កាលពីម៉ោង៤ ទៀបភ្លឺ ថ្ងៃទី២៧ ខែកញ្ញា ឆ្នាំ២០១៤ អ្នកស្រុកមានការភ្ញាក់ផ្អើលយ៉ាងខ្លាំង ដោយគោមួយក្បាលរបស់អ្នកភូមិត្រពាំងអញ្ចាញ ឃុំស្វាយជ្រុំ ស្រុករលាប្អៀរ ខេត្ត កំពង់ឆ្នាំង ត្រូវសត្វខ្លាចូលទៅខាំកាច់ ក ស៊ីយ៉ាងសាហាវ ។
ម្ចាស់គោបានអោយដឹងថា គោរបស់គាត់ទាំងអស់ មានចំនួន ៧ក្បាល ចងអោយដេកនៅក្បែរផ្ទះ នៅម៉ោងប្រមាណជា ៣ យប់ គាត់បានឮសំឡេងគោផ្អើល ប៉ុន្តែមិនបានចាប់អារម្មណ៍ថាមានសត្វខ្លា ចូលមកចាប់គោស៊ីឡើយ លុះដល់ម៉ោង៤ទៀបភ្លឺ គាត់ក៏បានចុះពីលើផ្ទះ បម្រុងទៅសាមង ស្រាប់តែឃើញគោឈ្មោលរបស់គាត់ ១ក្បាល ដេកងាប់នៅរក្បែរស្នឹង ហើយនៅពេលពិនិត្យមើល ឃើញបាក់ក បាត់គ្រាប់ភ្នែកម្ខាង អស់សាច់ទ្រូង១ដុំ និងមានឃើញស្នាមដាច់ ដោយក្រចកសត្វខ្លា នៅលើខ្លួនគោនោះ ជាច្រើនកន្លែង។ ក្រោយពីមានហេតុការណ៍នេះលោកក៏បានរាយការណ៍ ទៅប៉ូលិសប៉ុស្តិ៍ អោយបានដឹង និងចុះមកពិនិត្យមើលផងដែរ។ នៅព្រឹកថ្ងៃដដែលនេះ កម្លាំងប៉ូលិសប៉ុស្តិ៍ ជាច្រើននាក់ រួមនឹងមន្ត្រីអាជ្ញាធរមូលដ្ឋានផង បានចុះទៅពិនិត្យមើល ជាក់ស្តែង នៅកន្លែងហេតុ និងនៅជុំវិញកន្លែង កើតហេតុ ដោយបានឃើញមាន ស្នាមដានជើងសត្វខ្លា ជាច្រើនកន្លែង ។
ប្រជាពលរដ្ឋ នៅក្នុងភូមិត្រពាំងអញ្ចាញ បាននិយាយអោយដឹងថា តាមការពិនិត្យ ទៅលើដានជើងសត្វខ្លា ដែលចូលមកចាប់គោស៊ីនេះ មិនមែនតូចទេ ជាសត្វខ្លាដ៏ធំមួយ ដែលស្នាមដានជើងសត្វខ្លាមួយនេះ គេធ្លាប់បានប្រទះឃើញ ម្តងរួចមកហើយ នៅក្នុងខណៈពេល ដែលព្រះសង្ឃ គណៈកម្មការ អាចារ្យ វត្តធម្មវ័ន្ត ចាក់ផ្លូវបេតុង នៅលើភ្នំក្រាំងដីមាស មិនទាន់រឹង ហើយត្រូវវាដើរកាត់ ។ សមត្ថកិច្ច មន្ត្រីអាជ្ញាធរមូលដ្ឋាន និងប្រជាពលរដ្ឋ បានសន្និដ្ឋានថា សត្វខ្លាដែលចូល មកចាប់ កាច់ ក គោអ្នកភូមិស៊ីនេះ ជាសត្វខ្លា ដែលចុះមកពីលើ ភ្នំក្រាំងដីមាស។
នេះជាលើកទី១ហើយ ដែលមានសត្វខ្លាចុំពីភ្នំចេញមកស៊ីគោរបស់អ្នកស្រុកបែបនេះ ហើយក៍ជាការគួរអោយព្រួយបារម្ភយ៉ាងខ្លាំងចំពោះសុវត្ថិភាពប្រជាពលរដ្ឋរស់នៅទីនោះ៕
