ខេត្តសៀមរាប ៖ នគរបាល បានចាប់ខ្លួន ជនសង្ស័យ ក្នុងក្រុងសៀមរាប២នាក់ក្នុង ចំណោម៤នាក់ បញ្ជូន ទៅតុលការ ។ ហេតុការណ៍ ចាប់ខ្លួនកាលពីម៉ោង៣ និង៣០នាទីរសៀល ថ្ងៃទី៣០ ខែមករា ឆ្នាំ២០១៥នៅក្នុងក្លឹបកីឡាបាល់ទាត់ ក្នុងភូមិស្ទឹងថ្មី សង្កាត់ស្វាយដង្គំ ខណៈពូកគេកំពុង តែលេងបាល់ទះ ។
មន្ត្រីនគរបាល មូលដ្ឋាន បានឲ្យដឹងថា មុនពេល កើតហេតុជនរងគ្រោះ ២នាក់ប្តីប្រពន្ធ បានជិះម៉ូតូឌុបគ្នាចេញពីផ្សារលើធំថ្មី ត្រូវបានជនសង្ស័យ ខាងលើឆក់ខ្សែ.កពីប្រពន្ធ នៅចំនុចជិតផ្លូវកែង បត់មកពីផ្សារធំថ្មី បានសម្រេចក៏គេចខ្លួន បាត់ស្រមោលតែម្តង រួចបន្តទៅឆក់នៅមុខភូមិភាគតែមិនបានសម្រេចក៏ជិះម៉ូតូគេចខ្លួនបាត់។
មន្ត្រីនគរបាល បន្ថែមថា ជនរងគ្រោះទាំងពីនាក់មានឈ្មោះស៊ាង សីហា ភេទប្រុស អាយុ២៤ឆ្នាំ(ប្តី) និងប្រពន្ធជិះម៉ូតូពីក្រោយឈ្មោះឃឿន ចាន់រស្មី អាយុ២៨ឆ្នាំ រស់នៅភូមិត្រពាំងត្រែង សង្កាត់សាលាកំរើក ក្រុងសៀមរាប ដែលជនសង្ស័យឆក់ខ្សែកបានសម្រេចនោះមានទម្ងន់ប្រាំជី ។ ជនរងគ្រោះម្នាក់ទៀតឈ្មោះហេង ចំរើន ភេទស្រី អាយុ៣០ឆ្នាំ រស់នៅភូមិខ្វៀន សង្កាត់គោកចក ក្រុងសៀមរាប ដែលជនសង្ស័យបានបើកម៉ូតូក្នុងទិសដៅស្របគ្នារួចទៅអែបម៉ូតូជនរងគ្រោះក៏ធ្វើសកម្មភាពឆក់កន្ទ្រាក់ខ្សែកមាស១ខ្សែពីជនរងគ្រោះ តែមិនបានសម្រេច ក៏ជិះម៉ូតូគេចបាត់ ។
ចំណែកជនសង្ស័យទាំង២នាក់ដែលចាប់ខ្លួនបានមានឈ្មោះឆេង បូរា ភេទប្រុស អាយុ២៧ឆ្នាំ ស្នាក់នៅបន្ទប់ជួលភូមិគោកដូង សង្កាត់ទឹកវិល ក្រុងសៀមរាប បានធ្វើសកម្មភាពជិះម៉ូតូម៉ាកស៊ីប៊ីអ(CBR)ពណ៌ឈាមជ្រូកលាយខ្មៅ គ្មានស្លាកលេខ និងម្នាក់ទៀតឈ្មោះមាឃ សំណាងភក្តី ភេទប្រុស អាយុ១៨ឆ្នាំ ដែលទើបមកពីភ្នំពេញមកស្នាក់នៅបន្ទប់ជួល សង្កាត់គោកចក បានធ្វើសកម្មភាពជិះម៉ូតូម៉ាកអេសអិល ពណ៌ខ្មៅ ពាក់ស្លាកលេខ ភ្នំពេញ១AO-៩៦០៩ ព្រមទាំងបក្សពួក២នាក់ទៀតឈ្មោះឌី និងឈ្មោះឡៃ បានជិះម៉ូតូម៉ាកនិច ពណ៌ស គេចខ្លួនបាត់តែម្តង ។លោកបន្ថែមថា ក្រោយពីឃាត់ខ្លួនបានជនសង្ស័យ២នាក់មកក៏បានធ្វើការដកហូតវត្ថុតាងប្រគល់ឲ្យទៅម្ចាស់ដើមវិញ ។