សៀមរាប សិក្ខាសាលាស្តីពីជំនួយផ្នែកច្បាប់ប្រចាំតំបន់លើសន្ធិសញ្ញាស្តីពីពាណិជ្ជកម្មអាវុធ (Arms Trade Treaty) នឹងត្រូវរៀបចំឡើងរយៈពេល២ថ្ងៃ គឺពីថ្ងៃទី១៨ដល់ទី១៩ខែវិច្ឆិកា នៅសណ្ឋាគារសុខាអង្គរ ខេត្តសៀមរាប។ សិក្ខាសាលានេះ ត្រូវបានប្រទេសកម្ពុជារៀបចំឡើងដោយមានការសហការជាមួយមជ្ឈមណ្ឌលប្រចាំតំបន់ របស់
អង្គការសហប្រជាជាតិដើម្បីសន្តិភាព និងការដាក់អាវុធនៅក្នុងតំបន់អាស៊ីប៉ាស៊ីហ្វិក (UNRCPD) ។ ជាសិក្ខាសាលា ដែលរៀបចំឡើងក្នុងបំណងផ្តល់ជំនួយផ្នែកច្បាប់និងបច្ចេកទេសដល់ប្រទេសមួយចំនួនដែលកំពុងពិចារណាអំពីផលប៉ះពាល់ពីប្រយោជន៍ និងនីតិវិធីដោយសញ្ញាស្តីពីពាណិជ្ជកម្មអាវុធ ជាពិសេសជួយតម្រង់ទិសប្រទេសទាំងនោះ សំដៅរកការចុះហត្ថលេខា និងការផ្តល់សច្ចាប័នលើសន្ធិសញ្ញាទាំងនេះ។
ប្រទេសហត្ថលេខីចំនួន១៥ ដែលរួមមានកម្ពុជា នឹងត្រូវអញ្ជើញឲ្យចូលរួមក្នុងសិក្ខាសាលានេះ មានប្រទេសអូស្ត្រាលី,បង់ក្លាដេស,ប្រុយណេដារុយស្សាឡឹម,ជប៉ុន,ម៉ាឡាស៊ី,ម៉ុងហ្គោលី,ណេប៉ាល់,ណូវែលហ្សេឡង់,ហ្វីលីពីនសាធារណកូរ៉េ,សឹង្ហបុរី,ថៃ និងប្រទេសទីម៉រខាងកើត។ ប្រទេសទាំង១៥នេះ មិនទាន់មានប្រទេសណាមួយផ្តល់សច្ចាបន័នៅឡើយ ទៅលើសន្ធិសញ្ញាស្តីពីពាណិជ្ជកម្មអាវុធ។
ដោយឡែក ប្រទេសហត្ថលេខីមួយចំនួនមកពីតំបន់ប៉ាស៊ីហ្វិក នឹងបញ្ចូន តំណាងម្នាក់របស់លេខាធិការដ្ឋាននៃប្រទេសប្រជុំដែនកោះប៉ាស៊ីហ្វិក ដើម្បីចូលរួមក្នុងសិក្ខាសាលាអន្តរជាតិនេះ។ ប្រទេសទាំងនោះមានដូចជា៖ Kiribati, Nauru, Palau, Samoa, Tuvalu និងប្រទេសVanautu។
ប្រធានបទសំខាន់ៗចំនួន៥នឹងត្រូវលើកយកទៅពិភាក្សានៅក្នុងសិក្ខាសិលារយៈពេល២ថ្ងៃនោះរួមមាន ដំណើរឆ្ពោះទៅរកការដាក់ចូលជាធរមាននៃសន្ធិសញ្ញាស្តីពីពាណិជ្ជកម្មអាវុធ បញ្ហាប្រឈមផ្នែកច្បាប់កម្រិតថ្នាក់ជាតិ លទ្ធភាពក្នុងការដោះស្រាយបញ្ហាប្រឈមដែលមានស្រាប់ ឧបករណ៍សម្រាប់អនុវត្តន៍សន្ធិសញ្ញាស្តីពីពាណិជ្ជកម្មអាវុធ និងឧបករណ៍ និងគម្រូសម្រាប់អនុវត្តន៍សន្ធិសញ្ញាស្តីពីពានិជ្ជកម្មអាវុធ ។ អនុសញ្ញាស្តីពាណិជ្ចកម្មអាវុធ (ATT) ត្រូវបានអនុម័តកាលពីថ្ងៃទី០២ ខែ មេសា ឆ្នាំ២០១៣ នៅអង្គការសហប្រជាជាតិ នាក្រុងញូយ៉កសហរដ្ឋអាមេរិក។ប្រទេសកម្ពុជាបានចុះហត្ថលេខាលើអនុសញ្ញានេះនៅថ្ងៃទី១៨ខែតុលាឆ្នាំ២០១៣៕
