ភ្នំពេញៈ យុវជន២នាក់ស្រវឹងស្រាជោគជាំ បានបើករថយន្តមួយគ្រឿង ក្នុងល្បឿនលឿនរេពេញផ្លូវ រួចបានរេចង្កូតជ្រុលទៅបុកក្បាលនាគ ពុះចែកទ្រូងផ្លូវ ខូចខាតចំនួន២កង់ ព្យាយាមបើករត់ពីមុខមជ្ឍមណ្ឌលផាកវ៉េ ត្រូវបានសមត្ថកិច្ចដេញស្ទាក់បាន នៅស្តុបទួលទំពូង ហើយជនបង្កទាំង២នាក់ បានចុះពីលើរថយន្តស្រែកឡូឡារ និងបានវាយ ទៅលើសមត្ថកិច្ច ដែលដេញឃាត់រូបខ្លួន ថែមទាំងបានយកឈ្មោះអ្នកមានអំណាច មកអួតថែមទៀតផង ។ ហេតុការណ៍នេះបានកើតឡើង កាលពីវេលាម៉ោង១២នឹង១០នាទីយប់រំលងអាធ្រាត ឈានចូលថ្ងៃទី៨ ខែមិនា ឆ្នាំ២០១៥ នៅចំណុចមុខមជ្ឍមណ្ឌលផាកវ៉េ តាមបណ្តោយផ្លូវម៉ៅសេទុង ស្ថិតក្នុងសង្កាត់ទួលទំពូងទី១ ខណ្ឌចំការមន ។
ប្រភពពត៌មានពីកន្លែងកើតហេតុ បានឱ្យដឹងថា មុនពេលកើតហេតុ គេបានឃើញយុវជន២នាក់ ទំនងជាស្រវឹងស្រាជោគជាំ បានបើករថយន្តព្រូស ពណ៍ស្ករ ពាក់ស្លាកលេខ ភ្នំពេញ 2X-1488 បើកបរក្នុងល្បឿនយ៉ាងលឿនទិសដៅពីលិចទៅកើត ហើយនៅពេលមកដល់ចំណុច មុខនឹងមជ្ឍមណ្ឌលផាកវ៉េ បានរេចង្កូតជ្រុលទៅបុក ក្បាលនាគពុះចែកផ្លូវ បាក់ចំនួន១កង់ ចំណែករថយន្តបានរងការខូចខាត ផ្នែកខាងមុខយ៉ាងដំណំ ហើយរថយន្តបានព្យាយាមបើករត់ប្រមាណជា១០០ម៉ែត្រ ដល់ចំណុចខាងត្បូងស្តុបចំការមន ក៏ត្រូវបានសមត្ថកិច្ចឃាត់បានភ្លាមៗផងដែរ ។ និងបាននាំខ្លួនជនបង្ក ទៅបុស្តិ៍នគរបាលទួលទំពូងទី១ ជាបណ្តោះអាសន្ន ។
ប៉ុន្តែអ្វីដែលគួរឱ្យកត់សម្គាល់នោះ នៅពេលនាំខ្លួនជនបង្កទាំង២នាក់ ទៅដល់បុស្តិ៍ គេសង្កេតឃើញថា សមត្ថកិច្ចមូលដ្ឋាន ក៏ដូចជានាយបុស្តិ៍ទួលទំពូងទី១ ហាក់ដូចជាមានការខ្លាចរអា ជាមួយនឹងពាក្យសម្តីជនបង្កទាំង២នាក់ ដែលបានយកឈ្មោះអ្នកមានអំណាចមួយចំនួន មកនិយាយអួតអាង ថែមទាំងបានស្រែកឡូឡានៅបុស្តិ៍ថែមទៀតផង ហាក់ដូចជាគ្មានញញើតនឹងសមត្ថកិច្ច បន្តិចណាទាល់តែសោះ ហើយក៏មិនមានសមត្ថកិច្ចណាម្នាក់ ហ៊ានបង្រា្កបនៅទង្វើរបស់ពួកគេនោះដែរ ដោយបណ្តែតបណ្តោយឱ្យពួកគេឡូឡារ ទៅតាមអំពើចិត្ត មិនដឹងថា ពួកគេនិយាយអ្វីខ្លះ ទៅកាន់សមត្ថកិច្ចនោះទេ ។
សូមបញ្ជាក់ថា គ្រោះថ្នាក់ចរាចណ៍ខាងលើនេះ បង្កឡើងដោយសារតែយុវជនទាំង២នាក់ បើកបររថយន្តក្នុងល្បឿនលឿន ម្យ៉ាងទៀត បើកបរទាំងស្ថានភាពស្រវឹងជោគជាំ ទើបបង្កឲ្យមានគ្រោះថ្នាក់ដូចនេះ តែសំណាងហើយមិនបានបង្កគ្រោះថ្នាក់ដល់អ្នកដ៏ទៃ ហើយប្រជាពលរដ្ឋ ដែលបានឃើញហេតុការណ៍ និងទង្វើរបស់យុវជនទាំង២នេះ ដែលអួតអាងខ្លួន និងបាននិយាយឈ្មោះអ្នកមានអំណាចមួយចំនួន និងរង់ចាំមើលថា សមត្ថកិច្ចនឹងចាត់វិធានការយ៉ាងណាចំពោះពួកគេ ៕