រថយន្តដឹកឈើប្រណិតមួយគ្រឿង ក្រឡាប់ផ្ងាជើងឡើងលើ បណ្តាលឲ្យអ្នករួមដំណើរ ចំនួន៥នាក់ រងរបួសស្រាល លុះព្រឹកឡើង ស្រាប់តែធ្លាយផ្ទះមួយខ្នង់ ដែលលាក់ឈើប្រណិត រាប់រយម៉ែត្រគីបផ្សេងទៀត ធ្វើឲ្យផ្អើលដល់មេព្រៃ សង្កាត់រដ្ឋាបាលព្រៃឈើស្វាយរៀង បានត្រឹមមកឈរមើល ។ 
បើតាមសមត្ថកិច្ច បានបង្ហើបឱ្យដឹងថា រថយន្តក្រឡាប់ក្អួតឈើប្រណិតនេះ កើតឡើងកាលពីវេលាម៉ោង1រំលងអាធ្រាត ថ្ងៃទី២៩ ឈានចូលថ្ងៃទី៣០ មករា ២០១៥ នៅចំណុចផ្លូវលំ ស្ថិតនៅក្នុងភូមិស្វាត សង្កាត់ចេក ក្រុងស្វាយរៀង ។ រថយន្តដែលក្រឡាប់ឈើនេះ ម៉ាក់ហ៊ីយិនដាយ ពាក់ស្លាក់លេខ ស្វាយរៀង 3A-0643 រហូតមកដល់ម៉ោង11និង18នាទីព្រឹក ថ្ងៃទី30 ខែមករា ក៏មានមន្ត្រីកងរាជអាវុធហត្ថ ខេត្តស្វាយរៀងម្នាក់ ដែលគេស្គាល់ថា ឈ្មោះ ឈឿន បានមកអះអាងថា ឈើប្រណិតទាំងនេះ ដឹកយកទៅធ្វើបន្ទាយ កងរាជអាវុធហត្ថ។ ហើយដឹកវង្វេងផ្លូវ ទើបមកក្រឡាប់ដូចច្នេះ ក៏ប៉ន្តែក្រុមកម្មករតាមរថយន្ត និយាយថា ឈើប្រណិតនេះ គឺដឹកទៅដាក់ផ្ទះក្បឿង នៅខាងជើងកន្លែងរថយន្តក្រឡាប់ ប្រហែលមួយរយម៉ែត្រ ដែលស្ថិតនៅក្នុងភូមិស្វាត សង្កាត់ចេក ក្រុងស្វាយរៀង។ 
ទាក់ទិនករណីខាងលើនេះដែរ លោក យូ វៃ ប្រធានផ្នែករដ្ឋបាលព្រៃឈើស្វាយរៀង បានឲ្យដឹងថា លោកកំពុងស្រាវជ្រាវរកម្ចាស់ឈើ ឲ្យមកទទួលខុសត្រូវ និងអង្កេតមើល ក្រែងគេមានច្បាប់អនុញ្ញាត្តិឈើច្រើនបែបនេះ។ មិនមែនដូចមន្ត្រីកងរាជអាវុធហត្ថ អះអាងនោះទេ ម្នាក់ថាឈើនេះ យកទៅធ្វើបន្ទាយ ឯម្នាក់ទៀត និយាយថាយកទៅធ្វើផ្ទះ ហើយឈើច្រើនបែបនេះ មិនដឹងថា គេយកទៅណាឲ្យពិតប្រាកដនោះឡើយ ។
រីឯមហាជននិយាយថា រថយន្តដឹកឈើទាំងនេះ គឺបានដឹកបំផ្លាញផ្លូវលំ និងស្ពានលូ ហើយរថយន្តដែលក្រឡាប់នេះ គឺមករបាក់ដីបែកលូកាត់ថ្នល់ ទើបក្រឡាប់ ហើយក៏ធ្លាយផ្ទះស្តុកឈើប្រណិត មានឈើសុក្រម និងបេង នាងនួន ឡៅជា ក្តាងឿ ប្រវែង២ម៉ែត្រ ទទឹង១ម៉ែត្រ កម្រាស់១តឹក និងសរសរ ននងរាប់រយម៉ែត្តគីប
ហើយសមត្ថកិច្ចមេព្រៃ និងនគបាលសេដ្ឋកិច្ច ស្នងការនគបាលខេត្ត បានចុះទៅពិនិត្យរថយន្ត ដែលក្រឡាប់តែមិនហ៊ានចូលទៅពិនិត្យផ្ទះ ដែលស្តុកឈើនោះទេ បានត្រឹមតែឈរមើលពីចម្ងាយប៉ុណ្ណោះ ៕
