ខេត្តស្វាយរៀង រីឯលោកនាយរងផ្នែកការិយាល័យ រថយន្តពន្លត់អគ្គិភ័យ ត្រូវពសពឹសចឹកចំម្រាមជើង ខណៈចុះបំពេញបេសកកម្ម នៅស្រុករមាស់ហែក លោក រស់ ឆាយ អភិបាលរងខេត្តស្វាយរៀង បានជួបករណីគ្រោះថ្នាក់ចរាចរណ៍ រងរបួសធ្ងន់ធ្ងរ ខណៈពេលដែលរូបលោក បានចុះ
បំពេញបេសកកម្ម នៅស្រុករមាស់ហែក កាលពីវេលាម៉ោង៦ល្ងាច ថ្ងៃទី១៥ ខែធ្នូ ឆ្នាំ២០១៤ ស្ថិតនៅចំណុចគល់ស្ពានក្រសាំង ក្នុងភូមិព្រៃផ្តៀក ឃុំក្រសាំង ស្រុករមាស់ហែក ។
យោងតាមមន្ត្រីនគរបាល ស្រុករមាសហែក បានប្រាប់ឲ្យដឹងថា កាលពីរសៀលថ្ងៃទី១៥ ខែធ្នូ លោករស់ ឆាយ អភិបាលរងខេត្តស្វាយរៀង បានបើករថយន្តមួយគ្រឿង មួយបាំងកន្លះតែម្នាក់ឯង មកកាន់ស្រុករមាស់ហែក ដើម្បីបំពេញបេសកកម្ម ។
ប្រភពបន្តថា ខណៈបើកមកដល់ចំណុចកើតហេតុ ដោយផ្លូវក្រាលគ្រួសក្រហម សង្ស័យរថយន្តលោក រស់ ឆាយ រអឹលគ្រួស ក៏រ៉េចង្កួតទៅបុកបង្គោលបង្កាន់ដៃស្ពាន យ៉ាងពេញទំហឹង បណ្តាលឲ្យដៃចង្កួត អុកចំដើមទ្រូង រងរបួសធ្ងន់លើផ្ទៃមុខ ព្រមទាំងក សន្លប់ស្តូកស្តឹងតែម្តង ។ ក្រោយកើតហេតុ កម្លាំងកងរាជអាវុធហត្ថ ស្រុករមាស់ហែក បានសន្តោងរថយន្តភ្លាមៗ និងដឹកយកទៅសង្គ្រោះ នៅមន្ទីរពេទ្យខេត្តស្វាយរៀង ។
ដោយសារមុខរបួសលោក រស់ ឆាយ មានសភាពធ្ងន់ធ្ងរពេក ក្រុមគ្រួពេទ្យក៏បានឲ្យក្រុងគ្រួសារ បញ្ជូនបន្តទៅកាន់មន្ទីរពេទ្យព្រៃនគរ ប្រទេសវៀតណាមទាំងយប់តែម្តង ។ សូមបញ្ជាក់ថា ក្នុងថ្ងៃតែមួយនោះដែរ លោក សំ ស៊ាន ដែលគេស្គាល់ថា ជានាយរងផ្នែកការិយាល័យ រថយន្តពន្លត់អគ្គិភ័យ នៃស្នងការដ្ឋាននគរបាល ខេត្តស្វាយរៀង បានចុះទៅបំពេញបេសកកម្ម នៅស្រុករមាសហែក ដោយបានយករថយន្តពន្លត់អគ្គិភ័យ ទៅប្រចាំការនៅកន្លែងប្រារព្វព្រះរាជពិធី របស់ព្រះមហាក្សត្រ យាងជាព្រះរាជធិបតីដាំកូនឈើ និងព្រះរាជទាន
អំណោយ ដល់ប្រជារាស្ត្រនៅឃុំគគី និងឃុំត្រស់ ស្រុករមាសហែក ក៏ត្រូវពស់ពឹសមួយក្បាល ចឹកចំម្រាមជើងខាងស្តាំ រងរបួសធ្ងន់ធ្ងរ ត្រូវបានក្រុមរួមការងារ ដឹកយកទៅសង្គ្រោះនៅមន្ទីរពេទ្យ ខេត្តស្វាយរៀង ។ រហូតមកដល់វេលាម៉ោង ១២ថ្ងៃត្រង់ ថ្ងៃទី១៦ ខែធ្នូ ឆ្នាំ២០១៤ ជនរងគ្រោះនៅមិនទាន់បានធូរស្បាយនៅទ្បើយទេ ហើយត្រូវបានក្រុមគ្រូពេទ្យ បូមឈាមយកទៅពិសោធន៍ ដើម្បីរកថ្នាំបន្សាបជាតិពឹសនេះផងដែរ ៕