កំពង់ឆ្នាំង៖បទល្មើសនេសាទដាក់របាំងសាច់អូនវែងៗខុសច្បាប់ត្រូវបានគេមើលឃើញថា នៅតែកើតមានជាច្រើន ដដែលខណះដែលសមត្ថកិច្ចជំនាញបានចុះរបង្ក្រាបស្ទើរតែរៀងរាល់ថ្ងៃ ប៉ុន្តែក្រុមជនល្មើសនៅតែមិនញញើតនោះឡើយ។បទល្មើសខាងលើនេះត្រូវបានប្រជានេសាទនៅក្នុងមូលដ្ឋាន បាននាំក្រុមអ្នកកាសែតយើងទៅថតយករូបភាពនៅចំណុចអតីតឡូត៍នេសាទលេខ៥ព្រែកសាយ ដែលមាននៅចំណុចអូរទទឹង អូរទំនាប់រស់ កំពង់ឡាបព្រាប អូរអាឌី បាក់អង្រត់ ប្រយ៉ាបទាល់ និងព្រែកសាយ ដែលស្ថិតក្នុងភូមិសាស្ត្រស្រុកកំពង់លែងកាលពីព្រឹកថ្ងៃទី១៥ ខែធ្នូ ឆ្នាំ២០១៤ ដែលគេមិនដែលបានឃើញសមត្ថកិច្ចជំនាញចុះបង្ក្រាបនោះឡើយ។
ប្រភពពីប្រជានេសាទបានបង្ហើបអោយដឹងទៀតថា៖នៅចំណុចខាងលើនេះក្រុមជនល្មើសបានដាក់របាំងសាច់អួនក្រហមក្រឡាញឹកវែងៗខុសច្បាប់ជាច្រើនរបាំងចាប់ត្រីល្អិតៗ សកម្មភាពបទល្មើសនេសាទខាងលើនេះត្រូវបានគេដឹងថាមានអ្នកចេញមុខរត់ការឈ្មោះ ខ្ជិប បង់លុយអោយសមត្ថកិច្ចគ្រប់ជំនាញដើម្បីគេបានប្រមូលទិញផលត្រីពីក្រុមអ្នកនេសាទល្មើសច្បាប់ទាំងនោះ។អ្នកនេសាទទាំងនោះសុទ្ធសឹងជាប្រជាពលរដ្ឋមកពីស្រុកជីក្រែងខេត្តសៀមរាប។
ការឃុបឃិតបិទបាំងនៅបទល្មើសខាងចំណុចនេះត្រូវបានបងប្អូនប្រជានេសាទក្នុងមូលដ្ឋានដឹងឮហើយរាយការណ៍អោយអ្នកកាសែតយើង ខណះដែលពួកគាត់ធ្វើការនេសាទដើម្បីចឹញ្ចឹមឆ្នាំងត្រូវបានសមត្ថកិច្ចជំនាញមួយចំនួនចាប់រឹបអូសយកទូកក្តារអស់ ប៉ុន្តែបទល្មើសនេសាទធំៗ បែរជាសមត្ថកិច្ចជំនា ញគេមើលមិនឃើញទៅវិញ។
ទាក់ទងនិងបទល្មើសនៅចំណុចខាងលើនេះ លោក ពុំ សុផល នាយផ្នែករដ្ឋបាលជលផលកំពង់លែងបានឆ្លើយតាមរយះទូរសព្ទ័នៅថ្ងៃទី១៦ធ្នូ២០១៤នេះអោយដឹងថា៖បទល្មើសនៅចំណុចខាងលើនេះខាងលោកពុំបានដឹងឡើយ ករណីនេះលោកនិងរាយការជូនលោកនាយខណ្ឌ័រដ្ឋបាលជលផល នៅថ្ងៃស្អែក ហើយនិងដឹកនាំកម្លាំងសមត្ថកិច្ចចុះធ្វើការរុះរើកំទេចចោលបើសិនជាមានបទល្មើសទាំងនោះមែន។
ប្រជានេសាទនៅក្នុងមូលដ្ឋានរង់ចាំមើលថា៖តើការចុះបង្ក្រាបរបស់សមត្ថកិច្ចជលផលទទួលបានលទ្ធផលកំរិតណា ព្រោះកន្លងមកការចុះបង្ក្រាបបទល្មើសធ្វើមិនឈប់នោះឡើយ តែបទល្មើសនៅតែកើតមានរាប់មិនអស់ ចំណែកក្រុមជនល្មើសដូចជាមិនញញើតសមត្ថកិច្ចនោះឡើយព្រោះតែគេថាបានបង់លុយអោយសមត្ថកិច្ចជំនាញរួចហើយសង្ស័យថាពេលចុះទៅបង្ក្រាបៗតែខ្យល់នោះទេ៕ .