បន្ទាយមានជ័យៈ ឯកឧត្តម គោស៊ុំ សារឿត អភិបាលខេត្តបន្ទាយមានជ័យ បានធ្វើការស្តីបន្តោស និងរិះគន់ធ្ងន់ៗ ទៅលើការបំពេញកិច្ចការងាររបស់មន្ត្រីច្រកចេញចូលតែមួយរបស់ក្រុង សិរីសោភ័ណ និងក្រុងប៉ោយប៉ែតថា បង្កការស្មុគស្មាញ ធ្វើការងារមិនស៊ីសង្វាក់គ្នា ដែលជាហេតុធ្វើឲ្យការបំពេញសេវារដ្ឋបាលជូនប្រជាពលរដ្ឋមានការយឺតយ៉ាវ និងបង្កឲ្យប៉ះពាល់សតិអាម្មណ៍របស់ប្រជាពលរដ្ឋ និងធ្វើឲ្យពួកគាត់កាន់តែខ្វះជំនឿទុកចិត្តមកលើអង្គភាពច្រកចេញចូលតែមួយរបស់ក្រុងទាំង២នេះ។
ការបំពេញកិច្ចការងាររបស់មន្ត្រីច្រកចេញតែមួយបំពេញកិច្ចការងារមិន ស៊ីសង្វាក់គ្នាបែបនេះ ត្រូវបាន ឯកឧត្តម លើកឡើងថា ដោយសារតែទំនាស់រឿងផលប្រយោជន៍។ បញ្ហាទាំងនេះ ត្រូវបានប្រជាពលរដ្ឋរិះគន់កាន់តែខ្លាំងឡើងៗ ពីភាពអសកម្មបម្រើសេវាជូនប្រជាពលរដ្ឋមិនទាន់ពេលវេលា។
ការថ្លែងរិះគន់នេះ ត្រូវបានធ្វើឡើងក្នុងឱកាសដែលឯកឧត្តម គោស៊ុំ សារឿត និងឯឝឧត្តម ឧបនាយករដ្ឋមន្ត្រី កែ គឹមយ៉ាន ប្រធាអាជ្ញាធរជាតិប្រយុទ្ធប្រឆាំងគ្រឿងញៀន អញ្ជើញជាអធិបតីក្នុងពិធីបិទអង្គប្រជុំបូកសរុបលទ្ធផលការងារឆ្នាំ ២០១៤ និងផ្សព្វផ្សាយទិសដៅការងារឆ្នាំ២០១៥បន្ត កាលពីព្រឹកថ្ងៃទី១៧ ខែកុម្ភៈ ឆ្នាំ២០១៥ នៅក្នុងសាលប្រជុំសាកលវិទ្យាល័យមានជ័យ។
ទន្ទឹមគ្នានោះ ឧបនាយករដ្ឋមន្ត្រី កែ គឹមយ៉ាន បានថ្លែងថា បញ្ហាការផ្តល់សេវារដ្ឋបាល និងសេវាធារណៈ ទោះបីមានការកែសម្រួលអំពីថ្លៃសេវារដ្ឋបាលមួយចំនួនក៏ដោយ ក៏ប៉ុន្តែការអនុវត្តជាក់ស្តែងរបស់តាមបណ្តាមន្ទីរ អង្គភាព ក៏ដូចជាតាមមូលដ្ឋានមួយចំនួនពុំទាន់ធ្វើបានល្អនៅឡើយ។ ឥរិយាបថក្នុងការបំពេញការងាររបស់មន្ត្រីគ្រប់ថ្នាក់ នៅមិនទាន់រៀបចំល្អក្លាយទៅជាអ្នកបម្រើជូនប្រជាពលរដ្ឋពុំទាន់ពេញលេញ នៅឡើយ។ ពោល គឺមិនទាន់មានទម្លាប់ឥរិយាបថទន់ភ្លន់ជាមួយប្រជាពលរដ្ឋ គឺធ្វើបានតែជាមួយមន្ត្រីឋានន្តរស័ក្តិខ្ពស់ និងអ្នកជំនួញធំតែប៉ុណ្ណោះ។
ឯកឧត្តមបានបញ្ជាក់ថា ភាពខ្វះខាតមួយចំនួនកើតចេញពីភាពមិនស្មោះត្រង់ និងខ្វះវិជ្ជាជីវៈ ខ្វះសីលធម៌ ខ្វះការទទួលខុសត្រូវរបស់មន្ត្រីមួយចំនួនតូចនៅតាមលំដាប់ថ្នាក់ត្រូវ ចាំបាច់ទប់ស្កាត់ តម្រង់ទិស និងកែលម្អធ្វើឡើង តាមរយៈវិធានការ អប់រំ វិធានការរដ្ឋបាល និងវិធានការច្បាប់
