ខេត្កព្រះវិហារភូមិសាស្ដ្រគម្របព្រៃឈើពណ៌បៃតងជាប់ព្រៃឈើហ៊ុបព្រៃព្រះរការសំបូរទៅដោយឈើប្រណីតបេងធ្នង់នាងនួននិងឈើគគីររាប់លានដើមស្ថិតនៅជាប់ឃុំពោធិ៍និងឃុំប្រមេរស្រុកត្បែងមានជ័យកំពុងទទួលរងនូវការកាប់បំផ្លាញដល់ឬសគល់យ៉ាងយូរនៅត្រឹម២ឆ្នាំខាងមុខនេះដោយមានរណាយន្តត្រង់សឺណឺប្រមាណ៣០០គ្រឿងកំពុងអារបំផ្លាញព្រៃឈើល្អៗទាំងនោះ។
តាមសេចក្ដីរាយការណ៍ពីភ្នាក់ងារបានអោយដឹងថាទាំងជនស៊ីវិលនិងសមត្ថកិច្ចមូលដ្ឋានខិលខូចប្រមាណ២០០នាក់បាននាំគ្នាដេកស្នាក់នៅក្នុងតំបន់ព្រៃអូរប៉េសជាប់តំបន់គម្របព្រៃឈើការពារនិងអភិរក្សស្រុកឆែបនិងព្រៃព្រះរការជាអចិន្ត្រៃយ៍ដើម្បីអារបំផ្លាញព្រៃឈើស្ទើរហិនហោចអស់ដើម្បីទុកលក់អោយឈ្មួញកណ្តាលមកពីរាជធានីភ្នំពេញខេត្តកំពង់ធំនិងនៅក្នុងក្រុងព្រះវិហារផ្ទាល់តែម្ដង។សកម្មភាពកាប់បំផ្លាញព្រៃឈើពីសំណាក់ក្រុមជនខិលខូចទាំងនេះកាន់តែមានសភាពខ្លាំងក្លាទ្បើងៗចាប់តាំងពីឆ្នាំ២០០៨រហូតមកដល់ឆ្នាំ២០១៥នេះ។
បច្ចុប្បន្ននេះគេដឹងឮគ្រប់ៗគ្នាថាហាងឆេងទីផ្សារទិញលក់ឈើប្រណីតប្រភេទសន្លឹកនៅទូទាំងខេត្តគឺគ្រាន់តែឈើបេង១សន្លឹកប្រវែង៣ម៉ែត្រកំរ៉ាស់១តឹកនិងមុខកាត់១ម៉ែត្រវាមានតំលៃរហូតដល់៦ពាន់ដុល្លារអាមេរិកឯណោះហើយពេលខ្លះម្ចាស់ឈើមិនលក់ទៀតផងរីឯឈើធ្នង់ទំហំប៉ុនគ្នាវាមានតំលៃប្រមាណ៥ពាន់ដុល្លារអាមេរិក។ចំពោះសាទ្បុងមានក្បាច់រចនាធ្វើពីឈើប្រណីត១ឈុតវាមានតំលៃជាង៨ពាន់ដុល្លារអាមេរិកថែមទៀតហើយខេត្តព្រះវិហារក្លាយជាខេត្តឈានមុខគេក្នុងការផ្គត់ផ្គង់លក់ចេញគ្រឿងសង្ហារឹមប្រណីតៗទាំងនេះ។
ប្រជាពលរដ្ឋក្នុងមូលដ្ឋានបានរាយការណ៍អោយដឹងថាសមត្ថកិច្ចមូលដ្ឋាននិងសមត្ថកិច្ចចល័តរួមមានប៉េអឹម,នគរបាលសេដ្ឋកិច្ចក្រសួងខេត្ត,មន្ដ្រីដឺបេយោធាប្រមាណ២០នាក់ប្រចាំការក្នុងមូលដ្ឋានសុទ្ធតែជាអ្នកកាងម៉ាស៊ីនយន្ដត្រង់សឺណឺដោយដឹងថាក្នុង១គ្រឿងត្រូវបង់លុយអោយពួកគេក្នុង១អង្គភាព៦០ម៉ឺនរៀលហើយរាល់ពេលដឹកឈើចូលក្នុងក្រុងព្រះវិហារយកទៅកែច្នៃតាមរោងសិប្បកម្មមិនស្របច្បាប់ប្រមាណ៥០កន្លែងត្រូវបង់ក្បាលទ្បាននិងម៉ូតូផ្សេងទៀត។នេះជាករណីព្រួតគ្នាជំរិតទារលុយពីក្រុមឈ្មួញឈើតែម្ដងបើមិនបង់លុយតាមការទាមទារទេគឺច្បាស់ជាក្រុមសមត្ថកិច្ចគំរាមចាប់ចងប្រគល់អោយជំនាញមេព្រៃមិនខានទ្បើយ៕
