ខេត្តបន្ទាយមានជ័យ៖ប្រជាពលរដ្ឋជាង៤០គ្រួសាររស់នៅភូមិថ្នល់បត់ឃុំភ្នំតូចស្រុកមង្គលបុរីខេត្តបន្ទាយមានជ័យកំពុងតែរងការប៉ះពាល់ដល់សុខភាពយ៉ាងខ្លាំងនៅពេលដែលមានរោងម៉ាស៊ីនកិនស្រូវឈ្មោះហ្វានវុន បានធ្វើសកម្មភាពកិនស្រូវ បង្ហុយអង្កាមសាយភាយហើរប៉ើងតាមខ្យល់មកប៉ះពាល់នូវការ រស់នៅ ប្រចាំថ្ងៃរបស់ពួកគាត់ទីនោះ។
សកម្មភាពអាវីកម្មរបស់រោងម៉ាស៊ីន ស្រូវឈ្មោះហ្វាន វុន បង្ហុយ កម្ទេច អង្កាម មកលើប្រជាពលរដ្ឋបែបនេះ ត្រូវគេមើលឃើញថា កំពុងតែ បង្កឱ្យ មានផលប៉ះពាល់បរិស្ថានធ្ងន់ធ្ងរផងនោះទៀត ។ កូនក្មេងនិងមនុស្សចាស់មួយចំនួនកំពុងតែ ធ្លាក់ខ្លួនក្អកនិងថប់ផ្លូវដង្ហើមផងដែរ ។
បើតាមប្រភពព័ត៌មានពីប្រជាពលរដ្ឋរស់នៅក្បែររោងម៉ាស៊ីនស្រូវនោះប្រាប់ ឱ្យដឹងនៅរសៀលថ្ងៃទី២៥ ខែធ្នូនេះថា ការរស់នៅរបស់ពួកគាត់នៅពេលបច្ចុប្បន្ន គឺមាន ការលំបាកជាខ្លាំងរំខានដោយកម្ទេចអង្កាមហើរមកចូលក្នុងផ្ទះ ចូលទឹកពាង មិនតែប៉ុណ្ណោះ នៅពេលទទួលទានបាយក៏ត្រូវកម្ទេចអង្កាមហើរចូលក្នុងចានសម្ល និងបាយទៀតផងដែរ ។
ពួកគាត់លើកឡើងទៀតថា បញ្ហាកង្វល់ទាំងនេះពួកគាត់បានស្នើសុំទៅអាជ្ញាធរជួយ ដោះស្រាយធ្វើយ៉ាងណាឱ្យម្ចាស់រោងម៉ាស៊ីនទប់ស្កាត់តាមរបៀបណាក៏ដោយកុំឱ្យមានអង្កាមហ៊ុយមកលើការរស់នៅប្រជាពលរដ្ឋ ។ ប៉ុន្តែសំណើនោះមិនត្រូវអាជ្ញាធរចុះមកដោះស្រាយ និងណែនាំដល់ម្ចាស់រោងម៉ាស៊ីននោះឡើយ។
ប្រជាពលរដ្ឋរស់នៅបានរងគ្រោះជាច្រើនឆ្នាំ មកហើយ នៅពេលអាជ្ញាធរគេមិនដោះស្រាយឱ្យតើឱ្យពួកគាត់សង្ឃឹមអ្នកណាទៀត។ ប្រជាពលរដ្ឋបានលើកឡើងទៀតថា អាជីវកម្មកិនស្រូវបង្ហុយអង្កាមបស់រោងម៉ាស៊ីន ហ្វាន់ វុន ធ្វើឡើងទាំងថ្ងៃទាំងយប់ អង្កាមមិនត្រឹមហើរសាយភាយបង្កឱ្យប៉ះពាល់ដល់ មនុស្ស ចាស់ប៉ុណ្ណោះទេ ថែមទាំងប៉ះពាល់ដល់កូនក្មេងតូចៗទៀតផង។ ជាងនេះទៅទៀត មានប្រជា ពលរដ្ឋមួយចំនួនទ្រាំរស់នៅពុំបានអ្នកខ្លះក៏លក់ដីឱ្យម្ចាស់រោងម៉ាស៊ីននិងប្រជាពលរដ្ឋមួយ ចំនួនទៀតកំពុងតែត្រៀមបិទទ្វារផ្ទះរត់ចាកចេញទៅកន្លែងផ្សេងទៀត ។
ជុំវិញបញ្ហានេះ លោក ឡុង ពុន អភិបាលស្រុកមង្គលបុរីបានប្រាប់ឱ្យដឹងថា បញ្ហាកង្វល់របស់ប្រជាពលរដ្ឋរងគ្រោះពីអង្កាមកិនស្រូវរបស់រោងម៉ាស៊ីមហ្វាន វុន គឺលោកបាន ណែនាំឱ្យម្ចាស់ម៉ាស៊ីនកិនស្រូវសម្រួលដោះស្រាវបញ្ហាបច្ចេកទេសរោងម៉ាស៊ីន ធ្វើយ៉ាងណា កុំឱ្យមានអង្កាមបង្កឱ្យប៉ះពាល់ដល់ការរស់នៅរបស់ប្រជាពលរដ្ឋរួចហើយ។
បញ្ហានេះ លោក អភិបាលខេត្តក៏លើកឡើងក្នុងពិធីប្រកាសអភិបាលស្រុកឱ្យលោកមេឃុំ ជា សាង ដោះស្រាយ ជូនប្រជាពលរដ្ឋជាប្រញ៉ាប់ផងដែរ ។ កិច្ចការងារនេះលោកនឹងចុះតាមដានបន្ថែមទៀត មិនប្រងើយកន្តើយទុកឲ្យពួកគាត់រងគ្រោះបែបនេះបន្តនោះឡើយ ៕