កម្មករ កម្មការនី រោងចក្រ វ៉ាន់ធីជ រីវើ ថេកស្ថាយ ចំនួន ៥០ នាក់ នាព្រឹកថ្ងៃទី ១២ ខែ កុម្ភៈ ឆ្នាំ ២០១៥ នេះ បាននាំគ្នាធ្វើកូដកម្មមិនចូលធ្វើការ ក្នុងគោលបំណងទាមទារអោយថៅកែរោងចក្រទទួលយកតំណាងរបស់ខ្លួនម្នាក់ឈ្មោះ សុគន្ធ សុគន្ធា ដែលត្រូវបានបញ្ឈប់ពីការងារថ្មីៗនេះ អោយចូលធ្វើការវិញ ។
កម្មករម្នាក់ឈ្មោះសុធាវី ក្នុងចំណោមកម្មករដែលធ្វើការតវ៉ាបាននិយាយរៀបរាប់ប្រាប់សារព័ត៌មានកាសែតទូរទស្សន៍ថា ការបញ្ឈប់តំណាងកម្មករឈ្មោះ សុគន្ធ សុគន្ធា ពីសំណាក់ថៅកែរោងចក្រ វាជារឿងមិនត្រឹមត្រូវនោះឡើយ ពីព្រោះថា តំណងកម្មកររូបនេះ មិនបានធ្វើអ្វីខុសពីគោលការណ៍របស់ក្រុមហ៊ុនឡើយបែទៅជាត្រូវគេចោទប្រកាន់ថា ជាមេក្លោងបំផុសបំផុលដល់កម្មករជាហេតុធ្វើអោយមានភាពស្មុគស្មាញដល់ក្រុមហ៊ុន ហើយក្រុមហ៊ុនក៏បានយកលេះបែបនេះធ្វើការបញ្ឈប់តំណាងកម្មករនោះតែម្តងទៅ ដោយគោលដៅរបស់ក្រុមហ៊ុនគឺមានបំណងមិនចង់អោយមានតំណាងកម្មករ ឬ សហជីពដឹកនាំកម្មករនៅក្នុងរោងចក្រនោះឡើយ ។
តំណាងកម្មករបានបញ្ជាក់ទៀតថា គោលបំណងរបស់ពួកគាត់ដែលមកធ្វើការតវ៉ានេះគ្មានចង់ទាមទារអ្វីវែងឆ្ងាយនោះទេ គឺគោលបំណងចង់អោយតែភាគីរោងចក្រទទួលយកតំណាងកម្មករឈ្មោះ សុគន្ធ សុគន្ធា ចូលធ្វើការដូចដើមវិញ និង អោយភាគីខាងរោងចក្រគោរពច្បាប់ការងាររបស់ព្រះរាជាណាចក្រកម្ពុជា ដូចជា ឈប់សំរាកថ្ងៃបុណ្យប្រពៃណីខ្មែរ និង បុណ្យជាតិផ្សេងៗ ពីព្រោះកន្លងមកថៅកែរោងចក្រខាងលើនេះ មិនដែលអនុញ្ញាតិ្តអោយកម្មករឈប់សំរាកនៅថ្ងៃបុណ្យជាតិដូចជា បុណ្យចំរើនព្រះជន្ម បុណ្យអ៊ុំទូក បុណ្យ ៧ មករា ជាដើម គឺថៅកែរោងចក្រតែងតែបង្ខំអោយកម្មករ ធ្វើការរហូតមិនអោយសំរាកឡើយ ។
ហើយការតវ៉ានេះ ជាលើកទី ២ ហើយ ប៉ុន្តែថៅកែរោងចក្រហាក់មិនមានដំណោះស្រាយអ្វីទាល់តែសោះ ។ ក្រុមកម្មករទាំងអស់ បានធ្វើការប្តេជ្ញាចិត្តថា ពួកគេនឹងធ្វើការតវ៉ាមិនចូលធ្វើការនោះឡើយ បើសិនជាភាគីខាងរោងចក្រមិនយល់ព្រមនូវលក្ខខណ្ឌរបស់ពួកគេខាងលើ ។
លោក យ៉ូវ ខេមរាប្រធានមន្ទីការងារខេត្តព្រះសីហនុបានធ្វើការបញ្ជាក់ថាពាក់ព័ន្ធការតវ៉ារបស់ក្រុមកម្មករចំនួន ២ ចំណុច ទី ១ គឺទាមទារអោយក្រុមហ៊ុនរោងចក្រទទួលយកតំណាងកម្មករឈ្មោះ សុគន្ធ សុគន្ធា ចូលធ្វើការដូចដើមវិញ ។ ទី២ ទាមទារអោយមានការផ្សះផ្សារ ព្រមព្រៀងគ្នារវាងក្រុមហ៊ុន និង កម្មករ ពាក់ព័ន្ធទៅនឹងច្បាប់ការងារ។ ទាំង២ចំណុចខាងលើនេះ រហូតមកដល់ពេលនេះ ថ្វីត្បិតតែបានដាក់ចូលទៅដល់ភាគីក្រុមហ៊ុនរួចរាល់ហើយក៏ដោយ ប៉ុន្តែភាគីក្រុមហ៊ុន នៅមិនទាន់បានធ្វើការឆ្លើយតបមកវិញនៅឡើយទេ។
