ភ្នំពេញ៖ នគរបាលព្រហ្មទណ្ឌខណ្ឌចំការមន បានបញ្ជាក់ថា ជនសង្ស័យដែលបានជិះម៉ូតូមួយគ្រឿង ឌុបគ្នា ធ្វើសកម្មភាពឆក់កាបូបបានសម្រេចនៅចំណុចជិតច្រមុះជ្រូកក្បាលថ្នល់នៅព្រឹកថ្ងៃទី ១៨ ខែធ្នូ ឆ្នាំ ២០១៤នេះ ត្រូវ កសាងសំណុំរឿងបញ្ជូនទៅសាលាដំបូងរាជធានីភ្នំពេញ
ដើម្បីអោយព្រះរាជអាជ្ញា នឹងចៅក្រមស៊ើបសួរ ផ្តន្ទាទោស តាមផ្លូវច្បាប់ ។
គួរបញ្ចាក់ថាជនសង្ស័យទាំង២នាក់ មានទី១ ឈ្មោះ ពេជ្រ ចន្ថា ភេទប្រុសអាយុ ៣១ ឆ្នាំ ស្នាក់នៅផ្ទះលេខ ៣ ផ្លូវជាតិលេខ ១ សង្កាត់ច្បារអំពៅទី១ ខណ្ឌច្បារអំពៅ មុខរបរជាងដែក ទី ២ឈ្មោះ ឡេង ថាវី ភេទប្រុស អាយុ ១៨ ឆ្នាំ ស្នាក់នៅផ្ទះគ្មានលេខ ផ្លូវជាតិលេខ ១ សង្កាត់ច្បារអំពៅទី១ ខណ្ឌច្បារអំពៅ។ ហើយពួកគេត្រូវឃាត់ខ្លួន បានកាលពីវេលាម៉ោង២១និង៣០នាទីយប់ថ្ងៃទី១៤ខែធ្នូឆ្នាំ២០១៤។
យោងតាមប្រភពព័ត៌មានពីកន្លែងកើតហេតុបានអោយដឹងថានៅមុនពេលកើតហេតុគេសង្គេតឃើញនារីម្នាក់ជិះម៉ូតូមួយគ្រឿងម៉ាកស្គុបពីជិះធ្វើដំណើរតាមបណ្តោយផ្លូវព្រះមុន្នីវង្ស ( ម្តុំបឹងត្របែក ) ខណៈនោះស្រាប់តែមានជនសង្ស័យ២នាក់ ខាងលើ ជិះម៉ូតូមួយគ្រឿងម៉ាកសង់សេ១១០ ( សង់ប៊ិច ) ពណ៌ខ្មៅពាក់ស្លាកលេខភ្នំពេញ1BQ-8423 ជិះឌុបគ្នាមកពីក្រោយនារីរងគ្រោះហើយធ្វើសកម្មភាពឆក់កាបូបលុយដែលនារីរងគ្រោះស្ពាយជាប់នៅនឹងស្មា
បានសម្រេចហើយជនសង្ស័យព្យាយាមបើករត់គេចខ្លួនប៉ុន្តែត្រូវបាននារីរងគ្រោះជិះដេញតាមពីក្រោយហើយស្រែកថា ( ចោរៗ ) បំណងអោយគេឯងជួយ។ភ្លាមៗនោះជនសង្ស័យទាំងពីរនាក់បានជិះម៉ូតូតាមបណ្តោយផ្លូវព្រះមុន្នីវង្សទិសដៅពីជើងទៅត្បូងបំណងឆ្ពោះឡើងទៅផ្លូវជាតិលេខ២ប៉ុន្តែជាអកុសលរំពេចភ្លាមនោះក៏មានក្រុមអ្នករត់ម៉ូតូឌុបប្រជាពលរដ្ឋជាពិសេស
អ្នកដំណើរទាំងអស់ដែលបានឃើញហេតុការណ៍បាននាំគ្នាជិះដេញតាមពីក្រោយរហូតដល់ចំណុចច្រមុះជ្រូកក្បាលថ្នល់ក៏ត្រូវស្ទាក់បានហើយនាំគ្នាព្រួតវាយម្នាក់មួយដៃមួយជើងបណ្តាលអោយជនសង្ស័យទាំង២នាក់រងរបួសធ្ងន់ធ្ងរឈាមហូរស្រោចពេញដងផ្ទៃមុខនឹងដងខ្លួន៕
