កំពង់ធំៈ នៅរសៀលថ្ងៃទី ១២ ខែ មិនា ឆ្នាំ ២០១៥ លោក សាយ ណូរ៉ា ព្រះរាជអាជ្ញារង បានដឹកនាំកំលាំង សមត្ថកិច្ច ដែលមានការចូលរួម ពីសំណាក់ លោកវរៈសេនីយ៍ត្រី ញ៉ែម ឈុនលី អធិការក្រុងស្ទឹងសែន និងកំលាំងកងរាជអាវុធហត្ថ ព្រមទាំងកំលាំងផ្នែកសឹករងក្រុងស្ទឹងសែន ចុះឆែកឆេរផ្ទះជួលមួយខ្នង ស្ថិតនៅេភូមិកំពង់ធំ សង្កាត់កំពង់រទេះ ក្រុងស្ទឹងសែន ខេត្តកំពង់ធំ ក្រោមការបញ្ជាផ្ទាល់របស់ លោក អ៊ិត សុធា ព្រះរាអាជ្ញាអមសាលាដំបូង ខេត្តកំពង់ធំ ។
កិច្ចសហប្រតិបត្តិការចុះឆែរឆេរ ផ្ទះដែលជនសង្ស័យស្នាក់នៅ សមត្ថកិច្ចបានរកឃើញ ម៉ូតូសង់C125 ចំនួន២ គ្រឿង ឆ្នាំ ២០១៥ ពណ៌ខ្មៅ អត់ស្លាកលេខ និងកន្ទុយម៉ូតូម៉ាកសង់ ចំនួន៥ កន្ទុយ ដែលមានការសង្ស័យថា ចោរបានលួចម៉ូតូមកស្តប់ទុក ហើយបានធ្វើសកម្មភាពដោះបំបែកធ្វើជាគ្រឿងបន្លាស់ សម្រាប់លក់ចែកចាយ ទៅតាមហាងជួសជុលម៉ូតូ ចំនែកជនសង្ស័យដឹងខ្លួនទាន់ បានរត់គេចខ្លួនមុនពេលសមត្ថកិច្ចទៅដល់។
តាមការឲ្យដឹងពីអ្នកស្រី ប៉ែន តៅ ភេទ ស្រី អាយុ៤៣ឆ្នាំ មានគ្រួសារឈ្មោះ ថែ សុវណ្ណ អតីតធ្វើប៉ូលិស បច្ចុប្បន្នជាមន្ត្រីសង្គមកិច្ចខេត្តកំពង់ធំ មានមុខរបរលក់ត្រីនៅផ្សារកំពង់ធំ បានឲ្យដឹងថា ជនសង្ស័យធ្លាប់បានមកជួលបន្ទប់ក្រោមផ្ទះរបស់គាត់ស្នាក់នៅតែម្នាក់ឯងចំនួន២ដង លើកទី១ ជួលបានជាងមួយខែ ហើយក៏ចាក់ចេញ លើកទី២ ទើបតែមកជួលបាន៥ថ្ងៃក៏មានហេតុការឆែកឆេរនេះ អ្នកស្រីបានបន្តថា ពេលថ្ងៃពុំសូវឃើ់ញមកផ្ទះទេ ដោយជនសង្ស័យមកតែពេលយប់ ហើយពុំស្គាល់ឈ្មោះអ្វីដែរ ព្រោះពុំ បានធ្វើជីវប្រវត្តិរាយការជូនសមត្ថកិច្ច ។
ក្រោយពីសមត្ថកិច្ចឆែកឆេររួច លោក សាយ ណូរ៉ា បានអញ្ជើញអ្នកស្រី ប៉ែន តៅ ដែលជាម្ចាស់ផ្ទះឲ្យជួលបន្ទប់ធ្វើសកម្មភាពរបស់ជនសង្ស័យ មកសាកសួរដំណើររឿង នៅអធិការក្រុងស្ទឹងសែន តាមប្រភពពត៌មានពីអ្នកបានឃើញហេតុការ បាននិយាយថា កាលពីព្រឹកមិញនៅសង្កាត់បាល័ង្គ មានករណីចោរលួចម៉ូតូ ហើយម្ចាស់ម៉ូតូបានជិះម៉ូតូឆ្វាត់ឆ្វែងតាមច្រល្ហក ហើយនៅនឹងដៃមានតេឡេ ដែលបានបង្កប់នៅក្នុងម៉ូតូ លុះមកដល់ចំនុចផ្ទះចោរលួចម៉ូតូលាក់ទុក ទើបលឺសំឡេងរោយ៉ាងខ្លាំងចេញពីក្នុងបន្ទប់ ទើបជននោះបាន ប្តឹង សមត្ថកិច្ចឲ្យចុះឆែរឆេរតែម្តង ។
ដោយ ប៊ុន រដ្ឋា