កំពង់ឆ្នាំង៖មនុស្សប្រុសស្រី៣នាក់បានជិះម៉ូតូបុករ៉ឺម៉កដឹកជ្រូកពីក្រោយកាលពីវេលាម៉ោង៣និង៣០នាទីរសៀលថ្ងៃទី១០ ខែកុម្ភះ ឆ្នាំ២០១៥ នៅលើផ្លូវជាតិលេខ៥ ចំណុចមុខវត្តតាកុល ក្នុងភូមិតាកុល ឃុំពានី ស្រុកកំពង់ត្រឡាច រងរបួសទាំង៣នាក់ ។ក្រោយកើតហេតុអ្នកដឹកជ្រូកភ័យពេក ស្មានថាជនរងគ្រោះស្លាប់បានបើករត់យករ៉ឺម៉កម៉ូតូនិងជ្រូកទៅលាក់ទុកក្នុងព្រៃចោល។
លោក ហ៊ុន វាសនា អធិការនគរបាលស្រុកកំពង់ត្រឡាចបាននិយាយអោយដឹងថា៖ មុនពេល
កើតហេតុ មានម៉ូតូមួយគ្រឿងជិៈគ្នា៣នាក់ បានទៅបុកកន្ទុយរ៉ឺម៉កដឹកជ្រូកពីក្រោយ បណ្តាលអោយដួល
រណូករណែលពេញថ្នល់ ពេលនោះអ្នកបើករ៉ឺម៉កដឹកជ្រូកបានងាកក្រោយឃើញបែបនោះភ័យស្មានថាៈជនរងគ្រោះស្លាប់បានបើករ៉ឺម៉កដឹកជ្រូករហូតដល់ស្ពានពោធិ ហើយបានបត់ចូលព្រៃលាក់រ៉ឺម៉កដឹកជ្រូក នៅព្រុំប្រទល់ស្រុកកំពង់ត្រឡាច និងស្រុកសាមគ្គីមានជ័យ រួចគេចខ្លួនបាត់។នៅព្រឹកថ្ងៃទី១១ ខែកុម្ភះនេះ ប្រជាពលរដ្ឋបានប្រទះឃើញ និងបានរាយការណ៏ជូនសមត្ថកិច្ចនិងត្រូវបានសមត្ថកិច្ចយកមករក្សាទុកនៅអធិការនគរបាលស្រុកកំពង់ត្រឡាច។
លោកអធិការបានអោយដឹងទៀតថា៖ជនរងគ្រោះទាំង៣នាក់ កំពុងសម្រាកនៅមណ្ឌលសុខភាពស្រុកកំពង់ត្រឡាច មាន១. ឈ្មោះ ស៊ីម អុលរ៉ាវី ភេទប្រុស អាយុ២៤ឆ្នាំ ២.ឈ្មោះជា ម៉ាក់ អាយុ៣០ឆ្នាំ ភេទប្រុស និង៣. ឈ្មោះ ណា វីតា ភេទស្រី អាយុ៩ខែ ទាំង៣នាក់មានទីលំនៅភូមិច្រកល្មៀត ឃុំឈូកស ស្រុកកំពង់ត្រឡាច។
ករណីនេះសមត្ថកិច្ចបានអំពាវអោយម្ចាស់ជ្រូកមកទទួលយកទៅវិញ ព្រោះអ្នកដែលជិៈម៉ូតូបុករ៉ឺម៉កពីក្រោយគ្រាន់តែរងរបួសស្រាលប៉ុណ្ណោះ ហើយនេះជាកំហុសខ្លួនឯងផងព្រោះទៅបុកគេពីក្រោយមិនមែនជាកំហុសអ្នកបើករ៉ឺម៉កម៉ូតូដឹកជ្រូកនោះទេ ចំណែកសត្វជ្រូកនៅលើរ៉ឺម៉កចំនួន៤៥ក្បាលបានងាប់អស់២ក្បាលទៅហើយ៕
