីឡាករអុំទូក និងចាត់ចែងរៀបចំពិធី ប្រណាំទូក នៅក្រុងកំពង់ចាម ឲ្យឲ្យទទួលលទ្ធផលល្អប្រសើរផងដែរ ៕
