សៀមរាប ៖ យ៉ាងហោចណាស់មនុស្សម្នាក់ បានស្លាប់ភ្លាមៗនៅនឹងកន្លែងកើតហេតុ និងម្នាក់ទៀតរងរបួសក្នុងករណីគ្រោះថ្នាក់ចរាចររណ៍វាងរថយន្ដ និងម៉ូតូខណៈកំពុងធ្វើដំណើរបញ្ច្រាសទិសគ្នានៅលើផ្លូវជាតិលេខ៦ កែងផ្លូវបេនឡានចុងកៅស៊ូក្នុងភូមិ ចុងកៅស៊ូ សង្កាត់ស្លក្រាម ក្រុងសៀមរាបកាលពីវេលាម៉ោង២១ និង៤៥នាទីយប់ថ្ងៃទី២៦ ខែមករា។
មន្ត្រីប៉ូលិសចរាចរណ៍ បានឲ្យដឹងថា ជនរងគ្រោះដែលស្លាប់មានឈ្មោះ មុត ម៉ាន់ ភេទប្រុស អាយុ ២៨ឆ្នាំ មានទីលំនៅភូមិព្រះអង្គធំ ឃុំខ្នងភ្នំ ស្រុកស្វាយលើ ខេត្តសៀមរាប ជាអ្នកជិះពីក្រោយ ចំណែកអ្នកបើកម៉ូតូ ឈ្មោះសិទ្ធ ភេទប្រុសអាយុ២៧ឆ្នាំរស់នៅភូមិឃុំជាមួយគ្នា។ អ្នកទាំង២នាក់ ជិះម៉ូតូម៉ាកហុងដាសេ១២៥ពណ៌ខ្មៅ បើកបរមកពីកើតទៅលិច ដើម្បីទៅមើលប្រពន្ធឆ្លងទន្លេនៅមន្ទីរពេទ្យគន្ធបុប្ផាមកដល់កន្លែងកើតហេតុបានបុកជាមួយនឹងរថយន្ដម៉ាកកាមរីឆ្លាមពណ៌ទឹកប្រាក់ ពាក់ស្លាកលេខ ភ្នំពេញ2Y 81.21 បើកបរដោយឈ្មោះ សណ្តា នី ភេទស្រីអាយុ ៣២ឆ្នាំរស់នៅភូមិជ្រៃ ឃុំកណ្តែក ស្រុកប្រាសាទបាគង ខេត្តសៀមរាបពីកើតមកលិច។
សមត្ថកិច្ច បានបន្ដថា ករណីគ្រោះថ្នាក់ចរាចរណ៍នេះក្រោយពីធ្វើការវាស់វែងរួចរាល់ កម្លាំងជំនាញបានយករថយន្ដ និងម៉ូតូព្រមទាំងអ្នកបង្កទៅកាន់ការិយាល័យនគរបាលចរាចរផ្លូវគោកនៃ ស្នងការ ខេត្តសៀមរាបដើម្បីរង់ចាំឲ្យដោះស្រាយតាមផ្លូវច្បាប់ ចំណែកសាកសព ត្រូវបានសមត្ថកិច្ចប្រគល់ជូនឲ្យបងប្អូនយកទៅធ្វើបុណ្យតាមប្រពៃណីរីឯអ្នករងរបួសត្រូវបានបញ្ជូនទោកាន់មន្ទីរពេទ្យ៕
ដោយ ខេង ឧត្តម