ភ្នំពេញៈ ស្ត្រីម្នាក់ចេញពីពិធីមង្គល់ការមិត្ត ស្រវឹងស្រាជោគជាំ បើករថយន្តបុកឡិចស៊ីស RX330 ជ្រុលបុករបាំងថ្មពុះចែកទ្រូងផ្លូវ ហើយហោះទៅបុកម៉ូតូមួយគ្រឿងទៀត បណ្តាលឲ្យមនុស្សចំនួន២នាក់ រងរបួសធ្ងន់ កាលពីវេលាម៉ោង២១និង១០នាទីយប់ ថ្ងៃទី៨ ខែមិនា ឆ្នាំ២០១៥ នៅចំណុចស្តុបទេពផន តាមបណ្តោយផ្លូវម៉ៅសេទុង ស្ថិតក្នុងសង្កាត់ផ្សារដេប៉ូទី១ ខណ្ឌទួលគោក ។
យោងតាមប្រភពព័ត៌មាន ពីកន្លែងកើតហេតុ បានឲ្យដឹងថា មុនពេលកើតហេតុ គេបានឃើញរថយន្តឡិចស៊ីស៣៣០មួយគ្រឿង ពណ៌ខ្មៅ ពាក់ស្លាកលេខ ភ្នំពេញ 2H-5916 បើកបរដោសស្ត្រីម្នាក់ ស្រវឹងស្រាជោគធ្វើដំណើរតាមបណ្តោយផ្លូវម៉ៅសេទុង ក្នុងទិសដៅពីត្បូងទៅជើង ក្នុងល្បឿនលឿន ខណៈមកដល់ចំណុចកើតហេតុ បានរ៉េចង្កូតទៅបុកនិងរបាំងថ្មពុះចែកទ្រួងផ្លូវ ហើយហោះទៅបុកម៉ូតូម៉ាលស្ទេព ពាក់ស្លាកលេខ ភ្នំពេញ 1R-0427 មួយគ្រឿងទៀត បណ្តាលឲ្យមនុស្សចំនួន២នាក់ បានរងរបួសធ្ងន់ ត្រូវបានរថយន្តសង្គ្រោះ ដឹកទៅសង្គ្រោះភ្លាម ចំណែករថយន្ត រងការខូចខាតយ៉ាងដំណំ ។
ក្រោយពេលកើតហេតុ សមត្ថកិច្ចមូលដ្ឋាន បានចុះមកដល់ចំណុចកើតហេតុ តែមិនធ្វើការឃាត់ខ្លួនស្ត្រីបើករថយន្តបង្កនោះទេ បណ្តោយឲ្យមិត្តភ័ក្កមកទទួលគេចខ្លួនបាត់ រីឯរថយន្តនិងម៉ូតូ សមត្ថកិច្ចជំនាញបានស្ទូចយកទៅរក្សាទុក នៅការិយាល័យចរាចរណ៍ជើងគោក ដើម្បីរងចាំម្ចាស់ចូលខ្លួន ដោះស្រាយតាមផ្លូវច្បាប់ ៕
