ភ្នំពេញ៖អ្នកញៀនល្បែងជល់មាន់១៤នាក់ នគរបាលខណ្ឌសែនសុខនឹងកសាងសំណុំរឿងបញ្ជូនទៅកាន់សាលាដំបូងរាជធានីភ្នំពេញ នាព្រឹកថ្ងៃទី៣ ខែកុម្ភះ ឆ្នាំ២០១៥ ដើម្បីផ្តន្ទាទោសតាមច្បាប់ នេះបើយោងតាមការឲ្យដឹងពីមន្ត្រីនគរបាលខណ្ឌសែនសុខប្រាប់កាលពីព្រឹកថ្ងៃទី២ កុម្ភៈ ២០១៥។
អ្នកញៀនល្បែងជល់មាន់ទាំង១៤នាក់ ដែលត្រូវឃាត់ខ្លួន ទី១ឈ្មោះ ស្រេង លីហួង ភេទប្រុស អាយុ៣១ឆ្នាំ ទី២ឈ្មោះ គ្រី សុភាស់ ភេទប្រុស អាយុ៣០ឆ្នាំ ទី៣ឈ្មោះ សុខ ឡេង ភេទប្រុស អាយុ៣០ឆ្នាំ ទី៤ឈ្មោះប៉ុង នឿន ភេទប្រុស អាយុ៣៥ឆ្នាំ ទី៥ឈ្មោះ ហេង អេង ហ៊ាង ភេទប្រុស អាយុ៣០ឆ្នាំ ទី៦ឈ្មោះ ប៉ែន ថៃ ភេទប្រុស អាយុ៣០ឆ្នាំ ទី៧ឈ្មោះ ឌឿន សុខា ភេទប្រុស អាយុ៣៣ឆ្នាំ ទី៨ឈ្មោះ យ៉េប រ៉ូហ្វី ភេទប្រុស អាយុ២៩ឆ្នាំ ទី៩ឈ្មោះ ទា រដ្ឋា ភេទប្រុស អាយុ៣៦ឆ្នាំ ទី១០ឈ្មោះ ជា សុខង៉ោល ភេទប្រុស អាយុ២៨ឆ្នាំ ទី១១ឈ្មោះ យ៉ាង ប៉េវ ភេទប្រុស អាយុ៣៤ឆ្នាំ ទី១២ឈ្មោះ សៀង ចន្ធូ ភេទប្រុស អាយុ៣១ឆ្នាំ ទី១៣ឈ្មោះ ហេង រ៉ាម៉ី ភេទប្រុស អាយុ២១ឆ្នាំ និងទី១៤ឈ្មោះ យ៉ា ណារិទ្ធ ភេទប្រុស អាយុ៣០ឆ្នាំ ។
មន្ត្រីនគរបាលខណ្ឌសែនសុខប្រាប់បន្តឲ្យដឹងថា អ្នកញៀនល្បែងជល់មាន់ទាំង ១៤ នាក់ ត្រូវបានបង្ក្រាបកាលពីវេលាម៉ោង ១១និង៣០នាទី ថ្ងៃទី៣១ ខែមករា ឆ្នាំ២០១៥ នៅចំណុចទីវាលដីឡូត៍មួយកន្លែង ស្ថិតនៅភូមិឃ្មួញ សង្កាត់ឃ្មួញ ខណ្ឌសែនសុខ រាជធានីភ្នំពេញ ដឹកនាំដោយលោក ម៉ក់ ហុង អធិការខណ្ឌសែនសុខ ក្នុងនោះដកហូតវត្ថុតាងរួមមាន ម៉ូតូ ០៥គ្រឿង លុយ ៨០០០០០ រៀល ទូរស័ព្ទដៃ ០៥គ្រឿង ខ្នាយ ០១គូរ មាន់គក ០៣ក្បាល (ក្នុងនោះងាប់០១ក្បាល) ។ ក្រោយពីបង្ក្រាបបានមនុស្សពាក់ព័ន្ធ និងវត្ថុតាងទាំងអស់ ត្រូវបាននាំមកធ្វើការសាកសួរនៅអធិការដ្ឋាននគរបាលខណ្ឌសែនសុខ ដើម្បីចាត់ការតាមនិតិវិធី។
មន្ត្រីនគរបាលខណ្ឌសែនសុខប្រាប់បញ្ជាក់ឲ្យដឹងថា ការចុះបង្ក្រាបក្រុមអ្នកញៀនល្បែង ជល់មាន់ទាំងនេះ គឺបន្ទាប់ពីទទួលបានព័ត៌មានពីប្រជាពលរដ្ឋល្អប្រាប់ថា មានករណីលួចជល់មាន់ នៅទីតាំងខាងលើ ទើបកម្លាំងចុះទៅឡោមព័ទ្ធទីតាំងនោះ រហូតឃាត់បានមនុស្សទាំង ១៤ នាក់ រួមទាំងវត្ថុតាងពាក់ព័ន្ធទាំងអស់តែម្តង៕