ខេត្តព្រះវិហារ
បនល្បែងស៊ីសងខុសច្បាប់ដ៍ល្បី១កន្លែងកំពង់លេងចាក់ភ្នាល់លុយច្រើនៗស្ថិតនៅជាប់ដងផ្លូវជាតិលេខ៦២ក្នុងភូមិស្រម៉ូវសង្កាត់ប៉ាលហាលក្រុងព្រះវិហារគ្មានសមត្ថកិច្ចជំនាញណាម្នាក់ចុះទៅបង្ក្រាបទប់ស្កាត់នោះទេ។បនល្បែងស៊ីសងនេះរួមមានសង្វៀនជល់មាន់វង់អាប៉ោងបៀរដោយលេងនៅក្បែរតារាងបាល់ទះឯកជន។
ប្រជាពលរដ្ឋនៅក្បែរទីតាំងបនល្បែងបានរាយការណ៍អោយដឹងថាជនល្មើសឈ្មោះសាយមកពីរាជធានីភ្នំពេញជាអ្នកបង្កើតវង់ល្បែងស៊ីសងនិងសង្វៀនជល់មាន់ខុសច្បាប់។ចំណែកវង់បៀរអាប៉ោងបើកលេងគគ្រឹកគគ្រេងនេះត្រូវគេដឹងថាកំពុងលេងក្នុងផ្ទះបុរសម្នាក់ឈ្មោះភាព។ប្រភពព័ត៌មាននិយាយថាវង់ល្បែងស៊ីសងខុសច្បាប់នេះជាឆ្នាំងបាយដ៍ធំរបស់អាជ្ញាធរមានសមត្ថកិច្ចចាប់ពីថ្នាក់ក្រុងរហូតដល់ថ្នាក់ខេត្តមិនត្រឹមតែនាំគ្នាស៊ីស្ងាត់ៗនោះទេគឺថែមទាំងចេញមុខកាងជាចំហរថែមទៀតផង។
ប្រជាពលរដ្ឋផ្សេងទៀតបានបង្ហើបអោយដឹងថាក្នុង១ខែៗមេបនល្បែងស៊ីសងឈ្មោះសាយបានចំណាយលុយជាង១០០០ដុល្លារអាមេរិកដើម្បីរត់ការសូកប៉ាន់ទប់អាជ្ញាធរមានសមត្ថកិច្ចមិនអោយចុះទៅបង្ក្រាបបនល្បែងស៊ីសងរបស់ខ្លួន។ប្រជាពលរដ្ឋស៊ើបដឹងថាគ្រាប់អាប៉ោងដែលមេបនល្បែងយកទៅបាញ់បង្វិលអោយចាក់ភ្នាល់លុយនេះមានប្រើតេទ្បេបញ្ជាធ្វើអោយអ្នកញៀនងប់ងល់នឹងល្បែងស៊ីសងចាញ់រាប់ពាន់ដុល្លារអាមេរិកក្នុង១ថ្ងៃៗ។
រីឯល្បែងឆ្នោតកន្ទុយលេខវិញត្រូវបានប្រជាពលរដ្ឋគ្រប់រូបនាំគ្នានិយាយរិះគន់ថាកំពុងរីកសុសសាយខ្លាំងពេញខេត្តព្រះវិហារជាពិសេសក្នុងក្រុងព្រះវិហារតែម្ដងដែលមេឆ្នោតធំប្រចាំខេត្តត្រូវគេស្គាល់ឈ្មោះច្បាស់ទី១ស្ដ្រីឈ្មោះផារីនិងបុរសម្នាក់ទៀតឈ្មោះលី។ការលេងចាក់ឆ្នោតកន្ទុយលេខខុសច្បាប់នេះគឺអាជ្ញាធរមានសមត្ថកិច្ចគ្រប់ជាន់ថ្នាក់បើកអោយប្រជាពលរដ្ឋលេងជាចំហរតែម្ដងព្រោះសង្ស័យថាអាចមានការសូកប៉ាន់កញ្ចប់លុយខ្មៅកខ្វក់ពីសំណាក់ក្រុមជនល្មើសជាមេឆ្នោត។
ប្រជាពលរដ្ឋរួមទាំងសមត្ថកិច្ចខិលខូចខ្លះដែលមានជីវភាពធូរធារបានងប់ងល់នឹងល្បែងចាក់កន្ទុយលេខនេះដោយដឹងថាអ្នកខ្លះចាក់រហូត៤ទៅ៥លានរៀលក្នុង១ថ្ងៃក៍មានដែរហើយប្រជាពលរដ្ឋសាមញ្ញវិញនាំគ្នាចាក់ល្បែងកន្ទុយលេខក្នុងម្នាក់ៗចាប់ពី១០ម៉ឺនរៀលទ្បើងទៅ។អ្នកខ្លះលក់របស់របរក្នុងផ្ទះនិងលក់ដីធ្លីយកលុយមកចាក់កន្ទុយលេខក៍មានដែរ។
មជ្ឈដ្នានប្រជាពលរដ្ឋផ្សេងទៀតបានបញ្ចេញទស្សនះរិះគន់ធ្ងន់ៗថាការលេងល្បែងស៊ីសងខុសច្បាប់ក្នុងកំរិតគ្រោះថ្នាក់ដល់ជីវភាពរស់នៅនិងត្រូវប្រកាសអាសន្ននេះវាបានជះឥទ្ធិពលអាក្រក់ដល់ការគ្រប់គ្រងអំណាចរដ្ឋបាលរបស់គណះអភិបាលខេត្តនិងក្រុមប្រឹក្សាខេត្តព្រះវិហារទាំងមូលផងដែរ។ទាំងនេះជាចេតនាបណ្តែតបណ្តោយអោយជីវភាពរបស់ប្រជាជនអាចនឹងជួបវិបត្តិអាក្រក់ដោយសារងប់ងល់នឹងល្បែងស៊ីសង៕
Ads
