កំពង់ឆ្នាំង៖បុរសម្នាក់បានរងរបួសបាក់ដៃនិងបាក់ភ្លៅធ្ងន់ធ្ងរ នៅពេលដែលគាត់កំពុងបើករ៉ឺម៉កម៉ូតូដឹកជ្រូកបារ ត្រូវបានកង់រថយន្តធំមួយគូរដាច់ចេញពីភ្លៅរថយន្តរត់មកបុកចំរ៉ឺម៉កម៉ូតូគាត់។ករណីគ្រោះថ្នាក់នេះកើតឡើងនៅវេលាម៉ោង៣និង១០នាទីរសៀលថ្ងៃទី១០ ខែតុលា ឆ្នាំ២០១៤ នៅលើផ្លូវជាតិលេខ៥ចន្លោះគីឡូម៉ែត្រលេខ៨៣និង៨៤ ស្ថិតនៅក្នុងភូមិជ្រៃបាក់ ឃុំជ្រៃបាក់ ស្រុករលាប្អៀរ ខេត្តកំពង់ឆ្នាំង។
សមត្ថកិច្ចនគរបាលចរាចរណ៍ស្រុករលាប្អៀរចុះទៅពិនិត្យកន្លែងកើតហេតុបានអោយដឹងថា៖បុរសរងគ្រោះមានឈ្មោះ សំ សាខន អាយុ៤៥ឆ្នាំ រស់នៅក្នុងភូមិស្ពករាជ ឃុំអណ្តូងស្នាយ ស្រុករលាប្អៀរ។មុនពេលកើតគាត់បានបើកបររម៉កម៉ូតូដឹកជ្រូកបារមួយក្បាលក្នុងទិសដៅពីជើងមកត្បូង លុះដល់ចំណុចកើតហេតុមានរថយន្តធន់ធំមួយគ្រឿងម៉ាកមីស៊ុយប៊ីស៊ីពាក់ស្លាកលេខពោធិសាត់ បើកបរក្នុងទិសច្រាស់គ្នាបានដាច់កង់មួយគូរចេញពីភ្លៅរថយន្តផ្នែកខាងក្រោយបានរត់មកបុកចំរ៉ឺម៉កម៉ូតូពេញទំហឹង បណ្តាលអោយរ៉ឺម៉កម៉ូតូក្រឡាប់បះជើង និងធ្វើអោយរ៉ឺម៉កម៉ូតូសង្កត់បុរសរងគ្រោះ បាក់កដៃនិងភ្លៅខាងឆ្វេងរងរបួសជាទម្ងន់។
ក្រោយពេលកើតហេតុបុរសរងគ្រោះត្រូវបានសមត្ថកិច្ច ហៅរថយន្តសាមុយមកដឹកបញ្ចូនទៅកាន់មន្ទីរពេទ្យខេត្ត ដើម្បីអោយក្រុមគ្រូពេទ្យជួយសង្គ្រោះព្យាលបាល។ដោយឡែករថយន្តបង្កហេតុបានបើកទៅមុខមិនដឹងខ្លួន និងត្រូវបានសមត្ថកិច្ចឃាត់ជាប់នៅជិតចំណតរថយន្តផ្សារលើក្នុងក្រុងកំពង់ឆ្នាំង ហើយត្រូវបានសមត្ថកិច្ចអូសមករក្សាទុកនៅការិយាល័យនគរបាលចរាចរណ៍ផ្លូវគោកខេត្ត និងកសាងសំណុំរឿងតាមផ្លូវច្បាប់។
ចំពោះមុខសមត្ថកិច្ចអ្នកបើកបររថយន្តបង្ក មិនបានប្រាប់អត្តសញ្ញាណរបស់ខ្លួនអោយអ្នកយកព័ត៌មានយើងដឹងឡើយ តែគេបាននិយាយស្បថស្បែរថា រូបគេមិនបានដឹង
ថាចុងដុំរថយន្តឆេះខ្លោចរមូ របូតដាច់កង់រថយន្ត១គូរនោះយ៉ាងងាយៗ រត់ទៅបុករ៉ឺម៉កម៉ូតូជនរងគ្រោះក្រឡាប់មានរបួសធ្ងន់ធ្ងរបែបនេះឡើយ។នៅក្នុងមន្ទីរពេទ្យខេត្តបុរសរងគ្រោះត្រូវបានក្រុមគ្រូពេទ្យខេត្ត បញ្ជូនចូលក្នុងបន្ទប់វះកាត់ធ្វើការលាងនិងរំរបួសដៃនិងភ្លៅដែលបាក់ទៅតាមបច្ចេកទេស ។
ដោយសភាពរបួសមានលក្ខណៈធ្ងន់ធ្ងរ និងដោយមានសំណូមពរពីក្រុមគ្រួសារជនរងគ្រោះ បុរសរគ្រោះត្រូវបានគ្រូពេទ្យខេត្តបញ្ជូនទៅសង្គ្រោះព្យាបាលបន្តនៅមន្ទីរពេទ្យអង្គការមួយនៅក្នុខេត្តបាត់ដំបងដែលពូកែ តឆ្អឹងឆ្អែងបាក់បែក នៅល្ងាចថ្ងៃទី១០ ខែតុលានេះ៕