សៀមរាប រួមមានមន្ត្រី-រាជការ បុគ្កលិករដ្ឋនិងឯកជន ពាណិជ្ជករ និងប្រតិបត្តិករទេសចរណ៍ប្រមាណជា ៤០០នាក់ មកពីស្ថាប័ន-អង្គភាពនានាដូចជាមន្ទីរពាណិជ្ជកម្ម សភាពាណិជ្ជកម្ម ធនាគារ ស្ថាប័នមីក្រូហិរញ្ញវត្ថុ ទីភ្នាក់ងារទេសចរណ៍ និស្សិតមកពីសាកលវិទ្យាល័យផ្សេងៗ អ្នកគ្រប់គ្រងសណ្ឋាគារ និងភោជនីយ៍ដ្ឋាន ជាដើម ។ល។ បានជួបជុំគ្នា នៅក្នុងវេទិកាវិស័យឯកជនតាមបណ្តាខេត្ត ដែលរៀបចំឡើងដោយក្រសួងពាណិជ្ជកម្ម សហការ ជាមួយអាជ្ញាធរខេត្ត ។
ព្រឹកថ្ងៃទី២៣ ខែកុម្ភៈ ឆ្នាំ២០១៥ វេទិកានេះ បានរៀបចំដំណើរការនៅខេត្តសៀមរាប ។ លោកទេសរដ្ឋមន្ត្រី ស៊ុន ចាន់ថុល រដ្ឋមន្ត្រីក្រសួងពាណិជ្ជកម្ម និងជាតំណាងជាតិសមាគមសេដ្ឋកិច្ចអាស៊ាន បានអញ្ជើញចូលរួមធ្វើជាវាគ្មិនយ៉ាងសំខាន់ ដឹកនាំដំណើរការវរទិកាដ៏មានសារសំខាន់នេះ ក្រោមប្រធានបទ ការរៀបចំខ្លួន សម្រាប់សមាហរណកម្មសហគមន៍សេដ្ឋកិច្ចអាស៊ាន ហើយនៅពេលរសៀលក្នុងថ្ងៃតែមួយនេះដែរ ក្រសួងពាណិជ្ជកម្ម ក៏មានរៀបចំដំណើការ សិក្ខាសាលាជាស៊េរីមួយទៀត ស្តីអំពី បច្ចុប្បន្នភាព នៃកំណែទម្រង់ ក្រសួងពាណិជ្ជកម្ម និង ការជួយអភិវឌ្ឍវិស័យឯកជន ។
នៅក្នុងវេទិកាវិស័យឯកជនតាមបណ្តាខេត្ត ស្តីអំពី ការត្រៀមខ្លួនសម្រាប់សមាហរណកម្មសហគមន៍សេដ្ឋកិច្ចអាស៊ាន ត្រូវបាននិយាយអំពីការទទួលបានហិរញ្ញប្បទាន ការចូលទៅគាន់ទីផ្សារនឹងការប្រកួតប្រជែង និងបាននិយាយផងដែរ អំពីបញ្ហាជាក់លាក់ ដែលទាក់ទងទៅនឹង ផលិតផលកសិកម្ម ។
ក្នុងសន្ទរកថា និងបទបង្ហាញគន្លឹះ របស់ ឯកឧត្តម ស៊ុន ចាន់ថុល ទេសរដ្ឋមន្ត្រី រដ្ឋមន្ត្រីក្រសួងពាណិជ្ជកម្ម និងជាតំណាងជាតិសមាគមសេដ្ឋកិច្ចអាស៊ាន បានលើកឡើងថា កម្ពុជាបច្ចុប្បន្ន បាននិងកំពុងស្ថិតក្នុងរបត់ថ្មីមួយ ហើយសហគមន៍សេដ្ឋកិច្ចអាស៊ាន គឺជាចំណុចរបត់នៃបរិយាកាសធុរៈកិច្ច ដូច្នេះ តើយើង (កម្ពុជា) ត្រូវធ្វើយ៉ាងដូចម្តេច ? ដើម្បីទាញយក
អត្ថប្រយោជន៍ កាលានុវត្តភាព និងជំនះដោះស្រាយឲ្យបាន នូវកត្តាប្រឈម ដែលនឹងអាចកើតមាន ? ។ លោកបានបញ្ជាក់ថា ចម្លើយរបស់វា គឺជាបុព្វហេតុនៃកិច្ចដំណើរការរបស់អង្គវេទិកានេះតែម្តង នោះគឺការរៀបចំខ្លួនយ៉ាងដូចម្តេច ។
