លោកនាយករដ្ឋមន្ត្រី ឥណ្ឌា ណារិនដ្រា ម៉ូឌី បានចេញសារ អបអរសាទរចំពោះ ប្រធានាធិបតី អាហ្វហ្គានីស្ថានថ្មីលោក អាស្រាហ្វ ហ្គានី ដោយលោក ម៉ូឌី បានសម្តែងការ គាំទ្រដល់ការប្តេជ្ញាចិត្ត របស់មេដឹកនាំថ្មីរូបនេះ ក្នុងការកសាងប្រទេសអាហ្វហ្គានីស្ថាន ឡើងវិញប្រកបដោយភាពខ្លាំង
ក្លា និង សន្តិភាព។
ទីភ្នាក់ងារព័ត៌មានចិនស៊ិនហួ បានចេញផ្សាយនៅថ្ងៃព្រហស្បតិ៍ ទី១៦ ខែតុលា នេះតាម សេចក្តីថ្លែង ការណ៍របស់រដ្ឋាភិបាលឥណ្ឌាដូច្នេះថា ”លោកនាយករដ្ឋមន្ត្រី ម៉ូឌី បានបញ្ជូនសារ លិខិត បង្ហាញពីជំហរ របស់ឥណ្ឌា ដែលស្ថិតនៅជាមួយលោកប្រធានាធិបតអាហ្វហ្គានីស្ថានថ្មី ក្នុងភាពជាមិត្ត និង ដៃគូ នៅគ្រប់ ជំហានលើផ្លូវធ្វើដំណើរ ហើយរដ្ឋាភិបាលរបស់លោកនឹង បោះជំហានទៅមុខក្នុងកិច្ចខិតខំប្រឹង ប្រែង កសាង ភាពរឹងមាំ, ស្ថិរភាព, សន្តិភាព, ប្រជាធិបតេយ្យ, ឯករាជ្យភាព និង ភាពរុងរឿងថ្កុំថ្កើង។”
គួរបញ្ជាក់ថាលោក ហ្គានី បានជំនួសតំណែងប្រធានាធិបតីពីលោក ហាមីដ កាហ្សៃ កាលពី ខែមុននេះ បន្ទាប់ពីភាពជាប់គាំងនៃជម្លោះតំណែងប្រធានាធិបតី ដែលបានគ្របដណ្តប់ ប្រទេសអាស៊ីខាងត្បូង មួយនេះ អស់ជាច្រើនខែរួចមក៕
