កំពង់ធំៈ ក្រោមការយកចិត្តទុកដាក់របស់ លោកឧត្តមសេនីយ៍ត្រី ជូរ សំអាន ស្នងការនគរបាល ខេត្តកំពង់ធំ បានដាក់បទបញ្ជារឲ្យមានការចុះ ពង្រឹងច្បាប់ចរាចរណ៍ផ្លូវគោក និងចុះត្រួតពិនិត្យជាតិអាកុល និងជម្រុញឲ្យ ប្រជាពលរដ្ឋ ចូលរួមគោរពច្បាប់ចរាចរណ៍ ដើម្បីកាត់បន្ថយអាត្រាគ្រោះថ្នាក់ចរាចរណ៍ នៅក្នុងខេត្តកំពង់ធំ។
សកម្មភាពរឹតបន្តឹងការអនុវត្តន៍ច្បាប់ចរាចរណ៍ ការពាក់មួកសុវត្តិភាព និងចុះត្រួតពិនិត្យជាតិអាកុល ត្រូវបាន ធ្វើឡើងជារៀងរាល់យប់ នៅត្រង់ចំនុចភូមិកំពង់ធំ សង្កាត់កំពង់ធំ ក្រុងស្ទឹងសែន ខេត្តកំពង់ធំ ត្រូវដឹកនាំកម្លាំងចុះត្រួតពិនិត្យដោយលោកវរៈសេនីយ៍ត្រី ព្រំ ចាន់ថុល នាយរងការិយាល័យចរាចរណ៍ផ្លូវគោក និងលោក ប៉ូលិសចរាចរណ៍ ក្រសួង កម្លាំងស្នងការ ប៉ូលិសនៃអធិការក្រុងស្ទឹងសែន កងរាជអាវុធហត្ថក្រុងស្ទឹងសែន ព្រមទាំងបានចូលរួមពីសំណាក់សាខាកាកបាទក្រហមចំនួន៧នាក់ កាលពីយប់ថ្ងែទី៣និងទី៤ ខែ តុលា ឆ្នាំ ២០១៤ ។
តាមការឲ្យដឹងពីវរៈសេនីយ៍ត្រី ព្រំ ចាន់ថុល នាយរងការិយាល័យចរាចរណ៍ផ្លូវគោក នៃស្នងការនគរបាល ខេត្តកំពង់ធំ បានឲ្យដឹងថា ការចុះត្រួតពិនិត្យក៏ដូចជាការរឹតបន្តឹងការអនុវត្តន៍ច្បាប់នេះ គឺដោយមានការណែនាំនិងចង្អុលបង្ហាញពីអគ្គស្នងការនគរបាលជាតិ ចុះត្រួតពិនិត្យជាតិអាកុល ,ការជម្រុញឲ្យប្រជាពលរដ្ឋ ពាក់ មួកសុវត្តិភាព ព្រមទាំងការបំពាក់នូវឧបករណ៍ គ្រឿងបន្លាស់របស់យានយន្ត ដូចជាស្លាកលេខ កញ្ជក់ ប័ណ្ណបើកបរ និងលិខិតការអនុញ្ញាតិឲ្យប្រើប្រាស់យានយន្ត ព្រមទាំងបានចែកខិតប័ណ្ណណែនាំស្តីពីគ្រោះថ្នាក់ដោយសារការមិនពាក់មួកសុវត្តិភាព ។
យុទ្ធនាការ ចុះត្រូតពិនិត្យសកម្មភាពការធ្វើដំណើរ ដោយមិនទាន់គោរពច្បាប់ចរាចរណ៍ នៅក្នុងខេត្តកំពង់ធំ ត្រូវបានគេសង្កេតឃើញមាន មនុស្សច្បាប់ពី ២៣ទៅដល់៤៥ ភាគច្រើនបើកបរក្នុងស្ថានភាពស្រវឹងដល់ទៅ ៣០ភាគរយក្នុងចំណោមមនុស្ស១០០នាក់ ចំណែកមិនពាក់មួកសុវត្តិភាពនិងមិនគោរពច្បាប់ចរាចរណ៍ ឈានដល់ទៅ៦០ភាគរយ ក្នុងនោះមានប៉ូលិស , មន្ត្រីរាជការ, និងអ្នករស់នៅទីប្រជុំជន ដោយហេតុផល អាងស្គាល់ប៉ូលិស សាច់ញ្ញាតិ អាងទាហាន អាងអំណាច ចំណែកប្រជាពលរដ្ឋដែលនៅតាមជនបទធ្វើដមណើរ មកក្រុង ក្នុងចំណោម១០០នាក់ គេសង្កេតឃើញពាក់មួកសុវត្តិភាពដល់ទៅ ៧០នាក់ឯណោះ។
ចំណែកអាយុចាប់ពី ១៧ដល់ទៅ ២៣ឆ្នាំ នៅក្នុងរវាងវ័យចង់សាក់ ចង់ដឹង និងចង់បង្ហាញថាខ្លួនជាអ្នកខ្លាំង ក្នុងចំណោម មនុស្ស១០០នាក់ អត់ពាក់មួកសុវត្តិភាព មនុស្សប្រុស ៩០ភាគរយ មនុស្សស្រី ៦០ភាគរយ ចំណែកអាត្រាការស្លាប់ដោយគ្រោះថ្នាក់ចរាចរណ៍ មនុស្សក្នុងវ័យនេះគឺខ្ពស់បំផុត ដោយយោងទៅតាមតួ លេខរបស់អង្គការមួយដែលបានបង្ហាញពីលទ្ធផល បណ្តាលឲ្យមានហេតុគ្រោះថ្នាក់ចរាចរណ៍ ។
ដោយ ប៊ុន រដ្ឋា
