រតនគិរីៈ កម្លាំងនគរបាលប្រឆាំងបទល្មើសសេដ្ឋកិច្ចនៃស្នងការនគរបាលខេត្តរតនគិរីដឹកនាំផ្ទាល់ដោយលោកជា សុភ័ក្ត្រ ព្រះរាជអាជ្ញារងអមសាលាដំបូង នៅរសៀលថ្ងៃទី០៦ ខែមិនា ឆ្នាំ២០១៥ បានចុះបង្ក្រាបហាងលក់ម៉ូតូចំនួនពីរកន្លែងស្ថិតក្នុងភូមិជ័យជំនៈ សង្កាត់ឡាបានសៀក ក្រុងបានលុង ខេត្តរតនគិរី។
លោកវរសេនីយ៍ឯកនូវ ដារ៉ា នាយការិយាល័យប្រឆាំងបទល្មើសសេដ្ឋកិច្ចខេត្ត បានអោយដឹងថាការចុះត្រួតពិនិត្យហាងលក់ម៉ូតូ២កន្លែងនេះគឺរកឃើញម៉ូតូស៊េរីចាស់ និងទំនើបចំនួន១០គ្រឿង គឺធ្វើឡើងទៅតាមការណែនាំរបស់លោកស្នងការ ស្នងការរង និងដឹកនាំដោយលោកជា សុភ័ត្ត្រ ព្រះរាជអាជ្ញារងអមសាលាដំបូងខេត្ត។ 
បច្ចុប្បន្នម៉ូតូអត់ពន្ធទាំងនេះត្រូវបាននាំយករក្សាទុកនៅស្នងការនគរបាលខេត្តដើម្បីឲ្យមន្ត្រីសាខាគយ និងរដ្ឋករខេត្តរតនគិរី មកត្រួតពិនិត្យព្រមទាំងអោយម្ចាស់ម៉ូតូទាំងនេះមកធ្វើការបង់ពន្ធឲ្យបានត្រឹមត្រូវតាមច្បាប់។ គួរបញ្ជាក់ផងដែរថា កន្លែងហាងម៉ូតូពីរកន្លែងនេះមានឈ្មោះ ទី១ហាងសុផល ដែលមានយីហោទិញនិងលក់ម៉ូតូគ្រប់ប្រភេទ និងទី២ឈ្មោះ ឆៃ រ៉ាត់ ក្នុងនោះដែរហាងឆៃ រ៉ាត់ រកឃើញម៉ូតូចំនួន៤គ្រឿង និងហាងសុផលចំនួន៦គ្រឿង។ ហើយហាងទាំង២កន្លែងខាងលើនេះគេសង្កេតឃើញមានកម្លាំងសមត្ថកិច្ចបានចុះធ្វើការឆែកឆេរជាច្រើនដងមកហើយក៏ប៉ុន្តែម្ចាស់ហាងទាំងនេះមិនខ្លាចញញើតចំពោះច្បាប់នោះទេ ថែមទាំងនាំយកម៉ូតូអត់ពន្ធមកដាក់តាំងលក់ដដែល។
លោកជា សុភ័ក្ត្រ ព្រះរាជអាជ្ញារងអមសាលាដំបូងបានឲ្យដឹងដែរថា ការបង្ក្រាបម៉ូតូអត់ពន្ធនេះជាករណី៣លើកមកហើយ ហើយបានណែនាំម្ចាស់ហាងលក់ម៉ូតូខាងលើនេះ និងធ្វើកិច្ចសន្យា អោយបង់ពន្ធទៅតាមច្បាប់ បើសិននៅតែមិនបង់ពន្ធទៀត និងបញ្ជូនម៉ូតូអត់ពន្ធទៅសាលាដំបូងចាត់ការបន្តទៅតាមផ្លូវច្បាប់៕
ប្រភពពីម្ចាស់ហាងបានអោយដឹងថា ការចុះបង្ក្រាបខាងលើនេះគឺបង្ក្រាបតែហាង២កន្លែងប៉ុណ្ណោះ រីឯហាងជាច្រើនកន្លែងទៀតនៅក្នុងក្រុងបានលុងមិនបានបង្ក្រាប។ ពួកគេសុំអោយសមត្ថកិច្ចជំនាញចុះបង្ក្រាបម៉ូតូអត់ពន្ធតាមហាងលក់នៅក្នុងក្រុងបានលុងទាំងអស់ផង កុំបង្ក្រាបតែ២ហាងខាងលើនេះ៕
ឡុង សារ៉េត