ជាមួយនឹងការបង្ហាញសារគន្លឹះ ឯកឧត្តម បានលើកយកឧទាហរណ៍មួយ ដើម្បីបង្ហាញអង្គវេទិកា នោះគឺបញ្ហាចរាចរណ៍ធនធានមនុស្ស ។ លោកបានលើកឡើងថា នៅក្នុងសមាហរណកម្មសហគមន៍សេដ្ឋកិច្ចអាស៊ាន ធនធានមនុស្សនឹងត្រូវបានចរាចរណ៍ដោយសេរី នៅក្នុងតំបន់អាស៊ាន តើអ្វី ?ដែលជាការព្រួយបារម្ភ ? អ្នកជំនាញបរទេស មកដណ្តើមការងារល្អៗនៅស្រុកយើង ឬ យ៉ាងមេច? ។
លោកបានបកស្រាយថា បញ្ហានេះ មិនមែនជាការព្រួយបារម្ភរបស់កម្ពុជានោះទេ ព្រោះអ្នកជំនាញទាំងនោះ មានតម្លៃខ្លួនខ្ពស់នៅស្រុកគេ ស្រុកយើងមានតម្លៃទីផ្សារពលកម្មទាបជាង ដូច្នេះអ្នកទាំងនោះវាពិបាកបន្តិចក្នុងការមកទទួលប្រាក់តម្លៃខ្លួនទាបនៅស្រុកខ្មែរ ក៏ប៉ុន្តែ អ្វីដែលកម្ពុជាត្រូវបារម្ភ នោះគឺធនធានមនុស្សរបស់កម្ពុជា មិនមានឆន្ទៈកសាងប្រទេសរបស់ខ្លួន ហើយត្រូវបានធ្វើចំណាកស្រុក ទៅយកតម្លៃពលកម្មខ្ពស់នៅស្រុកគេ ។
ឯកឧត្តម បានសង្កត់ធ្ងន់ថា អ្វីដែលសំខាន់ សម្រាប់ការស្វែងរកទីផ្សារដែលមានតម្លៃពលកម្មខ្ពស់នោះ គឺ ស្ថិតនៅត្រង់ តម្រូវការទីផ្សារពលកម្មតែប៉ុណ្ណោះ ដែលនេះគឺវាមិនខុសគ្នានឹងទីផ្សារផលិតផលកសិកម្មនោះឡើយ ផលិតផលមានច្រើន តែតម្រូវការទីផ្សារតិចតួច ( ផលិតផលធ្លាក់តម្លៃ ) ផលិតផលមានតិចតួច តែតម្រូវការទីផ្សារខ្ពស់ ( ផលិតផល ក៏មានតម្លៃខ្ពស់ ) ។
នៅក្នុងសំនួរដែលសួរថា តើយើងកំពុងឈរនៅទីណា ? ឯកឧត្តមបានបង្ហាញការឆ្លុះបញ្ចាំងទៅនឹងផែនការលម្អិតរបស់សហគមន៍សេដ្ឋកិច្ចអាស៊ាន ( AEC ) ដែលត្រូវបានចុះហត្ថលេខានៅក្នុងឆ្នាំ ២០០៧ ដែល ACE នោះ នឹងបង្កើតអាស៊ានទៅជាទីផ្សារ និងជាមូលដ្ឋានផលិតកម្មតែមួយ ជាគោលដៅធ្វើឲ្យអាស៊ាន ពោរពេញទៅដោយថាមពល និងការប្រកួតប្រជែង ប្រកបដោយសសរស្តម្ភទាំង៤ គឺទី១ ទីផ្សារនិងមូលដ្ឋានផលិតកម្មតែមួយ ទី២ តំបន់ដែលមានសេដ្ឋកិច្ចប្រកួតប្រជែង ទី៣ ការអភិវឌ្ឍសេដ្ឋកិច្ចដោយសមធម៌ និងទី៤ គឺ សមាហរណកម្មសេដ្ឋកិច្ចទៅក្នុងពិភពលោក ៕