ឈើចុងមួយតឹក ដឹកចេញពីតំបន់ជួរភ្នំក្រវ៉ាញ ខេត្តពោធិ៍សាត់ ឆ្លងកាត់តាមភូមិសាស្ត្រ ភូមិក្តុល ឃុំក្រាំងស្គារ ស្រុកទឹកផុស ខេត្តកំពង់ឆ្នាំង ដើម្បីលក់ចែកចាយ និងអារជ្រៀកជាគ្រឿង ក្នុងរោងម៉ាស៊ីនអារឈើ មួយកន្លែងក្នុងភូមិសាស្ត្រ ស្រុករលាប្អៀរ ។
ប្រជាពលរដ្ឋបានអោយដឹងថា ជារៀងរាល់ថ្ងៃ មានឈ្មួញដឹកឈើ តាមគោយន្តកន្ត្រៃ និងរទេះគោ ក្រីបី ចេញពីតំបន់ខាងលើ ដោយពួកគេបានប្រមូលទិញឈើ មិនទាន់គ្រប់អាយុចុង១តឹកដែលក្រុមឈ្មួញ បានធ្វើ កាប់និងដឹកចេញ ពីតំបន់ភ្នំយ៉ោក ដែលជាដែនជំរកសត្វព្រៃភ្នំឱរ៉ាល់ ក្នុងស្រុកក្រគរ ខេត្តពោធិសាត់ មកលក់បន្ត ទំលាក់អោយក្រុមឈ្មួញ និងឆ្ពោះទៅកាន់គោលដៅតាមការគ្រោងទុករបស់គេ ដែលក្នុងមួយថ្ងៃៗ គេបានឃើញគោយន្ត រទេះគោ-ក្របី ដឹកឈើចេញបន្តកន្ទុយគ្នា យ៉ាងគគ្រឹកគ្រេង ប៉ុន្តែគេពុំទាន់ឃើញមានសមត្ថកិច្ចរដ្ឋបាលព្រៃឈើ ឬសមត្ថកិច្ចជំនាញពាក់ព័ន្ធណាមួយ ចេញមកបង្ក្រាប អោយមានប្រសិទ្ធិភាពនៅឡើយទេ ។
ប្រភពគួរអោយទុកចិត្ត ពីប្រជាពលរដ្ឋ បានអោយដឹងថា ការចរាចរណ៍បានយ៉ាងរលូនបែបនោះ គ្មានការបង្ក្រាបពីសមត្ថកិច្ចពាក់ព័ន្ធ ដោយសារក្រុមឈ្មួញ មានទំនាក់ទំនងល្អ និងបង់លុយអោយសមត្ថកិច្ច ដែលគេស្គាល់ឈ្មោះថា ឃ្លោក ស្រឿង ហៅ គា មានមុខងារជាប្រធាន ការិយាល័យព្រហ្មទណ្ឌកម្រិតធ្ងន់ នៃស្នងការដ្ឋាននគរបាល ខេត្តកំព់ឆ្នាំង កាន់លិខិតបេសកកម្ម ចេញដោយស្នងការនគរបាល ខេត្តកំពង់ឆ្នាំង លោក ប្រាក់ វុឌ្ឍី ដើម្បីធ្វើការបង្ក្រាបបទល្មើស ។ ហើយក្រុមឈ្មួញទាំងនោះ បង់លុយអោយលោក ឃ្លោក ស្រឿង ពី៤ម៉ឺន ទៅ៥ម៉ឺនរៀល សម្រាប់ឈើចុង១តឹក ក្នុង១រទេះ ។
ករណីខាងលើនេះ ប្រជាពលរដ្ឋ បានរិះគន់ថា សមត្ថកិច្ចឈរជើងតាមដងផ្លូវ បណ្តាក់គ្នាដូចខ្យង ប៉ុន្តែការដឹកជញ្ជូនឈើខុសច្បាប់ នៅតែបន្តបានយ៉ាងរលូន រហូតដល់គោលដៅ មិនមានការរំខានអ្វីទាំងអស់ ។
ពាក់ព័ន្ធពត៌មានខាងលើ ប្រជាពលរដ្ឋសុំសំណូមពរ ដល់អាជ្ញាធរខេត្ត និងមន្ត្រីពាក់ព័ន្ធថ្នាក់លើ មេត្តាពិនិត្យមើលឡើងវិញផង ក្នុងករណីនេះ ៕