ភ្នំពេញ៖យោងតាមការអះអាងពីលោក ឈឹម ប៊ុនរ័ត្ន អធិការរង នៃអធិការដ្ឋាននគរបាលខណ្ឌដង្កោ ទទួលផែនយុត្តិធម៌ប្រាប់កាលពីរសៀលថ្ងៃទី១៩ មីនា ២០១៤នេះថា ករណីប្លន់រថយន្តហាយប្រិច នៅតាមបណ្តោយផ្លូវជាតិលេខ៣ ក្បែរសាលាវិទ្យាល័យពងទឹក ក្នុងភូមិវត្តស្លែង សង្កាត់
ពងទឹក ខណ្ឌដង្កោ កាលពីវេលាម៉ោង១៥ និង១០នាទីថ្ងៃទី១៨ ខែមីនា ឆ្នាំ២០១៤ មិនមែនជាការពិតប្រាកដនោះទេ គឺជនរងគ្រោះបំបោងសភាពការ ដោយសារចាញ់ល្បែងអស់លុយពីខ្លួន ហើយណាមួយខ្លាចប្រពន្ធស្តីបន្ទោស ទើបរូបគេសំដែងឆាកល្ខោបបែបនេះឡើង ។
លោក ឈឹម ប៊ុនរ័ត្ន ប្រាប់បន្តថា កាលពីថ្ងៃកើតហេតុបន្ទាប់ពីឮព័ត៌មានករណីភ្ជង់ប្លន់រថយន្តហាយប្រិច ភ្លាមៗនោះកម្លាំងរបស់លោកទាំងអស់ សហការជាមួយកម្លាំងប៉ុស្តិ៍ ដោយមានការបញ្ជាផ្ទាល់ពីលោក យឹម សុជាតិ អធិការខណ្ឌដង្កោ បានចុះដល់ចំណុចកើតហេតុ ដើម្បីសួរនាំជនរងគ្រោះក្នុងការតាមស្វែងរកចាប់ខ្លួនក្រុមជនសង្ស័យយកមកផ្តន្ទាទោសតាមច្បាប់។ ប៉ុន្តែក្រោយពីសួរនាំនៅទីស្នាក់ការប៉ុស្តិ៍រដ្ឋបាលនគរបាលពងទឹក ជនរងគ្រោះបានរៀបរាប់ប្រាប់ទាំងរអាក់រអួលថា រូបគេត្រូវបានក្រុមជនល្មើសមានបក្ខពួក៤នាក់ ប្រើប្រាស់អាវុធខ្លី២ដើម មធ្យោបាយដោយរថយន្តលុយស៊ីស ៤៧០ ពណ៌ខ្មៅ គ្មានស្លាកលេខ ភ្ជង់ប្លន់យករថយន្តរបស់រូបគេម៉ាក ហាយប្រិច ពណ៌ស ពាក់ស្លាកលេខ ភ្នំពេញ 2X-7225 លុយចំនួន ១៣៤០ដុល្លា និងទូរស័ព្ទដៃចំនួន៣គ្រឿងផងដែរ។
លោកអធិការរងដដែលប្រាប់បញ្ជាក់ថា ដោយទទួលបានចម្លើយរអាក់រអួលបែបនេះពីជនរងគ្រោះ កម្លាំងរបស់លោកក៏បានប្រើជំនាញសួរនាំសារជាថ្មី ទើបជនរងគ្រោះសារភាពប្រាប់ថា ហេតុការណ៍ខាងលើនេះមិនមែនជាការភ្ជង់ប្លន់ស្អីនោះទេ គឺដោយសាររូបគេចាញ់ល្បែងខ្លាំងពេក ហើយណាមួយខ្លាចប្រពន្ធស្តីបន្ទោស ទើបរូបគេបែកគំនិតសំដែងឆាកល្ខោខនេះឡើង ដើម្បីកុំឲ្យអ្នកផ្ទះខឹង។ តាមពិតរថយន្តហាយប្រិចនោះត្រូវបានម្ចាស់បំណុលកាក់យកតាំងពីនៅខេត្តកំពង់ស្ពឺមកម្ល៉េះ ហើយរូបគេក៏បានជិះរថយន្តតាក់ស៊ីមកឈប់នៅក្បែរសាលាវិទ្យាល័យពងទឹក ផ្លូវជាតិលេខ៣ រួចស្រែកឆោរឡោថា មានចោរប្លន់រថយន្ត និងលុយកាក់ ព្រមទាំងទូរស័ព្ទរបស់រូបគេតែម្តង ដោយឃើញទីនោះស្ងាត់។
លោក ឈឹម ប៊ុនរ័ត្ន ប្រាប់បន្ថែមទៀតថា បន្ទាប់ពីទទួលបានចម្លើយដែលធ្វើឲ្យសមត្ថកិច្ចឈឺក្បាលបែបនេះ ទើបលោកជូនដំណឹងនេះបន្តទៅថ្នាក់លើសុំគោលការឃុំខ្លួនយុវជន ខាងលើនៅអធិការដ្ឋាននគរបាលខណ្ឌដង្កោ រយះពេលមួយយប់ ដើម្បីឲ្យគាត់មានការរាងចាល ឈប់បំបោងសភាពការដូចនេះតទៅទៀត។ យុវជនខាងលើត្រូវបានអនុញ្ញាត្តិឲ្យត្រឡប់ ទៅវិញទៅពេលធ្វើកិច្ចសន្យាត្រឹមត្រូវនៅចំពោះមុខសមត្ថកិច្ច។
សូមបញ្ជាក់ថា យុវជនកំហូចមានឈ្មោះ កៅ ស៊ីថៃ ភេទប្រុស អាយុ២៧ឆ្នាំ ជាមន្ត្រីយោធាភូមិភាគ៣ រស់នៅភូមិផ្សារចាស់ ឃុំស្វាយក្រវ៉ាន់ ក្រុងច្បារមន ខេត្តកំពង់ស្ពឺ ហើយពាក់ស្លាកលេខ ភ្នំពេញ 2X-7225 ដែលបំពាក់នៅលើរថយន្តហាយប្រិច ពណ៌សនោះ គឺជា ស្លាកលេខរថយន្ត Honda Acord របស់យុវជនកំហូចដដែល ប៉ុន្តែត្រូវបានគាត់លក់បាត់ហើយ គឺនៅសល់តែស្លាកលេខនេះ ដោយឡែករថយន្តហាយប្រិចនោះ គឺគាត់ទើបតែទិញមិនទាន់ ធ្វើស្លាកលេខនោះទេ៕
