(ឧត្តរមានជ័យ)៖ប្រជាពលរដ្ឋជាច្រើននាក់បាននាំគ្នាបើកគោយន្តកន្ត្រៃដើររកស៊ីឈ្នួលដកដំឡូងមីឲ្យគេនៅតាមស្រុកមកដល់ផ្លូវកោងមិនប្រយ័ត្នបត់ខ្លាំងពេកក្រឡាប់ចាក់មនុស្សចោលពេញប្រឡាយទឹក បណ្តាលឲ្យរងរបួសធ្ងន់និងស្រាល៧នាក់។ហេតុការគ្រោះថ្នាក់ចរាចរណ៍ក្រឡាប់គោយន្តកន្ត្រៃបណ្តាលឲ្យរងរបួសធ្ងន់និងស្រាល៧នាក់នោះបានកើតឡើងកាលពីវេលាម៉ោង១២និង២០នាទីថ្ងៃទី៤ ខែកុម្ភះឆ្នាំ២០១៥នៅផ្លូវជាតិលេខ៦៧Bស្ថិតនៅក្នុងភូមិលំទងថ្មី ឃុំលំទង ស្រុកអន្លង់វែង ខេត្តឧត្តរមានជ័យ។សមត្ថកិច្ចប៉ូលិសចរាចរណ៍ស្រុកអន្លង់វែងបានឲ្យដឹងថា មូលហេតុដែលបណ្តាលឲ្យក្រឡាប់គោយន្តនោះ ដោយពួកគាត់បើកគោយន្តមិនមើលផ្លាកសញ្ញាផ្លូវបត់ ហើយពួកគាត់បើកគោយន្តលឿនពេកទើបមកដល់ផ្លូវបត់ ក៏ត្រូវក្រឡាប់តែម្តងទៅ។សមត្ថកិច្ចប៉ូលិសបានបន្តទៀតថា ប្រជាពលរដ្ឋដែលរងរបួសធ្ងន់និងស្រាល ដោយសាករណីក្រឡាប់គោយន្តកន្ត្រៃនោះ ទី១ឈ្មោះយុទ្ធ យូន ភេទប្រុសអាយុ១៩ឆ្នាំរងរបួសធ្ងន់ ទី២ឈ្មោះយឿន ម៉ូដ ភេទស្រីអាយុ៤១ឆ្នាំរងរបួសស្រាល ទី៣ឈ្មោះណាវ ម៉េច ភេទស្រីអាយុ២១ឆ្នាំរងរបួសធ្ងន់ ទី៤ឈ្មោះណាវ ម៉ៃ ភេទស្រីអាយុ១៥ឆ្នាំរងរបួសស្រាល ទី៥ឈ្មោះភ័ន ស ភេទស្រីអាយុ១៧ឆ្នាំរងរបួសធ្ងន់ ទី៦ឈ្មោះសែប សិទ្ធ ភេទប្រុសអាយុ១៧ឆ្នាំរងរបួសស្រាល ទី៧ឈ្មោះប៉ុន សែប ភេទប្រុសអាយុ២៦ឆ្នាំរងរបួសស្រាល អ្នកទាំង៧នាក់នោះរស់នៅភូមិរវាង ឃុំខ្វាវ ស្រុកជីក្រែង ខេត្តសៀមរាប ហើយនៅពេលបច្ចុប្បន្ន ប្រជាពលរដ្ឋទាំង៧នាក់ដែលរងគ្រោះថ្នាក់ក្រឡាប់គោយន្តនោះត្រូវបានសំរាកព្យាបាលនៅមន្ទីរពេទ្យបង្អែកស្រុកអន្លង់វែង។សមត្ថកិច្ចប៉ូលិសបានបន្តឲ្យដឹងទៀតថា ប្រជាពលរដ្ឋដែលរងគ្រោះថ្នាក់ខាងលើនោះ នៅក្នុងស្រុករបស់ពួកគាត់ បន្ទាប់ពីប្រមូលផលរួច ពួកគាត់ក៏នាំគ្នាជិះគោយន្ត មករកស៊ីឈ្នួលដកដំឡូងមីឲ្យគេនៅតាមបណ្តាលស្រុកនានា នៅក្នុងខេត្តឧត្តរមានជ័យនោះ៕(ដោយចាន់ ធី)