(ពត៌មាន រូបភាព វីដេអូ )សៀមរាប: ជនសង្ស័យជាជនជាតិវៀតណាមពីរនាក់ប្តីប្រព័ន្ធនេះបច្ចុបន្បន្នមករស់នៅក្នុងផ្ទះជួលបន្ទប់ស្ថិតនៅក្នុងភូមិតាភុល សង្កាត់ស្វាយដង្គំ ក្រុងសៀមរាប ត្រូវបានកម្លាំងនគរបាលប្រឆាំងគ្រឿងញៀននៃស្នងការដ្ឋាននគរបាលខេត្តសៀមរាបធ្វើការចាប់ឃាត់ខ្លួនបានកាលពីថ្ងៃទី២៤ខែមីនាឆ្នាំ២០១៤នេះ។លោកវរសេនីយ៍ឯក អ៊ុំ អមរា ស្នងការរងនិងជា
ប្រធានការិយាល័យកណ្តាលនគរបាលប្រឆាំងបទល្មើសនៃស្នងការដ្ឋាននគរបាលខេត្តសៀមរាបនិងលោកវរសេនីយ៍ត្រី អ៊ុំ សាអាត នាយការិយាល័យនគរបាលប្រឆាំងគ្រឿងញៀននៃស្នងការដ្ឋាននគរបាលខេត្តសៀមរាបដែលបានដឹកនាំកម្លាំងនគរបាលក្នុងអង្គភាពចុះប្រតិបត្តិការណ៍ នៅនិងកន្លែងកើតហេតុបានមានប្រសាសន៍ឲ្យដឹងថា បន្ទាប់ពីសមត្ថកិច្ចជំនាញ
របស់លោកបានធ្វើការតាមដានស្រាវជ្រាវនិងកំណត់មុខសញ្ញាបានហើយនោះទើបកម្លាំងសមត្ថកិច្ចយើងឈានដល់ការចាប់ឃាត់ខ្លួនជនសង្ស័យទាំង២នាក់ប្តីប្រព័ន្ធនេះបានព្រមទាំងបានធ្វើការឆែកឆេរនៅក្នុងបន្ទប់របស់ជនសង្ស័យដោយសមត្ថកិច្ចបានរកឃើញនូវសារធាតុញៀនខុសច្បាប់ប្រភេទម្សៅមេតំហ្វេតាមីន ហៅម៉ាទឹកកកចំនួន១៥កញ្ចប់ដែល
ជនសង្ស័យបានយកមកលាក់ទុកនៅក្នុងអំពូលភ្លើង និងបានរកឃើញ២កញ្ចប់ទៀតដែលនៅជាប់និងខ្លួនជនសង្ស័យសរុបបានចំនួន១៧កញ្ចប់ ស្មើនិង៥,២ក្រាម និងជញ្ជិង សម្រាប់ថ្លឹងសារធាតុញៀនក៏ដូចជាសំភារ:សម្រាប់វេចខ្ចប់មួយចំនួនទៀតផងដែរ ។ សមត្ថកិច្ចបានបន្តឲ្យដឹងទៀតថា បន្ទាប់ពីបានធ្វើការត្រួតពិនិត្យនិងធ្វើការឆែកឆេខ្លួនជនសង្ស័យនិងគ្រប់ទីកន្លែងនៅក្នុងបន្ទប់ជួលរបស់ជនសង្ស័យហើយនោះសមត្ថកិច្ចក៏បាននាំជនសង្ស័យយកមកកាន់ការិយា័ល
ជំនាញដើម្បីធ្វើការសួរនាំបន្ត និងចំណាត់ការទៅតាមនិតិវិធី។ ដោយសមត្ថកិច្ចបានបញ្ជាក់ថាបើទោះបីជាកន្លងមកជនសង្ស័យមានល្បិចខ្ពស់នៅក្នុងការលាក់នូវសារធាតុញៀនខុសច្បាប់តាមរូបភាពណាក៏ដោយក៏មិនអាចរត់គេចពីសមត្ថកិច្ចជំនាញបានឡើយ ក្នុងកិច្ចចុះប្រតិបត្តិការណ៍នោះសមត្ថកិច្ចយើងក៏បានធ្វើការសំណូមពរសូម ដល់គ្រប់ប្រព័ន្ធ
ផ្សព្វផ្សាយទាំងអស់សូមជួយធ្វើការផ្សព្វផ្សាយបន្តដល់បងប្អូនប្រជាពលរដ្ឋពិសេសគឺយុវជន យុវនារី ទាំងអស់កុំចាញ់បោកការអូសទាញរបស់ជនខិលខូចថាការប្រើប្រាស់គ្រឿងញៀនខុសច្បាប់គ្រប់ប្រភេទជាឱសថមួយដែលអាចព្យាបាលជម្ងឺឫក៏អាចកែសម្ឆស្សធ្វើឲ្យមានភាពស្រស់ស្អាតនោះផ្ទុយទៅវិញការប្រើប្រាស់គ្រឿងញៀនខុសច្បាប់គ្រប់ប្រភេទគឺធ្វើឲ្យយើងខូចសុខភាពនិងប៉ះពាល់ដល់អាយុជីវិតនិងហានឈានដល់ការប្រព្រឹត្តបទល្មើសគ្រប់ប្រភេទផងដែរ ។
ដូចច្នេះសូមឲ្យបងប្អូនប្រជាពលរដ្ឋពិសេសគឺយុវជន យុវនារី ទាំងអស់ត្រូវចៀសឲ្យឆ្ងាយនិងត្រូវឆ្លើយថាទេចំពោះគ្រឿងញៀនខុសច្បាប់គ្រប់ប្រភេទ ៕ ដោយ លោក ខេង ខេមរា
