បាល់ទាត់៖ ការប្រកួតវគ្គ 16 ក្រុមចុងក្រោយជើងទីពីរ រាត្រីម្សិលម៉ិញនេះ ក្រុមម្ចាស់ផ្ទះ Barcelona ទទួលភ្ញៀវ Manchester City នៅ Nou Camp បន្ទាប់ពីឈ្នះនៅ Etihad 2-0។ ការប្រកួតក្នុងតង់ទីមួយក្រុមទាំងពីរមានឱកាសទៅវិញទៅមក ជាច្រើន លើកតែសុទ្ធតែមិនមានសំណាងដូចគ្នា
អូសបន្លាយចូលតង់ទីពីរទើបមានគ្រាប់ស៊ុតបញ្ចូលទីកើតឡើង។
នាទីទី 51 Lionel Messi បានស៊ុតទះផ្លាតមួយជើងតែ បាល់នោះប៉ះនឹងបង្គោលទី ខណៈដែលមួយនាទីក្រោយមក Eden Dzeko តែតមួយក្បាលពេញតែត្រូវ Victor Valdes ជួយបានយ៉ាងល្អ។ ការប្រកួតឈានដល់នាទីទី 67 Lionel Messi ក៏បំបែកពងមាន់បានសំរេចបន្ទាប់ពីការបញ្ជូនបាល់របស់ Cesc Fabregas ផ្លាតនឹង Joleon Lescott។ នាទីទី 89 Manchester City ក៏តាមស្មើបានសំរេចនៅពេលបាល់ជ្រុង Eden Dzeko តែត និង បន្ថែមដោយ Vincent Kompany ខណៈដែល Barcelona តវ៉ាថាបាល់នេះ Off-Side តែរូបភាពយឺតបានបញ្ជាក់ច្បាស់ថា បាល់នេះមិន Off-Side ឡើយ។ នៅក្នុងម៉ោងបន្ថែមបង្គ្រប់ Daniel Alves ក៏រកបានគ្រាប់ជ័យជំនះបន្ទាប់ពី Andres Iniesta ញាក់ដាច់អ្នកចាំទី Joe Hart បញ្ជូនអោយមិត្តរួមក្រុមយ៉ាងល្អ។ ចប់ការប្រកួត Barcelona ឈ្នះ 2-1 សរុបទាំងពីរជើង 4-1 ឈានចូលវគ្គ 8 ក្រុមចុងក្រោយ។
ចំណែកឯការប្រកួតមួយគូទៀតក្លឹបបារាំង PSG ទទួលភ្ញៀវ Leverkusen បន្ទាប់ពីជើងទីមួយ PSG ឈ្នះ 4-0 នៅទឹកដីអាល្លឺម៉ង់។ ការប្រកួតជើងទីពីរនេះ Leverkusen ហាក់ដូចជាមិនមានសង្ឃឹមរកវិញបួនគ្រាប់ទេ តែពួកគេអាចរក បានគ្រាប់នាំមុខមុននៅនាទីទី 6 ដោយការតែតបញ្ចូលទីរបស់ Sidney Sam តែមិនមានការត្រេកអរឡើយ។ មុនបាន ប៉ុន្មានផងនាទីទី 13 PSG ក៏តាមស្មើបានសំរេចដោយខ្សែការពារប្រេស៊ីល Marquinhos។ ឈានចូលតង់ទីពីរ PSG ក៏ សំរេចគ្រាប់ជ័យជំនះក្នុងជើងទីពីរនេះ ដោយកីឡាករអាហ្សង់ទីន Ezequiel Lavezzi នាទីទី 53 ចប់ការប្រកួត PSG ឈ្នះជើងទីពីរនេះទៀត 2-1 សរុបទាំងពីរជើង 6-1 ឈានចូលវគ្គ 8 ក្រុមចុងក្រោយ៕
