(ប៉ៃលិន) នៅបរិវេណបឋមសិក្សាអូរតាពុកស្ថិតក្នងភូមិអូរតាពុកក្រោម សង្កាត់ទួលល្វា ក្រុងប៉ៃលិន ខេត្តប៉ៃលិន មានរៀបចំប្រារព្ធទិវាជាតិលើកកំពស់អនាម័យជនបទ១៣វិច្ឆិកាឆ្នាំ២០១៤ ក្រោមប្រធានបទ(វិន្និយោគលើអនាម័យដើម្បីកូនចៅជំនាន់ក្រោយយើង)។ពិធីនេះស្ថិតក្រោមអធិបតីភាព
ឯកឧត្តម ម៉ី មគ្គ អភិបាលរងខេត្តប៉ៃលិន និងមានការចូលរួមពីសំណាក់មន្ត្រីរាជការ សិក្សានុសិស្ស លោកគ្រូអ្នកគ្រូបងប្អូនប្រជាពលរដ្ឋជាច្រើននាក់ផងដែរ។ទិវាជាតិលើកកំពស់អនាម័យជនបទនេះធ្វើឡើងក្នុងគោលបំណង ឲ្យប្រជាពលរដ្ឋសិស្សានុសិស្សបានយល់ដឹងពីសារៈប្រយោជន៍និងភាពចាំបាច់នៃការធ្វើអនាម័យដូចជាការធ្វើបង្គន់អនាម័យការលាងដៃនឹងសាប៊ូមុនពេលបរិភោគអាហារ និងក្រោពេលបន្ទរបង់ការបរិភោគទឹកស្អាតជាដើមដើម្បីទាំងអស់គ្នាមានសុខភាពល្អ។
លោកស្រី សោ មុន្នីរ័ត្ន ប្រធានមន្ទីរអភិវឌ្ឍន៍ជនបទខេត្តបានមានប្រសាសន៍ថាៈបញ្ហាអនាម័យនៅតែជាក្តីកង្វល់របស់បណ្តាប្រទេសកំពុងអភិវឌ្ឍន៍ហើយកែលំអរស្ថានភាពអនាម័យគឺជាសមិទ្ធិផលដ៏ធំធេងក្នុងការសំរេចបាននូវសុខភាពនិងកំណើនសេដ្ឋកិច្ច ហើយបានកាត់បន្ថយអត្រាស្លាប់របស់កុមារ និងប្រយុទ្ធនិងជម្ងឺឆ្លងនានាដែលបណ្តលមកពីកង្វះអានាម័យ។ដើម្បីឈានដល់គោលដៅសុខភាពនេះក្រសួងអភិវឌ្ឍន៍ជនបទបានដាក់ចេញទស្សនៈវិស័យផ្គត់ផ្គង់ទឹកស្អាត និងអនាម័យជនបទហើយបានកំណត់ថា នៅឆ្នាំ២០១៥ ប្រជាពលរដ្ឋគ្រប់រូបនៅសហគមន៍ជនបទត្រូវមានសេវាផ្គត់ផ្គង់ទឹកស្អាតនិងអនាម័យគ្រប់គ្រាន់ព្រមទាំងរស់នៅក្នុងបរិស្ថានល្អដែលមានអនាម័យប្រកបដោយនិរន្តរ៍ភាព។
ឯកឧត្តម ម៉ី មគ្គអភិបាលរងខេត្តប៉ៃលិនបានអានសាលិខិតរបស់សម្តេចអគ្គមហាសេនាបតីតេជោហ៊ុនសែន នាយករដ្ឋមន្ត្រីនៃព្រះរាជាណាចក្រកម្ពុជាដែលមានខ្លឹមសារថាៈថ្ងៃទី១៣វិច្ឆិកាឆ្នាំ២០១៤នេះគឺជាថ្ងៃដ៏មានសារៈសំខាន់មួយសំរាប់ព្រះរាជាណាចក្រកម្ពុជាយើងក្នុងការប្រារព្ធទិវាជាតិលើកកំពស់អនាម័យជនបទលើកទី៥។ការៀបចំប្រារព្ធទិវានេះគឺក្នុងគោលបំណងបន្តជំរុញនិងបំផុសការយល់ដឹងនិងការយកចិត្តទុកដាក់កាន់តែខ្ពស់បន្ថែមទៀតក្នុងការលើកកំពស់អនាម័យជនបទនិង ដើម្បីពង្រីកវិសាលភាពសេវាអនាម័យជនបទឲ្យកាន់តែទូលំទាយ និងបំផុសការយល់ដឹងផ្សព្វផ្សាយជូនដល់បងប្អូនប្រជាពលរដ្ឋជាពិសេសចំពោះកុលបុត្រកុលធិតាខ្មែរឲ្យយល់ដឹងពីតម្លៃនៃអនាម័យដែលជាកត្តាសំខាន់ដល់ការលើកតម្កើងសុខមាលភាពសង្គមនិងសេដ្ឋកិច្ចជាតិ។
ក្នុងន័យនេះ រាជរដ្ឋាភិបាលសូមអោយបងប្អូនប្រជាជនទាំងអស់ ចូលរួមអនុវត្តអនាម័យល្អ គឺការសាងសង់ នឹងប្រើប្រាស់បង្គន់អនាម័យ ការលាងសំអាត់ដៃជាមួយសាប៊ូ ក្រោយពេលបន្ទោបង់ នឹងមុនបរិភោគអាហារ បរិភោគទឹកមានសុវត្ថិភាព។
ការអនុវត្តអនាម័យល្អធ្វើអោយមានប្រសិទ្ធភាពខ្ពស់ដើម្បីសុខភាពខ្លួនយើង កូនចៅក្រុមក្រួសារយើង នឹងសហគមន៍របស់យើងទាំងមូល ដែលជាការរួមចំណែកអភិវឌ្ឍន៍ប្រទេសជាតិ។ចំពោះមុខនេះរាជរដ្ឋាភិបាលនឹងបន្តផ្តោតយកចិត្តទុកដាក់លើការអនុវត្តផ្គត់ផ្គង់ទឹកស្អាត និងអនាម័យជនបទដែលកិច្ចការនេះនិងរួមចំណែកក្នុងការកាត់បន្ថយភាពក្រីក្ររបស់ប្រជាជន និងលើកកំពស់សុខភាពប្រជាជន វឌ្ឍនៈភាពសង្គម អភិវឌ្ឍន៍ធនធានមនុស្ស និងសេដ្ឋកិច្ចប្រកបដោយចិរភាព។
ឈរលើស្មារតីរួមនេះសំណូមពរឲ្យបណ្តាក្រសួង ស្ថានប័ន អាជ្ញាធរដែនដីគ្រប់លំដាប់ថ្នាក់ និងលោកគ្រូអ្នកគ្រូ ក្មួយៗសិស្សានុសិស្ស បងប្អូនជនរួមជាតិទាំងអស់សូមរួមគិត រួមធ្វើ រួមទទួលខុសត្រូវ ជំរុញនិងបង្កើនភាពជាម្ចាស់ក្នុងការលើកកំពស់អនាម័យឲ្យបានជាប្រចាំ និងកាន់តែសកម្មខ្លាំងក្លាជាងមុនថែមទៀតទៅតាមសមត្ថភាព និងតាមផ្នែកជំនាញក្នុងភាពឆ្នៃប្រឌិតដ៏រសរវើករៀងៗខ្លួន ៕ 
