កំពង់ធំ ៖ នៅទីបញ្ជាការតំបន់ប្រតិបត្តិការសឹករងកំពង់ធំ ប្រជុំបូកសរុបលទ្ធផលការងារ ដែលបាន អនុវត្តន៍ កន្លងមក និងលើទិសដៅ អនុវត្តបន្តឆ្នាំ ២០១៤ ក្រោមការចូលរួម ឯកឧត្តម អ៊ុត សំអន អភិបាលខេត្តកំពង់ធំ ជាប្រធានគណៈបញ្ជាការឯកភាពខេត្ត និងឯកឧត្តម ឧត្តមសេនីយ៍ឯក ជា ម៉ន មេបញ្ជាការយោធភូមិភាគទី៤ ជាអធិបតីដ៍ខ្ពង់ខ្ពស់ ។
ឯកឧត្តម ឧត្តមសេនីយ៍ត្រី សោម ស៊ុន មេបញ្ជាការតំបន់ប្រតិបត្តិការសឹក កំពង់ធំ ជួសមុខឲ្យថ្នាក់ដឹកនាំឲ្យ តំបន់សឹក ដោយតំបន់សឹកមានការឯកភាព ពីឯកឧត្តម មេបញ្ជាការយោធភូមិភាគទី៤ និងបានឆ្លងកាត់ការអនុវត្តការងារឆ្នាំកន្លងមក ដោយបើកសិក្ខាសាលា ប្រជុំបូកសរុបលទ្ធផលឆ្នាំចាស់ ព្រមទាំងបានវាយ តំលៃនូវចំណុចខ្លាំង និងចំនុចខ្សោយ ដកស្រង់នូវបទពិសោធន៍ល្អៗ ដាក់ចេញនូវទិដៅការងារសម្រាប់ឆ្នាំ ថ្មីបន្ត មិនតែប៉ុណ្ណោះ អង្គភាពតំបន់សឹក បានធ្វើកិច្ចការងារជំនាញក្នុងកងទ័ព និងការងារសង្គម និងចូលរួម ការពារប្រមុខរាជរដ្ឋាភិបាល មានសម្តេចអគ្គមហាសេនាបតីតេជោ ហ៊ុន សែននាយករដ្ឋមន្ត្រីនៃព្រះរាជាណាចក្រកម្ពុជា និងសម្តេចកិត្តិព្រឹត្តបណ្ឌិត ប៊ុន រ៉ានី ហ៊ុន សែន ដែលបានអញ្ជើញចុះជួយការលំបាករបស់ប្រជាពលរដ្ឋ ក្នុងខេត្តកំពង់ធំ ។
ជាពិសេស អង្គភាពតំបន់សឹកបានជួយដល់ពលទាហាន ពិការ និងកងយោធពលដែលចូលនិវត្តន៍ ដោយយកចិត្ត ទុកដាក់ ដោយមានការជួយឧបត្ថម្ភ ទាំងកំលាំងចិត្តនិងកំលាំងកាយ និងឧបត្ថម្ភទាំងថវិការ ដោយឯកឧត្តម អ៊ុត សំអនអភិបាលខេត្តកំពង់ធំ និងមន្ទីរស្ថានមួយចំនួនផងដែរ។
នៃឳកាសនោះ ឯកឧត្តម ឧត្តមសេនីយ៍ឯក ជា ម៉ន មេបញ្ជាការង កងទ័ពជើងគោក បានមានប្រសាសន៍ កោតសរសើរ ចំពោះស្នាដៃធំៗជាច្រើន ដែលតំបន់សឹករងកំពង់ធំ បានអនុវត្តន៍កន្លងមក ទាំងការហ្វឹកហាត់ អប់រំទាំងកាយវិការ និងចិត្តសាស្ត្រ ក្នុងការបំប៉នជំនាញដល់កងយោធពល ជាពិសេសតំបន់សឹកបានដើរ តួនាទីសំខាន់ដែលគួរឲ្យមានការ លើកទឹកចិត្ត និងកោរសរសើរ ចំពោះសកម្មភាពមនុស្សធម៌ និងចុះជួយ ដល់ប្រជាពលរដ្ឋដែលជួបការលំបាក ដោយមានការសហការជាមួយអាជ្ញាធរខេត្ត និងបានផ្តាំផ្ញើរឲ្យពលទាហានទាំងអស់ គោរពនូវវិន័យ និងសេចក្តី ថ្លៃថ្នូរជាកងកម្លាំង កុំជឿលើពាក្យញ៉ុះញ៉ង ប្តេជ្ញាចិត្តការងាររាជរដ្ឋាភិបាលស្របច្បាប់។
ឯកឧត្តម អ៊ុត សំអន អភិបាលខេត្តកំពង់ធំ កោរសរសើរ និងវាយតំលៃខ្ពស់ ចំពោះការខិតខំប្រឹងប្រែង របស់ តំបន់សឹករងកំពង់ធំ ក្នុងកិច្ចសហប្រតិបត្តិការ ជាមួយនិងសមត្ថកិច្ចជំនាញផ្សេងៗ ដើម្បីទប់ស្កាត់ ការរាល ដាលនូវបទល្មើសផ្សេងៗ ជាពិសេស ការចូលរួមអនុវត្តនូវគោលនយោបាយ ភូមិ ឃុំ មានសុវត្តិភាពទាំង៩ ចំនុច រហូតបានធ្វើឲ្យ ខេត្តកំពង់ធំ ទទួលបាននូវលទ្ធផលល្អ គួរឲ្យកត់សម្គាល់។
ដោយ ប៊ុន រដ្ឋា