កាលពីវេលាម៉ោងជាង១រសៀល ថ្ងៃទី១១ ខែកុម្ភៈ ឆ្នាំ២០១៥ បុរសម្នាក់ បានសន្លប់ស្តូកស្តឹង និងបានស្លាប់នៅពេលបញ្ជូនទៅដល់មន្ទីរពេទ្យបង្អែក ស្រុកប្រតិបត្តិកំពង់ត្រឡាច បន្ទាប់ពីបុរសរូបនេះ បានងោកធ្លាក់ពីលើរថយន្ត ពេលកំពុងធ្វើដំណើរ ។ ហេតុការណ៍នេះ បានកើតឡើង នៅតាមបណ្តោយផ្លូវជាតិលេខ៥ ស្ថិតនៅក្នុងភូមិអូរូង ឃុំឈូកស ស្រុកកំពង់ត្រឡាច ខេត្តកំពង់ឆ្នាំង ។
លោក ហ៊ុល វាសនា អធិការនគរបាល ស្រុកកំពង់ត្រឡាច បានឲ្យដឹងថា ជនរងគ្រោះមិនត្រូវបាន ស្គាល់អត្តសញ្ញាណនៅឡើយទេ ដោយសារជនរងគ្រោះ សន្លប់អត់ដឹងខ្លួន រហូតដល់វេលាម៉ោងប្រមាណជាង៤រសៀល បុរសរូបនេះ បានស្លាប់នៅនឹងមន្ទីរពេទ្យបង្អែក ស្រុកប្រតិបត្តិស្រុកកំពង់ត្រឡាច ប៉ុន្តែភិនភាគជនរងគ្រោះ មានភិនភាគជាជនជាតិវៀតណាម ។
លោកបានឲ្យដឹងទៀថា មុនដំបូង ជនរងគ្រោះបានជិះរថយន្តមួយគ្រឿង ពីផ្សារពន្លៃ ស្រុកបរិបូរណ៌ បំណងទៅរាជធានីភ្នំពេញ ។ លុះពេលដល់ចំណុចកើតហេតុ ស្រាប់តែជនរងគ្រោះ បានធ្លាក់ពីលើរថយន្តបណ្តាលអោយរងរបួសធ្ងន់ រហូតដល់សន្លប់ស្តូកស្តឹងតែម្តង និងបានស្លាប់ នៅពេលបញ្ជូនដល់មន្ទីរពេទ្យ ។
នៅពេលដែលជនរងគ្រោះធ្លាក់ពីលើរថយន្ត ម្ចាស់រថយន្តបានឈប់ចុះមើលមួយភ្លែតដែរ ហើយបានទ្បើងរថយន្ត បើករត់គេចតែម្តង តែត្រូវកម្លាំងនគរបាល ស្រុកកំពង់ត្រឡាច ដេញតាមពីក្រោយ រហូតដល់ទឹកដីខេត្តកណ្តាល ម្ចាស់រថយន្ត បានឈប់រថយន្តចោល ហើយរត់គេចខ្លួនបាត់តែម្តង ។ក្រោយពេលកើតហេតុ សមត្ថកិច្ចក៏បានស្រាវជ្រាវរកសាច់ញាតិ របស់ជនរងគ្រោះ ដើម្បីប្រគល់សពធ្វើបុណ្យតាមប្រពៃណី ៕